LUKAS 11: 15-26
15 Subalit sinabi naman ng ilan sa mga naroon, "Nakapagpalayas siya ng mga demonyo sa pamamagitan ng kapangyarihan ni Beelzebul, ang pinuno ng mga demonyo."
16 May ilan namang, sa pagnanais na siya'y subukin, patuloy na humihiling na magpakita siya ng isang himalang mula sa langit. 17 At dahil alam ni Jesus ang kanilang iniisip, sinabi niya sa kanila, "Ang kahariang nahahati sa magkakalabang pangkat ay babagsak at ang sambahayang nag-aaway-away ay mawawasak. 18 Kung may mga pangkat sa kaharian ni Satanas na naglalaban-laban, paano mananatili ang kanyang kaharian? Sinasabi ninyong nagpapalayas ako ng mga demonyo sa kapangyarihan ni Beelzebul. 19 Kung sa kapangyarihan ni Beelzebul ako nagpapalayas ng mga demonyo, sa kaninong kapangyarihan naman nagpapalayas ng demonyo ang inyong mga tagasunod? Sila na rin ang magpapatunay na mali kayo. 20 Nagpapalayas ako ng mga demonyo sa kapangyarihan ng Diyos, at ito'y nangangahulugang dumating na sa inyo ang kaharian ng Diyos.
21 "Kapag ang isang taong malakas ay nagbabantay sa kanyang bahay na dala ang kanyang mga sandata, ligtas ang kanyang mga ari-arian. 22 Ngunit kung salakayin siya ng isang taong higit na malakas kaysa kanya, sasamsamin nito ang mga sandatang kanyang inaasahan at ipamamahagi nito ang mga inagaw na ari-arian.
23 "Ang hindi ko kakampi ay kalaban ko, at ang hindi ko kasamang nag-iipon ay nagkakalat."
Ang Pagbabalik ng Masamang Espiritu
24 "Kapag umalis sa tao ang isang masamang espiritu, nagpapagala-gala ito sa mga tigang na lugar at naghahanap ng mapagpapahingahan. Kapag wala siyang makita, sasabihin niya sa sarili, 'Babalik ako sa bahay na aking pinanggalingan.' 25 Sa pagbabalik niya ay matatagpuan niyang malinis at maayos ang bahay. 26 Kaya't, lalabas siyang muli at magsasama ng pito pang espiritung mas masasama kaysa kanya. Papasok sila at maninirahan doon, kaya't mas masama pa kaysa dati ang kalagayan ng taong iyon."
MAGNILAY:
Sinasaad ng ating Ebanghelyo ngayon ang posibilidad ng pagbabalik ng masamang espiritu sa atin kapag ito ay umalis na. At sa kanyang pagbabalik, magiging mas malala ang magiging kalagayan natin. Paano natin ito uunawain?
Kung uunawain natin ito ngayon, ito ay tumutukoy sa ating pakikibaka laban sa masama at laban sa kasalanan. Alam natin na ang ating pinakamahigpit na kaaway ay kasalanan. Kaya araw-araw ay inuusisa natin ang ating konsensiya. Araw-araw nagdadasal tayo ng pagsisisi. Araw-araw pinapanibago natin ang pagtakwil sa masama. At sa mga pagkakataong malaki ang ating nagagawang kasalanan, dumudulog agad tayo sa Sakramento ng Kumpisal upang tumanggap ng pagpapatawad at pakikipagkasundo. Ang pagsisisi ay pangunahing sangkap ng Kristiyanong espiritwalidad.
Pero hindi sapat ang magsisi lang. Hindi sapat na ibsan lang natin ang ating konsensiya ng kasalanan. Hindi lang sapat na maglinis tayo ng ating budhi at tapos na. Ang pag-alis ng masama sa ating kalooban ay dapat palitan natin ng aktibong pagkilos ng mabuti. Hindi sapat ang mapatawad lamang. Hindi sapat na itigil lamang ang dating masamang hilig at gawain. Dapat itong palitan ng bagong gawa, ng bagong hilig na mabuti, ng bagong istilo ng buhay na nakatuon sa paggawa ng mabuti. Kung hindi, malamang-lamang, babalik tayo sa dating kasalanan at mas malala pa.
Kailangan gumawa tayo ng mabuti sapagka't sa pamamagitan nito, nakakabuo tayo ng bagong ugali, bagong kinahihiligan at kinagagawian na nakatuon sa mabuti. Ang kasalanan ay may kinalaman sa kinagawian o 'habit.' Minsan alipin tayo ng kasalanan kasi nakagawian na natin. Ayaw man natin pero nasanay na tayo at ang hirap kumawala sa nakasanayan na. Kailangan itong putulin at bumuo ng bago na hahatak sa atin sa kung ano ang mabuti. Sa ganitong paraan, maghihirapang bumalik uli ang masamang espiritu ng pagkakasala. Kung hindi tayo makakabuo nito, mas madalaling bumalik ang espiritung ito. At tayo ay babalik at babalik sa dati nating kasalanan kahit napakaraming beses na natin itong naikumpisal.
Maitutulad natin sa baso ang ating sarili. Kapag inalisan natin ito ng laman, dapat punuin naman ng bagong laman. Kung inalis natin sa atin ang masama, dapat palitan ng mabuti. Kung may lamang mabuti, walang nang mapaglalagyan pang muli ang masama. Pero kung walang laman, libreng-libre itong malalagyan muli ng pagkakasala na mas malala pa.
MANALANGIN:
Panginoon, huwag lang sana akong magsisi sa aking mga kasalanan. Tulungan mo akong magsimula ng bagong paraan ng pamumuhay na mag-aakay pa lalo sa akin sa kabutihan. Punuin mo ang aking puso ng iyong grasya upang walang mapaglagyan ang espiritu ng kasamaan.
No comments:
Post a Comment