MAGANDANG BALITA NGAYON - MARTES NG IKA-29 NA LINGGO SA KARANIWANG PANAHON (Okt. 19)
by Rey An Yatco on Tuesday, October 19, 2010 at 6:45pm
LUKAS 12: 35-38
Mga Aliping Laging Handa
35 "Maging handa kayong lagi at panatilihing maliwanag ang inyong mga ilawan. 36 Tumulad kayo sa mga aliping naghihintay sa pag-uwi ng kanilang panginoon buhat sa kasalan, upang kung ito'y dumating at kumatok ay mabuksan nila agad ang pinto. 37 Mapalad ang mga aliping aabutang nagbabantay pagdating ng kanilang panginoon. Tandaan ninyo: magbibihis siya at pauupuin sila, ipaghahanda sila ng pagkain at pagsisilbihan. 38 Mapalad sila kung maratnan silang handa pagdating ng Panginoon, maging sa hatinggabi o sa madaling-araw man.
MAGNILAY:
Ang pinakamapanganib na araw sa buhay ng isang tao ay yung araw na natutunan niya ang salitang bukas. Dahil noong araw na iyon, natutunan rin niya ang magpabukas!
Ang Ebanghelyo natin ngayon ay nagpapaalala sa atin ng kahalagahan ng pagiging handa. Kinumpara ng Hesus ang paghahanda natin sa pagdating ng Panginoon sa mga aliping naghihintay sa kanilang mga panginoon buhat sa kasalan. Madalas gabihin ang kanilang pagdating. Minsan, madaling-araw. Wala talagang oras kung sila'y darating. Kaya ang matalinong alipin ay naghahanda palagi. Kung maaari ngayon na kasi baka ngayon na rin dumating ang panginoon. Hindi siya nagpapaliban. Hindi siya nagsasabi ng Mamaya na o Teka muna. Nakaayos na siya agad. Hawak na niya ang ilawan. Nakabigkis na ang damit pantrabaho na siya para tuluy-tuloy agad ang pag-aasikaso sa panginoon kapag ito ay dumating.
Mahalaga ang may kamalayang Ngayon. Kung magagawa mo ngayon para handa ka na, gawin mo na ngayon at huwag mamaya o bukas. Paghandaan natin ang maraming bagay na dumarating sa buhay. Maraming pagkakataon ang dumarating at nasasayang hindi dahil hindi tayo karapat-dapat o hindi ito para sa atin o malas lang talaga o hindi talaga tinakda ng panahon o hindi talaga ito para sa atin. Nasasayang ang pagkakataon dahil sa simpleng dahilan na hindi tayo handa. Patumpik-tumpik tayo. Laging Saka na lang. Laging Pag dumating na lang. Laging Bukas na lang. Minsan masasabi natin Bakit kasi may bukas pa. Kung wala sanang bukas, magagawa ko ito ngayon!
Ang pagdating ng Panginoong Diyos sa buhay natin ay walang ring oras. Walang schedule. Dumarating siya sa mga panahong hindi inaasahan. Kumakatok na siya sa puso natin pero abala tayo. Tumatawag siya pero Sorry, the line is busy. Kapag dumating siya sa dulo ng ating buhay - at hindi tayo handa - kaawa-awa tayo. Nagising tayo isang araw may malalang sakit na pala tayo o matanda na pala ako o mahina na pala ako. Bigla nahaharap tayo sa limitasyon ng ating buhay. Bilang na pala ang oras natin sa mundo. Konti na lang ang natitira. At saka natin maiisip ang marami nating pagpapabaya. Kung maibbalik lang sana ang kamay ng orasan...
Maging handa. Huwag magpabukas. Ang puwedeng tugon ngayon sa imbitasyon ng Diyos ay tugunin na. Ngayon, hindi bukas!
MANALANGIN:
Panginoon, ipakita mop sa akin ang kahalagahan ng pagtugon ngayon upang huwag ko itong ipagpabukas.
No comments:
Post a Comment