LUKAS 19: 45-48
Si Jesus sa Templo
45 Pumasok si Jesus sa Templo at kanyang ipinagtabuyan ang mga nagtitinda roon. 46 Sinabi niya sa kanila, "Nasusulat, 'Ang aking bahay ay tatawaging bahay-dalanginan.' Ngunit ginawa ninyo itong lungga ng mga magnanakaw."
47 Araw-araw, si Jesus ay nagtuturo sa loob ng Templo. Pinagsisikapan siyang ipapatay ng mga punong pari, mga tagapagturo ng Kautusan at mga pinuno ng bayan. 48 Subalit wala silang makitang paraan upang maisagawa ito dahil taimtim na nakikinig sa kanya ang buong bayan.
MAGNILAY:
Sino ang hindi magagalit kapag ang simbahan ay lapastanganin? Naalala ko noong kabataan namin sa parokya kung paaano nagalit ang aming kura paroko dahil idinaos namin ang proyekto naming Modern Dance Contest sa loob ng aming simbahan dahil wala pa kami noong malaking lugar para sa ganoong klaseng aktibidades. Sa kalagitnaan kasi ng pagsasayaw ng mga grupong sumali, halos magwala ang mga manonood at nagtayuan sa mga pews ng simbahan. Nagmistulang perya talaga ang simbahan kaya't nagdesisyon ang pari na itigil ang programa. Nadismaya siyempre ang mga contestants dahil naghanda sila. Naging malaking usapin ang nangyari sa buong parokya. Nababoy kasi ang dapat ay lugar ng panalangin. Alam natin kung paaano natin respetuhin ang simbahan.
Mauunawaan din natin ang galit ni Hesus sa mga nagtitinda sa Templo. Hindi lang nila ginawang palengke ito; ginawa rin nila itong lugar ng pandaraya. Isang kalapastanganan sa Tahanan ng Diyos ang ganitong sitwasyon. Ang Templo ay sagrado para sa mga Hudyo. Sagisag ito ng kanilang pagkakaisa sa Diyos. Ito ay itinuturing na pinananahanan ng Diyos. Maging si Hesus bilang Hudyo ay dedikado sa pagpunta sa Templo ng kanyang Amang Diyos upang manalangin. Ang paglapastangan sa Templo ay paglapastangan sa Diyos.
Nguni't sa Bagong Tipan, ang Templo ay nagkaroon ng panibagong realidad. Kung noon, ang Templo ay ang matayog na gusali na itinayo noong panahon pa ni Solomon at muling itinayo at pinaganda ng iba't-ibang mga naging lider ng Israel, ang Templo ngayon ay hindi na gusali o gawa sa bato. Ang Templo ay naging tao sa katauhan ni Hesus. Kay Hesus nananahan ang Ama. Sa pamamagitan niya, nakita natin ang Ama, nakasalamuha, at nakausap. Maaalala natin na sinabi ni Hesus sa mga Hudyo na iguho nila ang Templo at sa ikatlong araw ay muli niyang iatatayo (Jn. 2:19-21). Akala ng mga Hudyo ay ang gusaling Templo ang tinutukoy ni Hesus. Hindi pala sapagka't ang Templong kanyang tinutukloy ay ang kanyang katawan na muling mabubuhay sa ikatlong araw matapos siyang mamatay sa krus.
Ang Templo ay hindi lang si Hesus mismo kundi ang kanyang katawang mistiko - ang Simbahan. Bawa't-isa sa atin ay templo ng Espiritu Santo. Sa Bagong Tipan, ang Templo ay ang mga nanampalataya na bumubuo ng isang komunidad. Buhay ang Templo, hindi mga walang-buhay na bato lamang.
Kung pagninilayan natin ng mas malalim ang paglapastangan sa Templo, hindi na lang ito ang gusaling simbahan na minsan ay hindi natin narerespeto dahil sa mga ilang hindi karapat-dapat na gawain. Ang paglapastangan sa Templo ay nangyayari sa mismong paglapastangan sa mga tao na pinili ng Panginoon na kanyang maging tahanan. Ilang mga tao ang inalisan ng dangal dahil mistula silang mga paninda kung ibenta para bigyang-aliw ang mga mapagsamantala? Ang pagbebenta sa mga babae, mga lalake at mga mga bata para sa prostitusyon ay malaking kalapastanganan sa Templo ng Diyos. Ang pang-aalipin sa pamamagitan ng korupsyon, panloloko at pagnanakaw ay isa ring malaking paglapastangan sa Templo ng Diyos lalo na ang mga mahihirap at mahihina sa lipunan. Mismong tayo ay lumalapastangan sa Templo ng Diyos ng sarili nating katawan. Bisyo, pag-abuso sa katawan at sarili, mahahalay na gawain, at iba pa ay uri ng kawalang-respeto sa tahanan ng Diyos na tayo.
Pagrespeto sa Templo ng Diyos. Isa lang ang kahulugan nito - irespeto mo ang iyong sarili at ang iyong kapwa. nakatira sa iyo ang Diyos. Nakatira rin siya sa kapwa mo.
MANALANGIN:
Panginoon, makita nawa kita sa aking kapwa. Mahalin nawa kita na nananahan sa kanila. Paglingkuran nawa kita sa aking kapwang naghihirap, nangungulila, naghahanap ng kalinga't pagmamahal. Sa ganitong paraan ay napapapurihan kita sa iyong banal na Templo.
No comments:
Post a Comment