LUKAS 11: 37-41
Tinuligsa ni Jesus ang mga Tagapagturo ng Kautusan at ang mga Pariseo
37 Pagkatapos magsalita, si Jesus ay inanyayahan ng isang Pariseo upang kumain sa bahay niya. Nagpaunlak si Jesus at dumulog sa hapag. 38 Nagulat ang Pariseo nang makita niyang si Jesus ay hindi muna naghugas ng kamay. 39 Sinabi sa kanya ng Panginoon, "Kayong mga Pariseo, hinuhugasan ninyo ang labas ng baso at ng pinggan, ngunit ang loob ninyo'y punung-puno ng kasakiman at kasamaan. 40 Mga hangal! Hindi ba't ang lumikha ng nasa labas ang siya ring lumikha ng nasa loob? 41 Ipamahagi muna ninyo sa mga dukha ang laman ng inyong mga baso at pinggan, at magiging malinis ang lahat ng bagay para sa inyo.
MAGNILAY:
Malayu-layo na rin ang narating ng Cosmetic Industry sa buong mundo. Paunlad ng paunlad ang teknolohiya ng pagpapaganda. Hindi biro ang ginugugol ng mga umaasa sa cosmetics para gumanda. Bukod sa mga mamahaling mga produkto ng pagpapaganda, nariyan na rin ang mga talagang sobrang mahal na mga operasyon para lang gumanda. At ang nakaakgulat, sa kabila ng kamahalan, kinakagat pa rin ng marami. Talagang pinag-iipunan para lang may maigugol. Pero sa lahat ng ito, hindi pa rin maitatatwa na ang gandang dulot ng cosmetics ay panlabas lamang, pansamantala lamang, maskara lamang. Tinatakpan lang nito ang pangit na nasa ilalim. Hindi talaga nawala ang pangit. Tinakpan lang. Tinago lang. Yung ibang cosmetics pag naligo ka, balik ka sa kapangitan. Malaking pera ang ginagastos natin para magtago!
Minsan, ginagawa rin natin ito sa larangan ng kabanalan. Mahilig tayo sa cosmetic holiness. Gumagawa tayo ng mga ritwal para masabing banal tayo. O kung ginagawa man natin ito, hindi para mabago ang kalooban natin. Ayaw nating iwan at baguhin ang nasa loob natin - paghahangad, pagkamakasarili, pag-iimbot, mapagmataas, at iba pa. Puhunan natin iyon sa pagbusog ng ating sarili ng karangyaan, kasarapan, kaaaliwan. Pero alam natin may mali doon. Pangit iyon. Kaya takpan natin. Itago natin. Puwede namang lagyan ng make up. Puwedeng ihokus-pokus. Magdebosyon tayo. Magritwal tayo. Mag-ala banal tayo.
Marami noong panahon ni Hesus ang cosmetic ang kabanalan. Una na ang mga Pariseo. Nagagalit sila na hindi naghugas ng kamay si Hesus. Karumihan ito hindi lang ng katawan kundi ng kaluluwa. Relihiyosong ritwal ang paghuhugas ng kamay bago kumain. Kaya pinuna nila si Hesus. Bumwelta ang Panginoon. Nakita niya ang karumihan ng kanilang budhi na lumalabas sa masasama nilang gawa. Tinatago nila ito sa pagiging tagapagtanggol kunwari ng mga ritwal na akala nila magpapalinis sa kanilang puso. Hindi! Ang pagpapakabanal, ang pagiging malinis ng budhi ay isang desisyon. Ito'y mula sa puso na dumadaloy sa paggawa ng mabuti sa kapwa.
Kailangan ang kabanalan ay galing sa kalooban natin. Kailangan ng pagbabago ng isip at puso. Kombersyon ng kalooban ang pundasyon ng kalinisan at kabanalan. Hinding-hindi cosmetic ang solusyon sa karumihan ng budhi!
MANALANGIN:
Panginoon, gawin mo akong banal sa puso at kalooban, sa isip at gawa. Ang pagpapakabanal nawa ay aking laging maging desisyon.
No comments:
Post a Comment