LUKAS 12: 8-12
Pagkilala kay Cristo
8 "Sinasabi ko rin sa inyo, ang sinumang kumilala sa akin sa harapan ng mga tao ay kikilalanin din naman ng Anak ng Tao sa harapan ng mga anghel ng Diyos. 9 Ngunit ang magkaila sa akin sa harap ng mga tao ay ikakaila ko rin naman sa harap ng mga anghel ng Diyos.
10 "Ang sinumang magsasalita laban sa Anak ng Tao ay mapapatawad, ngunit ang sinumang lumapastangan sa Espiritu Santo ay hindi patatawarin.
11 "Kapag kayo'y dinala nila sa sinagoga, o sa harap ng mga tagapamahala at ng mga may kapangyarihan upang litisin, huwag kayong mabahala kung paano ninyo ipagtatanggol ang inyong sarili o kung ano ang inyong sasabihin 12 sapagkat sa oras na iyon, ang Espiritu Santo ang magtuturo sa inyo kung ano ang dapat ninyong sabihin."
MAGNILAY
May kasalanan palang hindi napapatawad?
Binanggit ni Hesus sa ating Ebanghelyo ngayon na ang lumapastangan sa Espiritu Santo ay hindi patatawarin. Siguro puwede nating maikomento na may limitasyon pala ang pagpapatawad ng Diyos. Hindi pala lahat ay puwede niyang patawarin. May hangganan pala ang pagpapatawad niya. Mukhang taliwas ito sa kinagisnan nating konsepto na walang hanggan ang awa't pagpapatawad ng Diyos.
Totoong walang hanggan pa rin ang pagpapatawad ng Diyos. Ito ay aral at paniniwala na hindi magbabago kailanman. Ito ay regalo niya sa atin. Pero dapat nating maintindihan na ang regalo ay hindi magiging regalo kung hindi ito tatanggapin ng pinagkakalooban o pinagbibigyan. Nananatili kailanman ang alok ng Diyos na buhay sa piling niya pero kung ayaw naman nating tanggapin, mananatili lang itong isang alok. Kalayaang pumili ang isa sa importanteng ibinigay sa atin ng Diyos para dumanas ng tunay na kaligayahan. At nirerespeto ng Diyos ang ating pagpili. Kung tanggihan natin siya, kahit masakit ito sa Diyos ay rerespetuhin niya. Pero makakatiyak tayo na gagawin niya ang lahat para makuha niya tayo na hindi lalabag sa ating kalayaang pumili.
Ang kasalanang hindi patatawarin na sinasabi sa Ebanghelyo ay kasalanan laban sa Espiritu Santo. Hindi lang ito simpleng pagtanggi sa alok ng Diyos. Ang kasalanan laban sa Espiritu Santo ay paglalahad na ang mismong gawain niya na tayo'y patawarin at iligtas ay galing sa demonyo. Ito ang kasalanan ng mga Pariseo na nagbintang kay Hesus na siya ay nagpapagaling sa kapangyarihan ng demonyo. Si Hesus ay nagpapagaling sa bunsod ng Espiritu Santo. Ang ituring ito na gawa ng demonyo ay isang tahasang paglapastangan at pagtanggi sa pinagmumulan ng kapatawaran at kaligtasan. Isang uri ito ng pagtanggi na may paglalapastangan. Muli, hindi maipipilit ng Panginoon ang alok niya. Ang resulta ay kawalan ng kapatawaran. Pag sinabing walang kapatawaran ang ibig sabihin nito ay hiwalay sa Diyos na hindi Diyos ang may gawa kundi bunga ng ating pagtanggi ng tahasan sa kanya.
Ang hamon ng Ebanghelyo sa atin ay matuto tayong gamitin ang kakayanan nating pumili at nawa ang piliin natin ay ang alok ng Diyos sa atin. Minsan, sasabihin natin, siyempre hindi natin tatanggihan ang Panginoon. Kaya lang minsan, kundi man madalas, sa mga maliliit na pinipili natin araw-araw, masasalamin ang pagtanggi natin sa kaniyang panukala't alok. Yung mga kasalanan na ginagawa natin araw-araw, minsan ay tinuturing nating maliit lang naman. Baka puwede na. Pero kung malimit ang pagpili natin kahit sa mga akala nati'y maliliit na pagakakasala ay nagreresulta sa malawak na pagtanggi natin sa Diyos kahit hindi man natin aminin. Ang mga maliliit na kasalanan na ginagawa natin araw-araw ay nagpapahina sa kakayanan nating piliin ang Diyos ng malawakan.
MANALANGIN:
Panginoon, turuan mo akong gamitin ang aking kakayanang pumili sa tamang paraan. Maunawaan ko nawa na hindi mo ito ibinigay para piliin ang masama. Ibinigay mo ito para piliin ang mabuti at maangkin namin ang pagpiling ito. Kahit sa araw-araw naming buhay, matuto nawa kaming piliin ang iyong panukal't alok sa mga ordinaryong sitwasyon ng buhay. Sa ganitong paraan, tumatag nawa ang pinaka-desisyon naming sundin ka.
No comments:
Post a Comment