LUKAS 11:29-32
Si Jesus ang Palatandaang Mula sa Langit(Mateo 12:38-42)
29 Nang dumagsa ang mga tao, sinabi ni Jesus, "Napakasama ng mga tao sa panahong ito. Naghahanap sila ng palatandaang mula sa langit, subalit walang palatandaang ipapakita sa kanila maliban sa nangyari kay Jonas. 30 Kung paanong si Jonas ay naging isang palatandaan sa mga taga-Nineve, gayundin naman, ang Anak ng Tao ay magiging isang palatandaan sa lahing ito. 31 Sa Araw ng Paghuhukom, sasaksi ang Reyna ng Sheba laban sa lahing ito, sapagkat naglakbay siya mula pa sa dulo ng daigdig upang mapakinggan ang karunungan ni Solomon, ngunit ang naririto ngayon ay higit na dakila kaysa kay Solomon. 32 Sa Araw ng Paghuhukom, sasaksi ang mga taga-Nineve laban sa lahing ito, sapagkat nagsisi sila dahil sa pangangaral ni Jonas. Pakinggan ninyo, lalong dakila kay Jonas ang naririto ngayon."
MAGNILAY:
Tanda ba o aliw ang hinahanap natin? Mensahe ba o palabas ang gusto natin?
Ito yung laman ng mensahe ni Hesus sa kanyang mga kababayan sa Ebanghelyo natin. Naghahanap sila ng palatandaan. May duda na sila kay Hesus at ngayon hinahanapan siya ng tanda o milagro para raw maniwala sila. Kung tanda ang pag-uusapan, wala na talagang kulang. Sa tindi ng mga aral at karunungan ni Hesus at kung paano ito tumitimo sa puso at isip, higit pa sa sapat ang palatandaan na siya nga ay nagsasabi ng mensahe ng Diyos. Kaya nga naikumpara pa niya ang sarili kay Solomon na kilala sa karunungan na dinalaw pa ng Reyna ng Sheba. Kung Solomon ay hinangaan at pinaniwalaan, di hamak na mas magaling at malalim ang mga karunungang ipinakita ni Hesus. Bakit hindi nila siya pinaniwalaan?
Hindi tanda ang hanap ng mga Hudyo noon. Hindi mensahe ang kinasasabikan nila. Kung ang mga ito ang hanap at kinasasabikan nila, matagalk na silang naniwala kay Hesus. Pero wala talaga silang planong maniwala. Sarado ang isip at puso nila kay Hesus. At paghingi nila ng palatandaan ay para mabusog lamang ang kanilang paghahangad ng aliw, ng palabas, ng 'entertainment.' Balita si Hesus sa paggawa ng milagro at gusto nila itong masaksihan.
Maganda ring tanungin natin ang ating sarili. Minsan naghahanap din tayo ng mas higit pang tanda mula sa Diyos, yung extraordinaryo, yung mapapabilib tayo, yung mapapamangha tayo. Gusto natin mga tanda na lilihis sa normal na takbo ng mga bagay-bagay sa pang-araw-araw nating buhay. Pero hindi. Ang mundo natin araw-araw ay punung-puno ng tanda ng mensahe ng Diyos. Ang mga nangyayari sa paligid at sa sarili nating buhay ay mga naglalaman ng mensahe na kailangan nating tuklasin sa pamamagitan ng pagdarasal na may pagninilay. Samahan pa natin ng Banal na Aklat, ang Bibliya, na kapag binasa't pinagnilayan ay tiyak na paraan para mangusap ang Diyos sa puso natin. Ang mga tao na nakakasalamuha natin, ang mga sinasabi sa atin ng iba, minsan sila ang paraan ng Diyos para magsalita sa atin. Ang mga gawain ng Simbahan bilang komunidad ng Diyos - mula sa mga pagsamba, pagdiriwang at liturhiya nito - mga daan sila para madama natin ang mensahe niya. Lalo na ang apostolado, ang pagbaba sa mga tao at damayan sila. Naroon ang Diyos sa mga naghihirap, naghihikahos, may mga problema, mga nangangailangan. Kung gusto mong makatagpo ang Diyos, iwan mo muna ang masarap mong buhay, ang komportable mong buhay, ang marangya mong buhay. Wala diyan ang Diyos. Puntahan mo siya sa kapwa mong nangangailangan sa iyo. Kausapin mo sila. Alamin mo ang kanilang kuwento. Damahin mo ang kanilang hinaing. Ewan lang kung hindi mo madama ang Diyos sa puso.
Ang Diyos ay nagpapakilala madalas sa mga ordinaryong paraan ng araw-araw na buhay hindi sa mga extraordinaryo. Mensahe ang dala niya hindi lang aliw. Nagpapakilala siya hindi lang nagpapalabas o nagpapatawa o nang-aaliw. Buksan mo ang mata mo. Buksan mo ang tainga mo. Ang tagal ng nagsasalita ang Diyos sa iyo. Sumisigaw na nga. Kaso nagbubulag-bulagan ka. Nagbibingi-bingihan. E kasi, naghahanap ka ng palabas!
MANALANGIN:
Panginoon, buksan mo ang aking kamalayan sa iyong salita na laganap sa aking paligid. Pagkalooban mo ako ng masidhing paghahangad na marinig ka. Huwag sana akong matukso na maghanap lang ng aliw o palabas. Makita nawa kita lalo na sa kapwa kong nangangailangan.
No comments:
Post a Comment