LUKAS 17:1-6
Mga Sanhi ng Pagkakasala
1 Sinabi ni Jesus sa kanyang mga alagad, "Siguradong darating ang mga sanhi ng pagkakasala; ngunit kakila-kilabot ang sasapitin ng taong panggagalingan niyon! 2 Mabuti pa sa kanya ang bitinan sa leeg ng isang gilingang-bato at itapon sa dagat, kaysa maging sanhi ng pagkakasala ng sinuman sa mga maliliit na ito. 3 Kaya't mag ingat kayo!
"Kung magkasala sa iyo ang kapatid mo, pagsabihan mo; at kung siya'y magsisi, patawarin mo. 4 Kung pitong ulit siyang magkasala sa iyo sa maghapon, at pitong ulit ding lumapit sa iyo at sabihin niyang, 'Nagsisisi ako,' kailangang patawarin mo siya."
Pananampalataya sa Diyos
5 Sinabi ng mga apostol sa Panginoon, 'Dagdagan po ninyo ang aming pananampalataya!'
6 Tumugon ang Panginoon, "Kung ang inyong pananampalataya ay maging sinlaki ng butil ng mustasa, masasabi ninyo sa punong ito ng sikamoro, 'Mabunot ka at matanim sa dagat!' at susundin kayo nito."
MAGNILAY:
Ang iskandalo ay may ganitong depenisyon: isang paraan para iligaw o ilihis ng landas ang iba papunta sa masama. Ito ang sinasabi ni Hesus na kakila-kilabot kung tayo ang magiging instrumento. Matindi ang magiging pananagutan natin kapag tayo ang naging sanhi para magkasala ang iba. Mabuti pa ngang bitinan sa leeg ng isang gilingang-bato at itapon sa dagat. Mabigat at matinding mga saloita ito ng Panginoon. Mas masaklap kapag ang iniligaw natin ng landas ay mga bata, mga kabataan, mga walang-muwang sa buhay, mga inosente. Higit pa sa kakila-kilabot na kapalaran ang sasapitin natin.
Pero gaano nga ba tayo ka-conscious sa maaaring impluwesya natin sa iba lalo sa kabataan. May mga magulang na bawal ng bawal sa mga anak na magbisyo pero numero uno silang umiinom, naninigarilyo, nagsusugal at masaklap pumapasok sa mga bawal na relasyon sa iba. Di ba may balita nga na tatanggalan ng lisensiya ang mga doktor na hindi mapigilang manigarilyo? Ang Simbahan din ngayon ay sugatan dahil sa maling kagagawan at iskandalo ng mga pari. Lugmok din ang bayan dahil naging kultura ang pagnanakaw dahil ginagaya lang naman kung ano ang ginagawa at patakaran ng mga nasa posisyon. Mahirap ipagkatiwala ang isang responsibilidad o posisyon o pamumuno sa hindi kayang magbigay ng magandang halimbawa. Hindi sapat ang galing at talino. Mahalaga ang kakayahang magoing isang halimbawa. Hindi puwedeng ibalewala ang kakayahang isabuhay ang sinasabi at pinapangaral.
Sa harap ng Diyos mananagot tayo. Ilang kaluluwa ang naligaw ng landas dahil sa kagagawan natin? Pagnilayan. Suriing mabuti. Bago gumawa ng anuman, isipin ang epekto nito sa iba. Pananagutan natin ang kaligtasan ng iba.
MANALANGIN:
Panginoon, tulugan mo kaming pakitidin ang agwat na naglalayo sa mga sinasabi namin at sa ginagawa namin. Maging halimbawa nawa kami sa salita lalo na sa gawa.
No comments:
Post a Comment