MAGANDANG BALITA NGAYON - MIYERKULES NG IKA-34 NA LINGGO SA KARANIWANG PANAHON (Nob. 24)
by Fr. Rey Anthony Yatco on Wednesday, November 24, 2010 at 5:41am
LUKAS 21: 12-19
12 "Ngunit bago mangyari ang lahat ng ito, kayo'y dadakpin at uusigin. Kayo'y lilitisin sa mga sinagoga at ipabibilanggo. At dahil sa pagsunod ninyo sa akin, isasakdal kayo sa harap ng mga hari at mga gobernador. 13 Iyon ang pagkakataon ninyo upang makapagpatotoo tungkol sa akin. 14 Ipanatag ninyo ang inyong kalooban at huwag kayong mabahala kung paano ninyo ipagtatanggol ang inyong sarili, 15 sapagkat bibigyan ko kayo ng katalinuhan at ng pananalitang hindi kayang tutulan o pabulaanan ng sinuman sa inyong mga kaaway. 16 Ipagkakanulo kayo ng inyong mga magulang, mga kapatid, mga kamag-anak at mga kaibigan; at ipapapatay nila ang ilan sa inyo. 17 Kapopootan kayo ng lahat dahil sa pagsunod sa akin, 18 ngunit hindi kayo malalagasan kahit isang hibla ng buhok. 19 Sa inyong pagtitiis ay maililigtas ninyo ang inyong buhay."
MAGNILAY:
Hindi makatotohanan na ipagdasal na alisin sana ng Panginoon ang mga pagsubok sa buhay. Kakambal na ng buhay-kristiyano ang pagsubok. Hinding-hindi mawawala ito sa ating buhay. Mahalagang sangkap ito ng ating buhay. Mabibigo lang tayo kapag pilit nating ipagdadasal na alisin ito. Ang dapat na dasal natin ay malampasan natin ang mga ito. Ang dapat nating ipanalangin ay makayanan nating pasanin ang mga ito. Ang dapat nating hilingin ay lakas at tiyaga para mapagwagian ang mga ito. Sa madali't-sabi, gawin nating positibo ang pagtrato sa mga ito imbes na negatibo. Ituring natin ang mga ito na biyaya imbes na kamalasan gaano mang kahirap harapin ang mga ito. Hindi lahat ng biyaya ay sa madaling paraan natatanggap. May mga biyaya na natatamo sa pamamagitan ng pagtitiyaga at ang mga pagsubok ay isa sa mga ito. Wala tayong pagpipilian. Laging nariyan ang pagsubok. Ang tangging pagpipilian natin ay kung paano natin ito haharapin.
Tulad ng maraming kakayanan at karunungan, ang lakas at tapang natin bilang mga kristiyano ay nanggagaling sa mga karanasan natin ng pagsubok. Kahit sa unang tingin ay parang problema ang mga pagsubok pero ito ang nagtuturo sa atin ng katatagan. Ang taong dumaan sa maraming pagsubok ay nahahasa ang kakayanang lumaban sa marami pang hamon ng buhay. Kaya nga pagsubok ang tawag. Nagiging subok na tayo sa larangan ng katatagan. Isang paraan para gumaan ang mga pagsubok ay itrato ito bilang pagkakataon na matuto. Nag-aaral tayo kung paano harapin ang buhay. Kapag alam nating may matututunan tayo, magkakaroon tayo ng magandang motibasyon na harapin talaga ang mga ito sa isang positibong disposisyon. Hindi ko naman sinasabi na madali ito. Mahihirapan tayo. Masasaktan tayo. Susubukin kung hanggang saan ang makakayanan natin. Hindi ba ganito rin kapag nag-aaral tayo? Walang pagkatuto ang hindi dumaan sa butas ng karayom. Lahat ng natuto ay nahirapan, nasaktan, nagtiyaga at lumaban.
Ang mga pagsubok din ay pagkakataong sukatin ang pagtitiwala natin sa Diyos. Gaano ba talaga tayo naniniwala at nagtitiwala sa kanya. Kung sabihin niyang hindi niya tayo pababayaan, naniniwala ba talaga tayo at nagtitiwala sa kanyang salita? Ganito rin sa dalawang nagmamahalan halimbawa ng mag-asawa. Ang pundasyon ng kanilang relasyon ay tiwala. At ang tiwalang ito ay dapat subukin upang lalong lumalim at lumawak. Sa Diyos ay ganoon din. Ang tiwala ay dapat hindi sa salita lamang o isip. Dapat itong mapatunayan sa karanasan. At walang ibang paraan para mapatunayan ito, lumalim at lumawak maliban sa karanasan ng mga pasubok. Sa mga panahon ng pagsubok, tinuturuan tayong manalangin ng may totoong pagtitiwala. Dinadalisay at pinapalalim nito ang ating pananalangin. Nagiging tunay na ekspresyon ng relasyon sa Diyos ang taing panalangin at hindi na lamang patay na ritwal at obligasyon. Natututo tayong magdasal gamit ang puso. Nag-uusap ang puso sa puso, natin at ng Diyos.
Ang mga pagsubok din ay pagkakataon para makapagbigay-patotoo sa pagmamahal natin sa Diyos. Nais nating ipahayag sa buong mundo na walang anuman o sinuman ang puwedeng humadlang sa pagmamahal at paglilingkod natin sa Diyos. Walang pagsubok ang puwedeng gumiba sa pananampalataya natin sa kanya. Ito ay paraan para akitin natin ang iba sa Diyos. Anumang paninindigan na nananatiling matatag kahit maraming pagsubok ay may malakas na dating sa iba. Ang mga pagsubok ay daan para ang paninindigan natin bilang mga kristiyano ay magkaroon ng matinding hatak sa iba. Lahat ng tanong at pagdududa ay nabubura kapag nakita ng lahat na handa tayong magtiis at magpakasakit alang-alang sa paninindigan natin sa Panginoon. Meron sa Panginoon na hindi natin kayang bitiwan kahit pa magdusa tayo.
MANALANGIN:
Panginoon, tulungan mo akong malampasan at mapagwagian ang bawa't pagsubok na dumaraan sa aking buhay. Kahit minsan ay sobrang bigat at tindi, matuto nawa akong manatiling nagtitiwala sa iyong salita. Makayanan ko nawa ang mga tuksong bumitiw sa iyo sa mga oras ng pagdududa. Gawin mo nawang pagkakataon ang lahat ng ito para ako ay lumago, para ako ay lalong magtiwala, at para ako ay makapag-bigay patotoo sa iyong pagmamahal sa lahat.
No comments:
Post a Comment