MAGANDANG BALITA NGAYON - MIYERKULES NG IKA-32 LINGGO SA KARANIWANG PANAHON (Nob. 10)
by Rey An Yatco on Wednesday, November 10, 2010 at 5:15am
LUKAS 17: 11-19
Pinagaling ang Sampung Ketongin
11 Sa paglalakbay ni Jesus papuntang Jerusalem, nagdaan siya sa hangganan ng Samaria at Galilea. 12 Nang papasok na siya sa isang nayon, sinalubong siya ng sampung ketongin. Tumigil ang mga ito sa may kalayuan 13 at sumigaw, "Jesus! Panginoon! Mahabag po kayo sa amin!"
14 Pagkakita sa kanila ay sinabi ni Jesus, "Lumakad na kayo at magpatingin sa mga pari."
Habang sila'y naglalakad, silang lahat ay gumaling at luminis. 15 Nang mapuna ng isa na siya'y magaling na, nagbalik siyang sumisigaw ng pagpupuri sa Diyos. 16 Nagpatirapa siya sa paanan ni Jesus at nagpasalamat. Ang taong ito'y isang Samaritano.
17 "Hindi ba't sampu ang aking pinagaling at nilinis?" tanong ni Jesus. "Nasaan ang siyam? 18 Wala bang nagbalik upang magpuri sa Diyos kundi ang dayuhang ito?" 19 Sinabi ni Jesus sa kanya, "Tumayo ka na at umuwi. Pinagaling ka ng iyong pananampalataya."
MAGNILAY:
Masakit siyempre na matapos mong pagmalasakitan at pagkalooban ng iyong panahon at pagtulong hindi ka man lamang naalala at pasalamatan.
Hindi miminsan na kahit tayo ay napipilitang lumapit kung kani-kanino sa oras ng matinding pangangailangan. Nariyang mangutang tayo. Halos magpalimos tayo. Kung anu-anong pakiusap ang ating ginagawa. Pakapalan na ng mukha para makuha natin ang ating talagang kailangan. Meron talagang walang pakialam sa pakiusap natin. Meron di pumapansin. Merong nagtatago at ayaw mahingan ng tulong. Merong atubili sa pagtulong. Pero meron din naman talagang may mabuting kalooban na kahit gipit ay tutulong kahit kaunti, kahit hindi buo. Kaya lang minsan, magaling tayong manghingi pero kapag nakahingi na, nakakalimot na. Hindi na nakapagpasalamat ng mabuti, hindi pa marunong umako ng responsibilidad para masuklian ang kabutihang natanggap mula sa iba. Minsan, pag nakautang tayo, tayo naman ang nagtatago kasi ayaw naman nating magbayad. Wala na tayong pakialam sa pangako nating magbayad. Napakaraming pagkakataon na ang hangad lang natin ay makakuha. Pag nakuha na, diyan ka na! Isang tanda na minsan kung di mana palagi ay sarili lang ang iniisip natin. Pagiging makasarili ang ugat ng kawalang utang na loob, kawalan ng kakayahang magpasalamat.
Sa sampung ketongin na pinagaling ni Hesus, hinangad niya na sana lahat ay natutong magpasalamat sa Diyos. Hangad niya na sana nakita nilang lahat ang pagmamalasakit ng Diyos sa kanila. Hangad niya na sana mauwi sa magandang relasyon sa Diyos ang pagpapagaling sa kanila. Pero sarili lang ang iniisip ng nakakarami. Ang layunin nila ay makakuha lamang. Pag nakuha na, diyan ka na! Iisa, banyaga pa, ang nakaunawa ng rebelasyon ng Diyos. Iisa ang nilimot ang sarili para balikan ang sanhi ng kagalingan at pasalamatan. Iisa ang nakakita sa malasakit ng Diyos.
Gayunpaman, hindi titigil si Hesus sa kanyang malasakit sa iba. Marunong o di marunong magpasalamat, gagawin pa rin ni Hesus sa atin ang mabuti para sa atin. Walang makakpigil sa kanya sa paggawa ng tama at mabuti. Ito rin ang hamon ni Hesus sa atin. Merong mga taong walang utang na loob pero huwag sana silang maging dahilan upamng huwag nating gawin ang tama at mabuti. Tumulong sa iba dahil ito ang kalooban ng Diyos. Kung di man tayo mapasalamatan ngayon, baka bukas, baka sa susunod na panahon, baka kung kailanaman. Masaya na tayong nakatulong kahit hindi masuklian ng pasasalamat.
MANALANGIN:
Panginoon, turuan mo akong tumanaw ng utang na loob at magpasalamat sa lahat ng iyong kabutihang ipinapamalas sa akin. Huwag sana akong malunod sa aking sarili lamang. Matuto rin akong kilalanin ang kabutihan ng aking kapwa. Gayundin, huwag sana akong tumigil sa pagtulong sa iba kahit hindi ako napapasalamatan. Walang dapat maging dahilan para hindi ko gawin ang iyong kalooban na kami ay magmahal ng kapwa. Masaya na na ako'y nagmahal kahit walang kapalit.
No comments:
Post a Comment