LUKAS 10: 1-9
Isinugo ni Jesus ang Pitumpu't Dalawa
1 Pagkatapos nito, pumili ang Panginoon ng pitumpu't dalawa. a Sila ay isinugo niya nang dala-dalawa sa bawat bayan at pook na pupuntahan niya. 2 Sinabi niya sa kanila, "Napakarami ng aanihin ngunit kakaunti ang mga mag-aani. Idalangin ninyo sa may-ari ng aanihin na magpadala siya ng mga mag-aani. 3 Sige pumunta na kayo! Isinusugo ko kayong parang mga tupa sa gitna ng mababangis na asong-gubat. 4 Huwag kayong magdala ng lalagyan ng pera, bag, o sandalyas. Huwag na kayong makikipagbatian kaninuman sa daan. 5 Pagpasok ninyo sa alinmang bahay, sabihin muna ninyo, 'Maghari nawa ang kapayapaan sa bahay na ito!' 6 Kung maibigin sa kapayapaan ang nakatira roon, tatanggapin nila ang kapayapaan ninyo; ngunit kung hindi, babalik sa inyo ang inyong kapayapaan. 7 Makituloy kayo sa bahay na iyan at huwag kayong magpapalipat-lipat ng tinutuluyan. Kainin ninyo at inumin ang anumang ihain sa inyo sapagkat ang manggagawa ay may karapatang tumanggap ng sweldo. 8 Kapag tinanggap kayo sa alinmang bayan, kainin ninyo ang anumang ihain sa inyo. 9 Pagalingin ninyo ang mga maysakit at sabihin sa mga tagaroon, 'Malapit na kayong pagharian ng Diyos.'
MAGNILAY:
Ang misyong ipahayag ang Mabuting Balita ni Kristo ay sobrang nakadikit sa ating pagkakilala o identity bilang mga Kristiyano. Hindi natin maaangkin ang pangalang Kristiyano hangga't hindi nagpapahayag ng Mabuting Balita ni Kristo ang ating buhay. Nakikilala kung sino tayo sa ating buhay, sa ating ginagawa, sa ating sinasabi. Sa salita't gawa nakikita kung Kristiyano tayo.
Ang Mabuting Balita ni Krsito ay hindi lang isang kaalaman o karunungang nasa isip lamang. Hindi lang ito isang konsepto na dapat arukin ng isip. Ang Mabting Balita ay Diyos na naging tao, si Kristo, na dapat masalamin sa atin. Ang makakita kay Kristo sa atin ay tanda na nagtagumpay tayo sa pagpapahayag ng kanyang Mabuting Balita. Sa ating Ebanghelyo, isinugo ang pitumpu't dalawa upang mauna sa pupuntahan ni Hesus. Sila ay kakatawan sa Panginoon. Sila ay ekstensyon niya sa mga bayang kanyang dadalawin. Sila ang kanyang magiging bibig na magpapahayag ng kanyang salita; sila ang kanyang magiging tainga na makikinig sa mga hinaing ng mga tao; sila ang kanyang magiging kamay at paa upang puntahan sila at iabot ang bukas-palad ng malasakit. Sa madali't sabi, ang magpahayag ng Mabuting Balita ay maging Kristo para sa iba. Hindi lang ito basta magturo. Ito ay gawing buhay si Kristo sa pagkatao natin upang hipuin ang mga taong uhaw sa pagmamahal ng Diyos.
Muli, nakadikit sa ating pagkakilala bilang mga Kristiyano ang pagpapahayag ng Mabuting Balita. Dalhin mo si Kristo saanman ka man naroon, saanman ka man nagtratrabaho, saanaman ka man pinadpad ng iyong tadhana. Maging Kristo ka sa mga nakakasalamuha mo araw-araw - mga kasama sa bahay, kapitbahay, katrabaho, kliyente, at mga hindi kilala. Maramdaman nila na iba ka. May kakaiba sa iyo. May natatangi sa iyo. May mabait at banal sa iyo. May malasakit sa iyo. May pag-unawa at pakikiramay sa iyo. Na totoo ka. Hindi ka sinungaling. Hindi manggagamit. Hindi ka tiwali. Kapag kasama ka, hulog ang puso ng iba.
MANALANGIN:
Panginoon, hayaan mong mabasa sa aking buhay ang Mabuting Balita ng iyong pagmamahal. Bawa't araw na aking buhay ay maging mga pahina nawa ng iyong Ebanghelyo. Bawa't yugto ng aking buhay ay mga kabanata ng Mabuting Balita. Sa huli, maialay ko nawa sa iyo ang isang aklat ng Mabuting Balita ng aking buhay Kristiyano.
No comments:
Post a Comment