LUKAS 21: 1-4
Ang Handog ng Isang Biyuda
1 Pinagmamasdan ni Jesus ang mayayamang may dalang mga handog sa Templo. 2 Nakita rin niya ang isang mahirap na biyudang naghulog ng dalawang tigsisingkwenta sentimo. 3 Sinabi niya sa mga alagad, "Ang inihandog ng mahirap na biyudang iyon ay higit pa sa inihandog nilang lahat. 4 Ang inilagay nila ay bahagi lamang ng labis na sa kanila, ngunit ang kanyang ibinigay ay ang buo niyang ikabubuhay."
MAGNILAY:
Wala sa dami kundi sa kalidad. Wala sa laki kundi sa sinseridad. Ito ang simpleng mensahe ng ating Ebanghelyo ngayon tungkol sa pagbibigay. Kung ikukumpara ang ibinibigay ng mga mayayaman bilang tulong sa templo ay talaga namang sobrang laki at masasabi mo talagang baryang-barya o baka nga wala ng kuwenta yung ibinigay ng mahiarap na biyuda. Pero ang huli ang nagtamo ng paboir sa mata ng Panginoon. Wala sa dami o laki kundi sa kalidad at sinseridad ng pagbibigay.
Unang katangian ng kalidad na pagbibigay ay ang pagkukusa. Ang pagbibigay ay nagmumula sa puso. Hindi ito napipilitan. Ito'y isang maluwag na desisyon ng puso. Nanggagaling ito sa malasakit ng puso sa isang nangangailangan. Kapag kusa at bunga ng malasakit kalidad din ang ibinibigay at hindi tira-tira lamang. Sa pagbibigay hindi ang materyal na yaman lamang ang ibinabahagi kundi ang yaman ng sarili.
Ikalawang katangian ng kalidad na pagbibigay ay ito ay may kirot sa puso. Ang kirot na ito ay hindi nanggagaling sa dahil ayaw mo talagang magbigay. Hindi ito ang kirot na tinutukoy dito. Makirot kasi ang binabahagi mo ay mahalaga para sa iyo. Bahagi ng sarili mo ang ibinibigay mo. May nawawala sa iyo. May namamatay sa iyo para mabuhay ang iba. Sabi nga, hangga't hindi masakit, hindi pa ito tunay na pagbibigay. Ang para sa akin ay pinaparaya ko na para sa iba. ito ang diuwa ng tunay na pagbibigay.
Ang ikatlong katangian ng kalidad na pagbibigay ay yung hindi naghihintay ng kapalit. Ganap na pagpaparaya ang pagbibigay. Hindi ito yung nagpaparaya ka at nagkakaloob ka pero sa likod ng isip mo sinasabi mo sa Diyos, 'O hayan a, nagbigay ako. Siguro naman ibabalik mo ito ng doble-doble.' Sa pagbibigay, ang tanging gatimpala mo ay yung lumigaya yung iba dahil naibsan ang kanilang paghihirap at nakatawid mula sa hirap na kanilang dinaranas. Sapat na sa iyo yung nakatulong ka.
Panghuli, ang katangian ng kalidad na pagbibigay ay yung palagian kahit maliit. Consistency ang pinag-uusapan dito. Tanda ng magandang motibasyon ay yung palagian o malimit. Hindi ito isang bagsakan lamang. Istilo o sistema ito ng buhay. Habit ito. At ang pag-ibig at malasakit ay dapat maging habitual.
MANALANGIN:
Panginoon ng pagbibigay, turuan mo kaming matutunan ang malasakit na ipinakita mo sa ming lahat kaya't nakuha mong ibigay ang lahat maging ang iyong buong buhay upang kami'y maligtas. Tulungan mo kaming makapagbigay hindi base sa laki o dami kundi sa kalidad at sinseridad.
No comments:
Post a Comment