LUKAS 21: 29-33
Ang Aral Mula sa Puno ng Igos
29 At sinabi sa kanila ni Jesus ang isang talinhaga, "Tingnan ninyo ang puno ng igos at iba pang punongkahoy. 30 Kapag nagkakadahon na ito, alam ninyong malapit na ang tag-araw. 31 Gayundin naman, kapag nakita ninyong nangyayari na ang mga sinabi ko, malalaman ninyong malapit na ang paghahari ng Diyos. 32 Tandaan ninyo: magaganap ang lahat ng ito bago mamatay ang lahat ng taong nabubuhay sa salinlahing ito. 33 Lilipas ang langit at ang lupa, ngunit ang aking mga salita ay mananatili magpakailanman."
MAGNILAY:
May kaibahan ang obserbasyon sa persepsyon. Ang obserbasyon ay patungkol sa nakikita, naririnig, nahihipo, naaamoy, at nalalasahan. Ang persepsyon ay sa interpretasyon ng naoobserbahan. Ang obserbasyon ay panlabas na kilos. Ang persepsyon ay sa kalooban ng tao nagaganap - sa kanyang isip at puso.
Ito ang tinutukoy ni Hesus sa Ebanghelyo - ang persepsyon. Nais niya na matuto tayong interpretahin ang mga bagay-bagay na nangyayari sa paligid dahil nagsasalita ang Diyos sa mga ito. Nais niya na matutunan nating basahin ang kanyang mga babala sa kapaligiran. Huwag lang tayong tumingin, o makinig, o makiramdam. Matuto rin tayong bumasa sa ating nakikita, umunawa sa ating naririnig, at umintindi sa ating nararamdaman.
Tinutukoy ni Hesus ang wakas ng panahon na magaganap sa kanyang muling pagbabalik. Nais niya na maramdaman natin ang pangangailangang maging handa sa pagdating nito. Walang ibang paraan ng paghahanda maliban sa pagtupad ng kanyang kalooban. Kaya sana ay malaman din natin kung natutupad nga o hindi ang kanyang kalooban sa nangyayari sa paligid natin.
Kapag nakakakita tayo ng karukhaan, maunawaan nawa natin na hindi ito ang kalooban ng Diyos. Kapag ang pandaraya ay nagiging normal na patakaran na ng araw-araw nating buhay, hindi ito ang nais ng Diyos. Kapag nagkokompetensya na tayo hangga't wasakin natin ang dangal at kinabukasan ng iba, hindi ito ang plano ng Diyos. Kapag nalululong na tayo sa kamunduhan at materyalismo, maging babala ito na papalayo ng papalayo na tayo sa disensyo ng Diyos para sa atin. Bago mahuli ang lahat, kumilos na tayo. May wakas ang lahat. May hangganan ang lahat. Bago dumating ang oras na iyon, magawa na natin ang dapat na gampanang pagbabago.
MANALANGIN:
Panginoon, tulungan mo akong hasain ang aking persepsyon sa mga nangyayari sa aking paligid. Martuto nawa akong bumasa sa kilos mo sa mga nangyayari sa kapaligiran. Makatulong nawa ako upang maging handa ang lahat sa iyong hatol. Sa wakas ng panahon,lahat nawa kami ay makasama sa iyong kaharian.
No comments:
Post a Comment