LUKAS 18:35-46
Pinagaling ang Lalaking Bulag
35 Nang malapit na si Jesus sa Jerico; may isang lalaking bulag na nakaupo sa tabi ng daan at nagpapalimos. 36 Nang marinig niyang nagdaraan ang maraming tao, itinanong niya kung ano ang nangyayari.
37 "Nagdaraan si Jesus na taga-Nazaret," sabi nila sa kanya.
38 At siya'y sumigaw, "Jesus, Anak ni David! Mahabag po kayo sa akin!" 39 Pinapatigil siya ng mga taong nasa unahan, ngunit lalo pa niyang nilakasan ang pagsigaw, "Anak ni David, mahabag po kayo sa akin!"
40 Tumigil si Jesus at ipinatawag ang bulag. Paglapit ng bulag ay tinanong siya ni Jesus, 41 "Ano ang gusto mong gawin ko para sa iyo?" "Panginoon, gusto ko po sanang makakitang muli," sagot niya.
42 At sinabi ni Jesus, "Mangyayari ang nais mo! Pinagaling ka ng iyong pananampalataya."
43 Noon di'y nakakita ang bulag at sumunod kay Jesus na nagpuri sa Diyos. Nang makita ito ng mga tao, silang lahat ay nagpuri sa Diyos.
MAGNILAY:
Isipin mong nasa loob ka ng isang silid-dasalan at nag-iisa. Biglang nagpakita sa iyo ang Panginoon at nagtanong: "Ano ang gusto mong gawin ko para sa iyo?" Ano kaya ang isasagot mo sa kanya?
Parang pang-recollection sa high school ang pagtatanong na ito. Pero hindi. Kung susuriing mabuti, ang sagot natin sa tanong na ito ay magpapakilala kung ano at sino tayo bilang mga Kristiyano. Magbubunyag ito ng antas at maturidad ng ating pananampalataya at panalangin. Ano nga kaya sa seryosong pagninilay ang sasabihin ko sa Panginoon? Ano ang hihilingin kong gagawin niya sa akin?
Sa laki ng tatamaan sa lotto ngayon, hindi ako magtataka kung may sasagot ng "Panginoon, patamain mo ako sa lotto!" Pero sa seryosong pagninilay, ganoon kahalaga ang tanong na ito. Alam ba talaga natin kung ano ang pangangailangan natin bilang mga tagasunod ng Panginoon? Gaano kalawak ang kaalaman natin tungkol sa kung ano ang makakabuti sa atin? Kinikilatis at pinag-aaralan ba natin kung ano ang hihingin sa Panginoon?
Panginoon, gusto ko po sanang makakitang muli! Ito ang sagot ng bulag na tinanong ni Hesus. Makakitang muli! Sa unang pandinig parang pisikal lang na kagalingan ang hiling ng bulag. Ito ang pinaka-natural at lohikal na sagot. Bulag siya kaya naturalmente ang makakita ang hihilingin niya. Magugulat tayo kapag humiling siya ng iba kaysa dito. Pero kahit papaano masasabi nating alam niya talaga ang kailangan niya. Walang kaabog-abog ang sagot niya. Tiyak at walang alinlangan ang tugon niya. Gayunapaman, ang hiling niyang makakita muli ay higit sa pisikal na pangangailangan. Ang kuwentong ito ay kuwento ng pananampalataya. Ang pagkabulag dito ay tumutukoy sa espiritwal na pagkabulag. Ang binabanggit dito ay ang kawalan ng kakayanang makita ang liwanag na pinapahayag ng Diyos. Bulag ka kapag wala kang makitang mabuti sa kapwa at kapaligiran mo. Bulag ka kapag pangit at negatibo lagi ang tingin mo sa mga nangyayari sa buhay mo. Bulag ka kung hindi ka makadama ni katiting na pag-asa sa buhay dahil sa tindi ng mga pagsubok. Bulag ka kung akala mo pinabayaan ka na ng Diyos at walang nagmamahal sa iyo. Ito marahil ang karanasan ng bulag. Kaya't ang hiling niya sa pagdaan ni Hesus ay makakita siyang muli. Siguro dati ay nakakakita siya pero binulag siya ng mga sirkumstansya ng buhay niya. Kay Hesus na liwanag ng sanlibutan, inaasahan niyang makakikitang muli. Kung susuriing mabuti, bago pa man niya maipahayag kay Hesus ang kanyang hiling na makakita, nakakita na talaga siya. Sa mismong pagkakilala niya sa tunay niyang pangangailangan, ibig sabihin, nagsimula ng makita niya ang daan tungo sa pagsunod sa Panginoon. Ganoon kalahaga ang alam natin kung ano ang hihingin natin. Nakasalalay dito kung talagang nakakakita tayo. Ang dulo ng kuwento ng bulag ay sumunod siya kay Hesus. Nakita niya ang landas muli para makabalik sa Diyos.
Ano ang hihingin natin kay Hesus? Ito ba ay may kinalaman sa pagsunod natin sa kanya? Makakatulong ba ang hinihingi natin para mas maging mabuti tayong Kristiyano? Magbibigay-daan ba ang hinihingi natin para makakita tayong muli?
Isang seryosong tanong uli: ANO BA TALAGA ANG HNIHINGI MO SA PANGINOON?
MANALANGIN:
Panginoon, tulungan mo akong makita kung ano ang dapat kong hilingin sa iyo. Gabayan mo ako sa aking panalangin. Dalisayin mo ang mga gusto ng puso ko. Nawa makita ko na ang tunay kong kailangan ay yaong makakatulong upang lalo akong manatili sa landas na itinakda mo upang ako'y makarating sa aking kaligtasan.
No comments:
Post a Comment