LUKAS 23: 35-43
35 Ang mga tao nama'y nakatayo roon at nanonood, habang si Jesus ay kinukutya ng mga pinuno ng bayan. Sinabi nila, "Iniligtas niya ang iba; iligtas niya ngayon ang kanyang sarili kung siya nga ang Cristo na hinirang ng Diyos!"
36 Nilait din siya ng mga kawal. Nilapitan siya ng isa at inalok ng maasim na alak, 37 kasabay ng ganitong panunuya, "Kung ikaw nga ang Hari ng mga Judio, iligtas mo ang iyong sarili."
38 Isinulat nila sa kanyang ulunan, "Ito ang Hari ng mga Judio."
39 Tinuya rin siya ng isa sa mga salaring nakapako sa tabi niya, "Hindi ba ikaw ang Cristo? Iligtas mo ang iyong sarili at pati na rin kami."
40 Ngunit pinagsabihan naman ito ng kanyang kasama, "Wala ka na bang takot sa Diyos? Ikaw ay pinaparusahan ding tulad niya! 41 Tama lamang na tayo'y parusahan nang ganito dahil sa ating mga ginawa; ngunit ang taong ito'y walang ginawang masama." 42 At sinabi pa nito, "Jesus, alalahanin mo ako kapag naghahari ka na."
43 Sumagot si Jesus, "Sinasabi ko sa iyo, isasama kita ngayon sa Paraiso."
MAGNILAY:
Ngayon ay pinararangalan natin ang Panginoong Hesus bilang Hari - Haring nakapako sa krus!
Kadalasan ang mga larawan at imahen ng Kristong Hari ay naglalarawan sa kanya bilang haring nakadamit ng maharlika - may koronang ginto, marilag na kasuotan, nakaluklok sa trono. Sa madali't sabi, nararamtan siya tulad ng mga karaniwang hari sa mundo. Siyempre, ang ganitong paglalarawan ay simbolo na nagpapapakita na siya ang makapangyarihang Hari at Diyos. Hindi natin kayang ilarawan ang kaluwalhatian niya bilang Diyos at Hari kundi sa pamamagitan ng makataong konsepto at karanasan. Kaya kung ano ang konsepto at karanasan natin ng kung ano ang hari ay ginagamit natin upang ipatungkol sa kanya. Pero sana maging maingat tayo. Ginagamit natin ang konsepto ng hari sa mundo sa kanya pero hindi talaga siya ganoon nung siya ay nabuhay sa mundo.
Ito ang dahilan kaya nilalarawan si Hesus ngayon sa Ebanghelyo bilang haring ipinako sa krus dahil yun talaga siya. Kailanman hindi siya pinutungan ng korona maliban sa koronang tinik. Kailanman hindi siya dinamtan ng maharlikang kasuotan maliban sa balabal na purpura na idinamit sa kanya noong siya'y nililitis at kinukutya. At noong ipinako siya sa krus, isang saplot - o baka wala pa nga - ang natira sa kanyang kasuotan. Kailnaman hindi siya lumuklok sa trono maliban sa krus na pinagpakuan sa kanya kung saan kinilala siya na Hari ng mga Hudyo. Oo, ito ang aktwal na nangyari sa Panginoon. Sa panahong nagpapakilala siya bilang hari at ang maraming tao ay tutol sa kanyang pagpapahayag, ipinakita niya kung ano ang kaya niyang gawin bilang hari - ang magsakripisyo kahit ibigay ang kanyang buhay para sa kaligtasan ng lahat. Sa krus, ipinamalas niya ang kadakilaan ng kanyang pag-ibig at awa sa pamamagitan ng pagpapatawad sa nagkasalang magnanakaw. Oo, ang Panginoong Hesus ay hari pero haring ipinako sa krus! At ito ay huwag na huwag nating kalilimutan o kakaligtaan sa pagpaparangal natin sa kanya.
Mahalaga ang pagdiriwang natin ngayon para mapagnilayan ang pagkahari ng Panginoon na siyang tinutularan natin. Marami sa atin ang nag-aasam maging hari at naghahari-harian na. Napalakas ng kompetensya sa mundo kaya't lahat gagawin maunahan lang ang lahat. Lahat ng paraan gagamitin kahit masama mahila lang ang iba pababa para makaakyat ang sarili. Gusto natin sa itaas. Doon makakautos tayo. Doon titingalain tayo. Doon mamamayagpag tayo. Doon pararangalan tayo. Doon mabubusog tayo. Doon sasambahin tayo.
Kabaligtaran ang pagkahari ni Hesus. Siya ang hari ng pagpapakumbaba, ng awa at habag, ng tunay na paglimot sa sarili at paglilingkod - siya ay hari ng tunay na pag-ibig. Ang kadakilaan sa kanya ay ang magsilbi sa kapwa. Ang kabusugan sa kanya ay ang magutom para makakain ang iba. Ang karangalan sa kanya ay ang kutyain alangalang sa katotohanan. Ang katanyagan sa kanya ay ang maging alipin ng lahat. Isang radikal na pagkahari ang ipinakilala ng Panginoon na hahamon sa makasariling uri ng pagkahari na namamayani ngayon sa mundo.
Nngayon, maraming ritwal at seremonya sa pagpaparangal sa Kristong Hari. Yung iba, pabonggahan. Gagastos ng ubod laki maging bonggang-bongga lang ang selebrasyon. Sangkatutak na bulaklak, ilaw, at may paputok at kwitis pa. Maraming gutom, hikahos, api at ligaw. Sa kanila naging hari si Hesus. Kung gusto mong parangalan ang Kristong Hari, parangalan mo siya sa kanila. Hinihintay ka nila upang maging bagong haring handang ipako sa krus ng pag-ibig at tunay na paglilingkod.
MANALANGIN:
Panginoong Hesus, tulungan mo akong pagnilayan ang tunay mong pagkahari. Huwag ko sanang kalimutan ang mga sagisag ng iyong pagkahari - koronang tinik, kapirasong saplot, kahoy ng krus. Maunawaan ko nawa na ang pinakatumpak na larawan mo bilang hari ay yaong nakapako ka sa krus. Ito ang larawan ng kung ano ka naging bilang hari - lingkod ng sangkatauhan. Turuan mong masundan ko ang iyong yapak. Sa gitna ng paghahangad na maging mataas sa mundong ito, magsilbi nawa akong huwaran ng kapakumbabaan.
No comments:
Post a Comment