MATEO 5:1-12
Ang Sermon sa Bundok
1 Nang makita ni Jesus ang napakaraming tao, umakyat siya sa bundok. Pagkaupo niya lumapit ang kanyang mga alagad 2 at sila'y tinuruan niya.
Ang mga Mapapalad(Lucas 6:20-23)
3 "Mapalad ang mga taong walang inaasahan kundi ang Diyos,sapagkat mapapabilang sila sa kaharian ng langit.
4 "Mapalad ang mga nagdadalamhati, sapagkat aaliwin sila ng Diyos.
5 "Mapalad ang mga mapagpakumbaba,sapagkat mamanahin nila ang daigdig.
6 "Mapalad ang mga nagugutom at nauuhaw sa katuwiran,sapagkat sila'y bubusugin.
7 "Mapalad ang mga mahabagin, sapagkat kahahabagan sila ng Diyos.
8 "Mapalad ang mga may malinis na puso, sapagkat makikita nila ang Diyos.
9 "Mapalad ang mga gumagawa ng paraan para sa kapayapaan,sapagkat sila'y ituturing na mga anak ng Diyos.
10 "Mapalad ang mga inuusig nang dahil sa kanilang pagsunod sa kalooban ng Diyos, sapagkat mapapabilang sila sa kaharian ng langit.
11 "Mapalad ang mga nilalait at inuusig ng mga tao, at pinaparatangan ng lahat ng uri ng kasamaan na pawang kasinungalingan a nang dahil sa akin.
12 Magsaya kayo at magalak sapagkat malaki ang inyong gantimpala sa langit.
MAGNILAY:
Araw ngayon ng mga bayani! Ipinagdiriwang natin ngayon ang kabayanihan ng lahat ng mga Kristiyano na nagpamalas ng katapangan sa pagbibigay patotoo sa pananampalataya. Pinararangalan natin ang lahat ng mga Kristiyano na sumaksi sa buhay at aral ng Panginoong Hesus. Sila angh mga Banal sa kalangitan. Sila ang mga Bayani ng Simbahan. Hindi lang sila yaong opisyal na kinilala ng Simbahan sa pamamagitan ng kanonisasyon. Ang kinikilala natin ngayon ay lahat-lahat ng mga Kristiyanong nasa piling ngayon ng Diyos sa kanyang kaharian. Binibigyang-pugay natin lalo ang mga Kristiyanong tahimik na nagsabuhay ng pananampalataya. Maaaring sila'y mga kapamilya natin, kamag-anak, kaibigan, kasamahan, kababayan, kalahi, kakontemporaryo, at marami pang iba. Sinasaluduhan natin ang mga bayani ng ating pananampalataya. Nawa mabigyang-inspirasyon tayo na magpakabayani rin sa ating buhay-pananampalataya. Tulad ng nasasaad sa ating Ebanghelyo: Mapalad ang mga walang inaasahan kundi ang Diyos (o mga dukha sa espiritu), sapagkat mapapabilang sila sa kaharian ng langit. Ang pundasyon ng kabayanihan sa pananampalataya ay ang pagtanggap ng ating karukhaan sa harap ng Diyos. Siya at siya lamang ang kahulugan at kabuluhan ng ating buhay. Siya lamang ang ating tanging kailangan. Kung wala siya, walang saysay ang lahat. Siya ang ating tanging yaman!
Araw din ngayon ng Kasamahan ng mga Banal (o Communion of Saints). Ang Simbahan ay binubuo ng tatlong grupo: ang Simbahang Matagumpay, ang Simbahang Nagdurusa, at ang Simbahang Nakikibaka.
Ang Simbahang Matagumpay ay mga kapatid natin sa pananamplataya na nasa langit na. Sila ang mga santo sa langit, ang mga Banal, ang mga Bayani. Nakikipag-ugnayan tayo sa kanila sa pamamagitan ng panalanging ukol sa mga santo. Humihingi tayo sa kanila ng tulong na panalangin sa ating mga pangangailangan. Dahil isa tayong pamilya, nagtutulungan tayo ng pagdasal sa Diyos. Bukod sa modelo natin sila, sila ay tagapagdasal din natin.
Ang Simbahang Nagdurusa ay mga kapatid sa pananampalataya na nasa purgatoryo. Naniniwala tayo na bawa't pagkakasala natin ay may katapat na pagbabayad-puri. Ito ay hustisya ng Diyos. At may mga Kristiyano na karapat-dapat sa langit nguni't may kailangan pang ipagbayad-puri na kasalanan kaya't ito'y kanila pang pinag-dadaanan. Hindi naman sila yung ubod sama na tumalikod ng lubos sa Diyos kung kaya't nakalaan sila sa impiyerno. Sila'y mga Kristiyano na tulad natin na may mga kahinaan at nakakagawa ng mga kasalanan sa kabila ng ating pagmamahal sa Diyos. Ang puragatoryo ay pansamanatalang kalagayan upang malinis o madalisay pa ang mga kasalanang dapat ipagbayad-puri. Pero ang langit ay sigurado na para sa kanila. Nakikipag-ugnayan tayo sa kanila sa pamamagitan din ng panalangin. Ipinagdarasal natin sila. Kaya nga't nakagawian na rin nating dalawin ang mga libingan ngayon para ipagdasal ang mga yumao na maaaring nasa kalagayan pa ng purgatoryo. Ang ating panalangin ay nakakatulong sa pasra sa kanila. Sila rin ay pinanniniwalaan nating nagdarasal para sa atin dahil sila'y mga kapatid natin.
Ang Simbahang Nakikibaka ay walang iba kundi tayo na narito pa sa lupa. Nasa proseso pa tayo ng pagiging santo o banal. Naglalakbay pa tayo sa lupa tungo sa Kaharian ng Diyos. Araw-araw nagsisikap tayo na manatiling tapat sa pananampalataya natin. Araw-araw ay ginagawa nating tulay upang makarating sa Tahanan ng Diyos. Dapat nating tandaan na ating destinasyon ay Langit, ang Kaharaian ng Diyos, ang maging Santo o Banal o Bayani ng Diyos.
Kaya't ang araw na ito ay espesyal na reunion ng lahat ng kaanib ng Simbahan - Matagumpay, Nagdurusa at Nakikibaka. Sa panalangin at mabuting gawa tayo ay nagkakaisa, nagsasamahan, nagkaka-ugnayan. Maligayang Reunion at Pagsasama-sama sa araw na ito ng kabayanihan sa pananamplataya!
MANALANGIN:
Panginoong Hesus, tipunin mo kaming lahat sa iyong Kaharian!
No comments:
Post a Comment