LUKAS 21: 20-28
Ang Darating na Pagkawasak ng Jerusalem
20 "Kapag nakita ninyong napapaligiran na ng mga hukbo ang Jerusalem, tandaan ninyo, malapit na ang pagkawasak nito. 21 Ang mga nasa Judea ay dapat nang tumakas papunta sa kabundukan, ang mga nasa bayan ay dapat nang lumabas, at ang mga nasa bukid ay huwag nang pumasok sa bayan. 22 Sapagkat iyon ang mga araw ng pagpaparusa bilang katuparan ng mga sinasabi sa Kasulatan. 23 Kawawa ang mga nagdadalang-tao at ang mga nagpapasuso sa mga araw na iyon dahil magkakaroon ng malaking kapighatian sa lupaing ito bilang pagpaparusa ng Diyos sa bansang ito. 24 Mamamatay sila sa tabak, at ang iba'y dadalhing-bihag sa lahat ng bansa. Ang Jerusalem ay yuyurakan ng mga Hentil hanggang sa matapos ang panahong itinakda sa kanila."
Mga Tanda ng Pagbabalik ng Anak ng Tao
25 "Magkakaroon ng mga palatandaan sa araw, sa buwan, at sa mga bituin. Sa lupa, ang mga bansa ay masisindak at malilito dahil sa ugong at mga daluyong ng dagat. 26 Ang mga tao'y hihimatayin sa takot dahil sa pag-iisip sa mga kapahamakang darating sa sanlibutan sapagkat mayayanig ang mga kapangyarihan sa langit. 27 Sa panahong iyon, makikita nila ang Anak ng Taong dumarating na nasa alapaap, at may kapangyarihan at dakilang karangalan. 28 Kapag nagsimula nang mangyari ang mga ito, magalak kayo sapagkat malapit na ang inyong katubusan."
MAGNILAY:
Ang muling pagbabalik ni Hesus ay parehong maganda at masamang balita depende sa kalagayan mo ngayon.
Magandang balita ito sa lahat ng nagsisikap isabuhay ang pananampalataya. Taliwas sa nakagawiang reaksyon kapag pinag-uusapan ang wakas ng panahon, ang muling pagbabalik ng Panginoon ay araw ng pagtubos at paggawad ng gantimpala sa mga naging karapat-dapat sa kaharian ng Diyos. Kaya't ang abi ng Panginoon ay magalak hindi matakot. Ito'y araw ng kaligtasan. Ito ay araw ng pagwawakas sa lahat ng hirap at pagsubok. Ito ay araw ng tagumpay. Mabulaklak at simboliko ang paglalarawan ng wakas ng panahon pero isa lang ang mensahe nito sa mga tapat sa Diyos - huwag mag-alala! Bagkus, ikasiya at ikagalak ang kanyang pagdating muli. Ito ay katuparan ng ating inaasahan mula sa Diyos.
Sa kabilang banda, ito'y masamang balita sa mga nag-abuso sa kanilang kalayaang mamili ng tama at mali. masamang balita ito sa mga tumalikod sa landas na ipinakita ng Panginoon. Araw ito ng pagsusulit. Araw ito ng paghuhukom. Araw ito ng pagbabayad-puri. Araw ito na gugulatin ang mga nagtaksil sa Panginoon na araw na ng paniningil. Tapos na ang maliligayang araw nila. Matapos ibigay ang lahat ng pagkakataong manumbalik sa Diyos at tanggihan ito, araw na ngayon ng katarungan ng Diyos. Pananagutan natin bawa't ginawa natin mabuti man o masama. Araw ito ng pagsisisi pero huli na. Magsisisi ang marami hindi dahil gustong magbago kundi dahil may parusang kakaharapin. ang araw na ito ay pagwawakas sa lahat ng uri ng kasalanan.
Inaanyayahan tayo ng pagninilay natin na laging maging handa sa paghuhukom ng Diyos. Nais ng Diyos na maging responsable tayo sa lahat ng ipinagkaloob niya sa atin. Binigyan niya tayo ng pananagutan para matuto tayong magdesisyon para sa kanya. Haharap at haharap tayo sa paghuhukom ng Diyos.
Kahit dito pa lang sa lupa, nararanasan natin ang managot sa lahat ng ating ginagawa. Ang mga bunga ng ating mga desisyon ay nalalasap natin. Ang mga naging mabuti ang pagdedesisyon ay nagtatamasa ng magandang bunga. Ang mga nagdesisyon ng mali ay nagdurusa sa masamang bunga nito. Simple lang naman ang prinsipyo ng paghuhukom ng Diyos: Kung ano ang iyong tinanim ay siya mong aanihin.
Sa muling pagbabalik ng Panginoon, haharap tayo sa pinakahuling paghuhukom. Mapalad ang nagtiyagang manatili sa tama at totoo. Sa pagdating ni Hesus, taas-noo silang titingala sa kanya ng may kumpiyansa at kagalakan. Sasalubungin nila ang Panginoon at sila'y sasalubungin din niya upang ipisan sa kanyang kaharian.
MANALANGIN:
Panginoon, turuan mo akong magtiyaga at magsikap na isabuhay ang pananampalataya. Lagi nawa akong maging handa anumang oras na harapin ko ang iyong paghuhukom. Ikagalak ko nawa ang iyong pagdating sapagka't araw ito ng aking kaligtasan.
No comments:
Post a Comment