Daily Gospel Reflection by Fr. Rey An Yatco (11-27-10)

LUKAS 21: 34-36

Mag-ingat Kayo

34 "Ang katakawan, paglalasing at kabalisahan sa buhay na ito ay alisin ninyo sa inyong isip. Mag-ingat kayo at baka bigla kayong abutan ng Araw na iyon 35 na tulad ng isang bitag. Sapagkat darating ang Araw na iyon sa lahat ng tao. 36 Kaya't maging handa kayo sa lahat ng oras. Lagi ninyong idalangin na magkaroon kayo ng kalakasan upang makaligtas sa lahat ng mangyayaring ito, at makaharap kayo sa Anak ng Tao."



MAGNILAY:

Nasubukan moi na bang makainom o malasing? Maraming naglalasing para makalimot sa kasalukuyang problema, dinadala sa buhay, kalungkutan ng pagkabigo o pagod sa gawain. Ang pag-inom ay nagdudulot ng pansamantalang aliw, ginhawa, kalayaan, seguridad at lakas ng loob. Parang iyo ang mundo, parang kontrolado mo ang sitwasyon, parang ang tapang-tapang mo - pero lahat ng ito ay parang lamang. Pansamanatala at hindi totoo. Hangga't may alak lamang. May isang kinakatakutan ang lasing o nakainom - ang maubos ang alak kung saan siya nakadepende. Ang nakainom hangga't maaari ay ayaw tumigil sa pag-inom. Kahit kandasuka, hangga't hindi tumutumba, tatagay at tatagay, lalaklak ng lalaklak.



Ganito ang malasing sa isang bagay. Bibigyan ka ng huwad na seguridad. Lasing sa pera, lasing sa tagumpay, lasing sa kagandahan, lasing sa kasikatan - lasing sa mundo. Animo'y malaya pero alipin. Animo'y matapang pero duwag. Animo'y masaya pero kabado. Animo'y matatag pero lampa. Hangga't nakadepende ka sa ibinibigay ng mundo at dito mo hinuhugot ang saysay ng sarili at buhay mo, pansamantala at huwad ang katatagan mo. Kapag nawala ang lahat ng ito, guguho ang napakataas na tore ng Babel na ipinundar mo. Walang ibang panggagalingan ng tunay na katatagan maliban sa matuklasan mong ikaw ay anak ng Diyos. Hangga't hindi ka namumuhay bilang kanyang anak, ang lahat sa iyo ay huwad. Ang lahat sa iyo ay pansamanatala.



Ang dapat sa lasing ay maligo, uminom ng kape at alisin ang pagkalasing. Pag hindi na siya lasing, nasa tunay na siyang katinuan. Wala na siya sa mundo ng pagkukunwari. Puwede na siyang humarap sa buhay sa kung sino at ano siya. Kapag ikaw ay totoo sa sarili mo at ikaw ay namumuhay sa katotohanan, makikita mo ang DIYOS na siyang tunay na kaligayahan at katatagan.



MANALANGIN:

Panginoon, tulungan mo akong mawala sa aking kalasingan. Turuan mo akong tumayo sa sarili kong mga paa sa pagharap sa buhay. Matuklasan ko nawa na ikaw ang tunay na makapagbibigay sa akin ng tunay na kaligayahan, katatatagan at kalayaan.