LUKAS 20: 27-38
Katanungan Tungkol sa Muling Pagkabuhay
27 Ilang Saduseo naman ang lumapit kay Jesus. Ang mga ito ay nagtuturong hindi na muling mabubuhay ang mga patay. 28 Sabi nila, "Guro, isinulat ni Moises para sa atin ang ganitong batas, 'Kung mamatay ang kuya ng isang lalaki at ang asawa nito'y maiwang walang anak, siya ay dapat pakasal sa biyuda upang magkaanak sila para sa namatay.' 29 Minsan, may pitong magkakapatid na lalaki. Nag-asawa ang panganay at namatay na walang anak. 30 Nagpakasal sa biyuda ang pangalawa, subalit ito'y namatay ding walang anak. 31 Ganoon din ang nangyari sa pangatlo hanggang sa pampito; sila'y isa-isang napangasawa ng babae at pawang namatay na walang anak. 32 Sa kahuli-hulihan po'y namatay naman ang babae. 33 Ngayon, sa muling pagkabuhay, sino po sa pito ang kikilalaning asawa ng babae, yamang silang lahat ay napangasawa niya?"
34 Sumagot si Jesus, "Sa buhay na ito, ang mga lalaki at mga babae ay nag-aasawa. 35 Ngunit sa kabilang buhay, ang mga magiging karapat-dapat sa muling pagkabuhay ay hindi na mag-aasawa. 36 Hindi na rin sila mamamatay sapagkat matutulad sila sa mga anghel. Sila'y mga anak ng Diyos dahil sila'y nakabilang sa mga muling binuhay. 37 Maging si Moises ay nagpapatunay na muling binubuhay ang mga patay. Sapagkat sa kanyang kasaysayan tungkol sa nagliliyab na mababang puno, ang Panginoon ay tinawag niyang 'Diyos ni Abraham, Diyos ni Isaac at Diyos ni Jacob.' 38 Kaya't ang Diyos ay hindi Diyos ng mga patay kundi ng mga buhay, sa kanya'y buhay ang lahat."
MAGNILAY:
Ang takbo ng buhay natin sa kasalukuyan ay nakasalalay sa iniisip nating bukas. Ang bukas ang target natin. Lagi nating pinaghahandaan ang bukas malayo man ito o malapit. Dinidiktahan ng bukas ang ating kasalukuyan.
Ito ang kahalagahan ng ating Kristiyanong paniniwala sa muling pagkabuhay. Itinuturing natin itong ang pinaka-bukas natin. Ito ang destinasyon nating lahat. ito ang pinahayag ni Hesus. Ito rin ang kanyang pinatunayan sa kanyang muling pagkabuhay. Nakalaan tayo na mabuhay magpakailanman.
Bagama't kailangan ng ibayong pananampalataya at pagtitiwala sa Diyos para paniwalaan ang muling pagkabuhay dahil nga sa tumutukoy ito sa kinabukasan na hindi pa nangyayari, pero kung tutuusin natin, ito ang pinaka-lohikal at rasonableng aral kung maniniwala tayo sa Diyos. Walang saysay ang anumang paniniwala sa Diyos kung wala naman palang buhay na walang hanggan. Magkakambal ang paniniwala sa Diyos sa paniniwala sa buhay na walang hanggan. Ang buhay na walang hanggan ang pinakatumpak na hantungan ng pagmamahal. Ang pag-ibig ang nagsasabi sa atin na may buhay na walang hanggan sapagaka't ang pag-ibig, na siyang pinakakahulugan ng buhay kristiyano, ay nagbibigay sa atin ng patikim ng buhay na walang hanggan. Ang taong nagmamahal ay nakakadama ng kawalang katapusan. Alam ng taong nagmamahal na ang makalupang kamatayan ay hindi kayang wakasan ang wagas na pag-ibig. Ito ang misteryo ng karanasan ng pag-ibig. Kaya't ang unang utos ng Diyos ay magmahal. At ang Diyos sa kanyang sarili ay PAG-IBIG!
Maraming kumokontra sa konsepto ng buhay na walang hanggan. Gusto kasi ng marami na kontrolado nila lahat - isip, imahinasyon pati ang bukas. Hindi nila kayang arukin at unawain ang buhay na walang hanggan. Ayaw nilang bigyang pagkakataon ang misteryo at pananampalataya para unawain ang kabuuan ng buhay. Gusto lang nila ay yung kaya nilang ipaliwanag ng husto. Ganito ang mga Saduseo sa ating Ebanghelyo. Hindi nila maisip ang realidad ng muling pagkabuhay. Akala nila pareho pa rin sa buhay ngayon. Pero hindi nga. Sinabi ni Hesus na iba. Matutulad tayo sa mga anghel sa pag-iral. Ang mundo rin ngayon ay nagsisikap na iguho ang paniniwala sa buhay na walang hanggan. Walang langit. Walang kaluluwa. Materyal na mundo lang talaga. Kaya magpakasarap na tayo ngayon. Sundin kung ano gusto mo. Huwag magpadikta sa kaninuman lalo na ang relihiyon. Magpakasaya tayo sa yamang materyal ng mundo, sa tawag ng laman, at iba pa dahil nga ang buhay ay dito lamang. Magaling mangumbinsi ang mundo pero sa totoo lang, mapagpanggap siya. Iniiwasan talaga niya ang isyu ng kamatayan. Hindi niya kayang harapin ang usapin ng wakas. Ayaw niya itong pag-usapan. Gusto niya itong takasan. Pero sino ang makakaiwas sa katotohanang ito?
Haharap tayong lahat sa isyu ng kamatayan. Sa gusto man natin o hindi haharapin natin ang isyu ng buhay na walang hanggan. Malalaman ng puso natin kung may naghihintay nga sa ating buhay na walang hanggan. Sa mga namuhay ng makamundo at makasarili, siguradong takot at pag-aalala ang naghihintay dahil alam niya hindi niya napaghandaan ang buhay na walang hanggan. Sa mga namuhay sa wagas na pag-ibig, ang kamatayan ay hindi isang banta. Sa puso niya alam niya na may susunod na baitang ng pag-iral at maghihintay siya hangga't ang mga mahal niya sa buhay ay makapiling niyang muli kasama ang Maykapal.
MANALANGIN:
Panginoon, ipabatid mo palagi sa akin na hindi ang mundong ito ang hantungan ng buhay. Maiwasan ko nawa ang magpasasa at magpakalunod sa buhay makamundo. Bagkus, maging tulay nawa ang buhay ko dito sa mundo para makatawid sa buhay na walang hanggan. Mapuno nawa lagi ng pag-ibig ang puso. Huwag kong hayaan na magkaroon ng sandali na ang puso ko ay salat o kaya'y naubusan ng wagas na pag-ibig.
No comments:
Post a Comment