LUKAS 13: 1-9
Magsisi Upang Hindi Mapahamak
1 Dumating noon ang ilang tao at ibinalita kay Jesus na ipinapatay ni Pilato ang ilang mga taga-Galilea habang ang mga ito'y naghahandog sa Diyos. 2 Sinabi niya sa kanila, "Akala ba ninyo, dahil sa sinapit nilang iyon, higit silang masama kaysa sa ibang mga taga-Galilea? 3 Hindi! Ngunit sinasabi ko sa inyo, malibang magsisi kayo't talikuran ang inyong mga kasalanan, mapapahamak din kayong lahat. 4 At ang labing-walong namatay nang mabagsakan ng tore sa Siloe, sa akala ba ninyo'y higit silang makasalanan kaysa sa ibang naninirahan sa Jerusalem? 5 Hindi! Ngunit sinasabi ko sa inyo, malibang magsisi kayo't talikuran ang inyong mga kasalanan, mapapahamak din kayong tulad nila."
Ang Talinhaga ng Puno ng Igos
6 Sinabi pa sa kanila ni Jesus ang talinhagang ito. "May isang taong may tanim na puno ng igos sa kanyang ubasan. Minsan, tiningnan niya kung may bunga ang puno, ngunit wala siyang nakita. 7 Dahil dito, sinabi niya sa tagapag-alaga ng ubasan, 'Tatlong taon na akong pumaparito at naghahanap ng bunga sa punong ito, ngunit wala akong makita. Putulin mo na't nakakasikip lang iyan!' 8 Ngunit sumagot ang tagapag-alaga, 'Huwag po muna nating putulin ngayon. Huhukayan ko po ang palibot at lalagyan ng pataba, 9 baka sakaling mamunga na sa susunod na taon. Kung hindi pa, saka po ninyo ipaputol.' "
MAGNILAY:
Hindi naiiba ang reaksyon ng mga tao noon tungkol sa mga sakuna sa reaksyon natin ngayon. Inuugnay din natin ang sakuna sa kasalanan. Kaya pag may nangyaring sakuna, naiisip agad natin na parusa ito ng Diyos sa mga tao sa lugar na pinangyarihan nito. Kapag lumindol doon, agad nating sinasabi na siguro makasalanan na sila. Kapag binaha ang isang lugar ang reaksyon natin ay pinaparusahan na sila ng Diyos sa kanilang kasalanan. Pag nagkasakit tayo, ang sinasabi natin sa Diyos kung ano ano ba ang kasalanan natin bakit nangyari ito?
Ganito rin ang pananaw ng mga tao noong panahon ni Hesus. May nabalitaan silang sakuna na ipinapatay ni Pilato ang ilang taga-Galilea habang naghahandog at ang naisip nila agad ay malas. Siguro may kasalanan silang dapat pagbayaran. Naging pagkakataon ito para ipahayag ni Hesus na hindi dahil ganoon ang nangyari sa kanila ay mas higit silang makasalanan kaysa sa kanila. Ang mga sakuna at malalagim na pangyayari ay hindi maiuugnay sa kasalanan at parusa mula sa Diyos. Hindi dahil nabiktima tayo ng kasalanan ng iba ay pinarusahan na tayo ng Diyos. Sadyang bilang tao, kahit mabuti ka o masama, maaari kang maging biktima ng mga sakuna, gawa man ito ng kalikasan o bunga ng kasalanan ng tao. Bahagi ito ng ating limitasyon bilang nilalang at tao. Bahagi rin ito ng ating pagiging kabilang sa sangkatauhan na may kalayaang pumili kung ano ang gusto niyang gawin, mabuti o masama. Ito ang hiwaga ng ating pagiging nilalang.
Kung bakit nangyayari ito ay isang hiwaga na Diyos lang ang nakakaalam bakit pinayagan niya na mangyari ang mga iyon. May dahilan at ito ang dapat pagsikapan nating isaliksik sa pamamagitan ng panalangin at pagninilay sa mga bagay-bagay sa ating buhay. Minsan may leksyon ang Diyos na pinaparating sa atin sa masakit na paraan. Pero isang katotohanan ang dapat nating isaisip - hindi galing sa Diyos ang masama. Nguni't minsan pinapahintulutan niyang may mangyaring masama dahil sa malalim na kadahilanan. At ang madalas na mensahe ng Diyos ay magbago tayo dahil hindi natin hawak ang buhay natin. Marupok ito. Sa isang iglap ay puwede itong bawiin sa atin ng ganoon na lamang.
Seryoso ang Panginoon sa pangangaral ng pagsisisi. Binabalaan niya talaga ang mga ayaw magsisi. Mas masaklap ang kapalaran ng mga ayaw magsisi kaysa mga biktima ng sakuna at trahedya. Mas malala ang mangyayari sa kanila. Gayunpaman, maawain ang Diyos bagama't sigurado siya sa masaklap na kapalaran ng mga makasalanang ayaw magbago. Ang talinhaga ng punong igos ay nagpapakita ng kung paano ang Diyos ibibigay ang lahat at sagad na pagkakataon para magbago tayo. Kahit oras na sana para putulin ang hindi namumungang puno, binigyan pa ng isang taon para bigyan ng pagkakataon. Ganoon ang Diyos sa mga makasalanan. Sasagarin niya ang lahat ng paraan para imbitahin siyang magbago. Kaya nga, kung parusahan man ang mga makasalanang hindi nagsisi, ito ay sarili nilang kagustuhan at hindi kalooban ng Diyos. Sa Diyos, gusto niyang iligtas lahat.
MANALANGIN:
Panginoon, makita ko nawa ang mga pagkakataong binibigay mo sa akin para magbago. Huwag ko sanang balewalain ang mga ito. Pahalagahan ko nawa ang pagtitiyaga mo sa akin. Kahit unti-unti, pagsikapan ko nawang tumugon sa tawag mong magbago. Mamunga nawa ako ayon sa iyong inaasahan sa akin.
No comments:
Post a Comment