HUWEBES NG IKA-28 LINGGO SA KARANIWANG PANAHON
LUKAS 11: 47-54
47 Kahabag-habag kayo! Ipinagpapatayo pa ninyo ng magagarang libingan ang mga propetang pinatay ng inyong mga ninuno. 48 Sa gayon, kayo na rin ang nagpapatunay na sang-ayon kayo sa ginawa ng inyong mga ninuno, sapagkat sila ang pumatay sa mga propeta at kayo naman ang nagtatayo ng libingan ng mga ito. 49 Dahil dito'y sinabi rin ng Karunungan ng Diyos, 'Magsusugo ako sa kanila ng mga propeta at mga apostol; ang ilan ay papatayin nila at ang iba nama'y uusigin.' 50 Sa gayon, pananagutan ninyong mga nabubuhay sa panahong ito ang pagpatay sa lahat ng mga propetang pinatay mula nang likhain ang daigdig, 51 magmula kay Abel hanggang kay Zacarias na pinatay sa pagitan ng dambana at ng Templo. Oo, sinasabi ko sa inyo, kayong mga nabubuhay sa panahong ito, mananagot kayo sa kanilang pagkamatay.
52 "Kahabag-habag kayo, mga dalubhasa sa kautusan! Sapagkat ipinagkakait ninyo ang susi ng kaalaman. Hindi na nga kayo pumapasok, hinahadlangan pa ninyo ang mga ibang nais pumasok."
53 Pagkaalis ni Jesus sa lugar na iyon, nagsimula na siyang tuligsain ng mga tagapagturo ng Kautusan at Pariseo. Malimit nilang tanungin siya tungkol sa maraming bagay 54 upang masilo siya sa pamamagitan ng kanyang pananalita.
MAGNILAY:
Maraming mga ‘Kahabag-habag’ ang sinabi ni Hesus sa ating Ebanghelyo. Kung meron mang pinaka-kahabag-habag sa mga ‘Kahabag-habag’ na ito ay yaong patungkol sa mga dalubhasa sa kautusan na nagkait ng susi ng kaalaman sa mga tao para hadlangan ang pagpasok nila sa kaharian ng Diyos.
Ang tumangging pumasok sa kaharian ng Diyos ay isang bagay. Ang maging hadlang para ang iba ay makapasok ay iba rin. Ang huli ay posibleng maging pinakamalaking kasalanan na puwede nating magawa!
Puwede na ayaw natin pumasok sa pagbabagong pinapanukala ng Diyos sa atin. Maraming dahilan. Hindi tayo handa. Ayaw nating iwan ang mga bagay-bagay na mahalaga na sa atin. Ayaw nating daanan ang sakripisyong hinihingi ng pagbabago. At kung anu-ano pa. Minsan, alam natin na tama ang panukala ng Diyos. Alam natin na totoo ang kanyang sinasabi. Yun nga lang ay kung bakit duwag ako. At dahil ditto, sikreto tayong galit sa ating sarili. Bakit ayaw ko?! Bakit ko tinatanggihan?! Alam ko namang ito ang dapat! Ito ang susi ng kaligayahan. Tapos, dahil hindi natin makuhang tanggapin, maghihiganti tayo at sa iba natin napapasa. Kung hindi ako makapasok, hindi rin makakapasok ang iba. Ang masaklap, tayo ang nagiging dahilan bakit hindi lumigaya ang iba sa buhay. Hadlang tayo sa tagumpay at kaligayahan ng iba.
Ang bunga ng pagtanggap sa salita ng Diyos ay nagiging dan din tayo para ang iba ay tanggapin ito. Kapag pumasok tayo sa hamong magbago, magiging instrumento rin tayo ng pagbabago ng iba. Kung meron tayong dapat pagsumikatan, ito ay maging matapang harapin ang hamon ng Diyos, ang hamon ng kanyang kaharian, ang hamoin ng kanyang salita.
MANALANGIN:
Panginoon, alisin mo ang karuwagan na nasa puso ko. Magtiwala nawa ako na tutulungan mo ako na magbago basta’t gustuhin ko lang at tanggapin ko ang pagpasok sa iyong kaharian.
BIYERNES NG IKA-28 LINGGO SA KARANIWANG PANAHON
LUKAS 12: 1-7
Babala Laban sa Pagkukunwari
1 Samantala, dumaragsa ang libu libong tao, at sa sobrang dami ay nagkakatapakan na sila. Sinabi ni Jesus sa kanyang mga alagad, "Mag-ingat kayo sa pampaalsang ginagamit ng mga Pariseo; sila ay mga mapagkunwari. 2 Walang natatago na di malalantad at walang nalilihim na di mabubunyag. 3 Ang sinabi ninyo sa dilim ay maririnig sa liwanag at ang ibinulong ninyo sa loob ng silid ay ipagsisigawan sa lansangan.
Ang Dapat Katakutan
4 "Sinasabi ko sa inyo, mga kaibigan, huwag kayong matakot sa mga taong pumapatay ng katawan at wala nang kayang gawin maliban dito. 5 Sasabihin ko sa inyo kung sino ang dapat ninyong katakutan. Katakutan ninyo siya na pagkatapos pumatay ay may kapangyarihan ding magtapon sa impiyerno. Sinasabi ko sa inyo, ang Diyos ang dapat ninyong katakutan!
6 "Hindi ba't ipinagbibili ang limang maya sa halaga lamang ng dalawang salaping tanso? Gayunman, kahit isa sa kanila'y hindi pinababayaan ng Diyos. 7 Maging ang buhok ninyo'y bilang niyang lahat. Kaya't huwag kayong matakot; higit kayong mahalaga kaysa mga maya."
MAGNILAY:
Hindi natin puwedeng takasan ang katotohanan. Haharap at haharap tayo sa kanya. Anumang tago natin o pagsisikreto, mananagot tayo sa katotohanan. Walang ginawa ng tago ang hindi pananagutan. Sa harapan ng Diyos at ating budhi, hindi natin maiiwasan ang responsibilidad sa bawa’t ginawa natin. May oras ng paglilitis.
Malinaw ang aral ng Panginoon. Ang kabanalan ay hindi lang hanggang nakikita ng iba. Hindi dapat matapos ang pagpapakabanal sa panlabas lamang. Ang tunay na kabanalan, at madalas ito talaga ang sukatan, ay saklaw pati ang mga ginagawsa natin ng hindi nakikita ng iba. Ito yung tinatawag na integridad. Ang oisang taong may integridad ay nag-iisip at gumagawa ng mabuti nakikita man o hindi ng iba. Kahit sa pribadong buhay niya, tapat siya sa sarili at sa Diyos lalo na. Walang pagkukunwari. Walang hipokrisiya.
Ito nga ang binababala ng Panginoon. Mag-ingat sa lebadura o pampaalsa ng pagkukuwari. Ginamit ni Hesus ang larawan ng tinapay. Kaya nabubulok ang tinapay ay dahil sa lebadura o pampaalsa na hinahalo sa harina. Gayundin naman, ang pagkukunwari ang magpapabulok sa kaluluwa, sa ating pagkatao, sa ating integridad.
Maging totoo at tapat lagi sa lahat ng oras, sa lahat ng pagkakataon, at sa lahat ng sitwasyon!
MANALANGIN:
Panginoon, tulungan mo akong mapanatili ang aking integridad. Pagsikapan ko nawa na maging matuwid nakikita man ako o hindi ng iba. Lagi ko nawang maalala na walang lihim para sa iyo. Nakikita mo ang bawa’t galaw ko. Nababasa mo ang bawa’t naiisip ko.
No comments:
Post a Comment