LUKAS 17: 26-37
26 Ang pagparito ng Anak ng Tao ay matutulad sa nangyari noong kapanahunan ni Noe. 27 Ang mga tao noo'y nagsisikain, nagsisiinom at nagsisipag-asawa hanggang sa araw na sumakay si Noe sa barko. Dumating ang baha at namatay silang lahat. 28 Gayundin ang nangyari noong panahon ni Lot. Ang mga tao'y nagsisikain, nagsisiinom, bumibili, nagtitinda, nagtatanim at nagtatayo ng bahay. 29 Ngunit nang araw na umalis si Lot sa Sodoma, umulan ng apoy at asupre at natupok silang lahat. 30 Ganoon din ang mangyayari sa pagdating ng Anak ng Tao.
31 "Sa araw na iyon, ang nasa bubungan ay huwag nang bumaba pa upang kunin ang kanyang mga kasangkapan sa loob ng bahay, at ang nasa bukid ay huwag nang umuwi pa. 32 Alalahanin ninyo ang nangyari sa asawa ni Lot. 33 Ang sinumang magsikap na iligtas ang kanyang buhay ay mawawalan nito, ngunit ang sinumang mawalan ng kanyang buhay ay siyang makakapagligtas nito. 34 Sinasabi ko sa inyo, sa gabing iyon, may dalawang taong nasa isang higaan; kukunin ang isa at iiwan ang isa. 35-36 May dalawang babaing magkasamang nagtatrabaho sa gilingan; kukunin ang isa at iiwan ang isa."
37 "Saan po, Panginoon?" tanong ng kanyang mga alagad.
Sumagot siya, "Kung saan may bangkay, doon nagkakatipon ang mga buwitre."
MAGNILAY:
Madalas tayong masorpresa ng mga bagay-bagay sa buhay natin. Hindi kasi natin inaasahan ang mga pangyayari. Hindi natin inaasahan ang mga ito. Kahapon lang masaya tayo, ngayon ay may problema na. Noong isang araw kasa-kasama lang natin, ngayon ay isang malamig na bangkay na. Kelan lang maliliit pa ang mga bata at konti pa ang gastusin, nagyon ay malalaki na at mas malaki na rin ang mga pangangailangan. Dati-rati ang lakas-lakas pa ng katawan natin, bigla-bigla nagigising na lang tayo na matanda na pala tayo at mahina-hina na. At marami pang mga pagbabago, di-inaasahan at mga sorpresa ng buhay. Kapag hindi mo pinaghandaan ang mga ito, patay kang bata ka!
Ganito darating ang kaharian ng Diyos. Isang sorpresa para sa mga hindi handa. Bigla-bigla para sa mga nagpabaya at nagpakasaya sa mundo. Kagulat-gulat para sa mga nagpabandying-bandying sa buhay. Darating ang kaharian ng Diyos ng walang babala. Maghahabol ang mga naiiwanan. Magmamadali ang mga babagal-bagal. Matataranta ang mga hindi ito inasahan. Pag dumating ang kaharian ng Diyos, sigurado ito. Ibababa agad ang hatol ng Diyos. At mabilis, simbilis ng pagdating ng mga buwitre sa paligid ng bangkay. Walang makakatakas sa hatol ng Diyos.
Araw-araw maghanda tayo para hindi tayo masorpresa. Araw-araw ay gawin nating pinakamagaling na araw natin kung saan sinisikap nating gawin ang pinakamabuting magagawa natin. Kung may dapat tayong gawin, huwag ng ipagpaliban kung magagawa naman ngayon. Sikapin natin na nasa Panginoon lagi tayo. Kung may kasamaan ng loob, gumawa agad ng paraan para magkasundo. Maikli ang buhay. Wala tayong mahihita sa pagkimkim ng sama ng loob. Baka mas lalo pa nitong paikliin ang maikli na ngang buhay. Tapos puro pa sama ng loob. Pag may pagkakataong dumarating sunggaban agad. Bukas baka wala na siya. Alagaan ang katawan. Huwag magpakasasa sa bisyo at maruming buhay. Hindi ka lagi malakas. Pag umatake ang sakit, kawawa naman ang mga mahal mo sa buhay. Manatiling malusog para sa kanila. Mamuhay lang ng sapat, simple at masaya. Aaanuhin mo ang sobrang malaking kabuhayan kung mapapabayaan mo naman ang mga relasyon mo at espiritwalidad. Huwag magpakalunod sa pera. Nakakaadik yan. At pagnaadik ka na, lahat na lang puro pera. Hindi ka liligaya. Paghandaan ang pagdating ng krisis. Minsan dapat siyang dumating para may matutunan tayo. Pero iba kapag handa ka. Mas maliit ang probabilidad na matutumba ka. Mag-ipon ng lakas at kabutiohang-loob para pag dumating ang tagtuyot ng kaluluwa o bagyo sa buhay may reserba tayong lakas na tutulong sa ating tumawid ng ligtas.
Magdasal palagi. Ito ang pinakamainam na paghahanda. Kapag nalalayo sa Diyos, makipagkasundo agad sa kanya. Huwag patagalin ang pagiging malayo sa Diyos. Lumapit ka sa kanya dahil hindi ka naman niya nilayuan. Ikaw ang lumayo sa kanya. Kapag nasa Diyos tayo magiging panatag tayo kahit hindi natin masagot ang maraming misteryo ng buhay. Sagot niya ang mga pag-aalinlangan natin. Laging maging kasundo ang Diyos.
Maging handa sa pagdating ng kaharian ng Diyos. Kung handa tayo, matutuwa tayo na dumating siya. Hindi siya yung kakatakutan natin. Siya yung inaasahan talaga natin!
MANALANGIN:
Panginoon, ipaunawa mo sa akin ang kaiklian ng buhay upang maging matalino ako sa mga desisyon ko sa buhay. Tulungan mo akong maging handa palagi lalo sa pagdating ng iyong paghuhukom at paghahari.
No comments:
Post a Comment