Daily Gospel Reflection by Fr. Rey An Yatco (10-31-10)

MAGANDANG BALITA NGAYON - IKA-31 LINGGO SA KARANIWANG PANAHON (Okt. 31)
by Rey An Yatco on Sunday, October 31, 2010 at 6:42am

LUKAS 19: 1-10

Nakilala ni Zaqueo si Jesus

1 Pumasok si Jesus sa Jerico at naglakad sa kabayanan. 2 May isang tao roong ang pangalan ay Zaqueo, isang pinuno ng mga maniningil ng buwis at napakayaman. 3 Sinisikap niyang makita si Jesus upang makilala kung sino ito, ngunit sa dami ng tao, hindi niya ito makita dahil sa siya'y pandak. 4 Kaya't patakbo siyang nauna sa dadaanan ni Jesus at umakyat sa isang puno ng sikamoro. 5 Pagtapat ni Jesus sa lugar na iyon, tumingala siya kay Zaqueo at sinabi, "Zaqueo, bumaba ka agad sapagkat kailangan kong tumuloy ngayon sa iyong bahay."

6 Nagmamadaling bumaba si Zaqueo, at tuwang-tuwang tinanggap si Jesus sa kanyang bahay. 7 Lahat ng nakakita nito ay nagbulung-bulungan. "Nakikituloy siya sa isang makasalanan," sabi nila.

8 Tumayo si Zaqueo at sinabi niya kay Jesus, "Panginoon, ipamimigay ko po sa mga mahihirap ang kalahati ng aking mga kayamanan. At kung ako'y may nadayang sinuman, isasauli ko ito sa kanya ng maka-apat na beses."

9 At sinabi sa kanya ni Jesus, "Ang kaligtasan ay dumating ngayon sa sambahayang ito sapagkat anak din ni Abraham ang taong ito. 10 Ang Anak ng Tao ay naparito upang hanapin at iligtas ang naligaw."



MAGNILAY:

Ang kuwento ni Zaqueo ay isa na namang okasyon kung paano sinosorpresa tayo ng biyaya ng Diyos. Sinong mag-aakala na ang magbebenepisyo sa biyaya ni Hesus ay ang publikano ito? Wala sigurong nag-isip na siya ang tatamaan ng mga aral ng Panginoon, o siya talaga ang puntirya ng Panginoon. Si Hesus ang mismong lumapit at tumingala sa kanya noong siya ay nasa itaas ng puno. Siya talaga ang target ng Panginoon.



Hindi naman nagkamali ang Panginoon. Tumugon si Zaqueo sa kanyang paanyaya. Kahit iniintriga siya ng mga tao hindi niya ito ininda. Ang mahalaga, tumimo sa puso niya ang mensahe ng Panginoon at kailangan niya itong tugunin. Pinatunayan niya ang sinseridad ng kanyang kagustuhang magbago. Hindi nabigo sa kanya si Hesus.



Ano nga ba ang mga palatandaan ng isang tunay na pagsisisi na maaaring makita natin kay Zaqueo?



Una, ang pagkilala sa katotohanan ng kasalanan. Totoo ang kasalanan. Realidad ito. Sa panahon natin, marami na ang hindi kumikilala sa realidad ng kasalanan. Hindi naman ako nagnakaw e, kinuha ko lang. Hindi naman ako nagsinungaling, nagkamali lang ako ng interpretasyon. Hindi naman ako nangalunya, naglibang lang sandali. Hindi naman ako pumatay ng sanggol sa sinapupunan, hindi ko lang tinuloy ang aking pagbubuntis. Lahat ng ito, at marami pang iba, ay tusong pagtatakip sa realidad ng kasalanan. Walang tunay na pagsisisi sa naglilikot sa kahulugan ng kasalanan. Ang kasalanan ay kasalanan! Halimabawa si Zaqueo sa pagbigay-pangalan sa kanyang nagawang kasalanan - ang pandaraya. Bilang maniningil ng buwis, karaniwan itong kasalanan na kaniyang nagagawa. Malinaw niyang dineklara kung ano ang kanyang kasalanan.



Ikalawa, ang pag-amin sa pagiging makasalanan o sa kasalanang nagawa. Isang lalaki ang lumapit sa pari at nagtanong: Pader, ano po ba ang unang dapat gawin ng mga makasalanang tulad ko upang maligtas? Sagot ni Pader: Nagawa mo na ang unang hakbang - ang aminin na ikaw ay makasalanan at nagkasala. Hangga't hindi umaamin at umaako sa kasalanang nagawa ay hindi magsisimula ang tunay na pagsisisi. Magaling tayo sa paglusot sa kasalanan. Kayang-kaya natin imanipula ang sitwasyon. Nababaligtad natin ito. Sa huli, bida ka pa. Marami tayong rason para mapawalang-sala. Minsan, ibang tao pa na walang kasalanan ang nadidiin. Lakas-loob ang pag-amin ni Zaqueo ng kanyang kasalanan. Yung pag-akyat lang niya sa puno para makita si Hesus ay pag-amin na siya'y uhaw sa katwiran at naroon ang hangad na magbago. Kahit may sinasabi siya sa buhay, hindi niya inalintana ang umakyat ng puno para masilayan ang Panginoon ng pagpapatawad.



Ikatlo, ang resolusyon na magbago. Ang pagsisisi ay hindi lamang paghingi ng patawad sa kasalanan at tapos na. Bahagi ng pagsisisi ang pagbabagong-buhay. Kailangang talikuran ang lumang buhay at tumahak sa isang panibagong buhay. Hindi puwedeng sorry lang. May desisyon dapat na magbago ng landas. Ang kumpisal ay hindi lang paghuhugas ng kasalanan para makagawa uli. Hindi ito pagbabawas ng kasalanan para makapagdagdag. Si Zaqueo ay hindi lang nagsisi. Pinakita niya ito sa konkretong paraan. Naroon ang resolusyon niyang magkawang-gawa simula noon. Ang dating mandaraya ay ngayon magiging intrumento ng pagtulong sa mahihirap.



Ang huli, reparasyon o pagsasaayos muli ng sira na naidulot ng kasalanan. Dapat ayusin ang nasira sa relasyon, sa sitwasyon, sa reputasyon, at iba pa. Dapat isoli ang kinuha ng hindi makatarungan. Ang nagnakaw ay dapat isoli ang ninakaw kung hindi man sa direkta o saktong paraan, sa indirekta o ibang paraan. Pero dapat may pagsasaayos ng nasira o pagpapanauli ng nawala. Mahirap kapag ang nawala o nasira ay ang karangalan. Matagal itong naisasauli. Ang sugat na dulot ng kasalanan ay minsan mahirap ding gamutin. Nagtatagal ito. Kaya nga, bago gumawa ng kasalanan, mag-isip-isip. Sabi nga, nasa huli ang pagsisisi. Hindi lahat ng nasira ay naaayos. Hindi lahat ng nawala ay naisasauli. Handa si Zaqueo na ibalik kung ano ang kanyang kinupit niya sa mga tao. Tanda ito ng kanyang sinseridad. Ibabalik niya ang ninakaw niya sa mga tao.



MANALANGIN:

Panginoon, akayin mo ako sa tunay na pagsisisi. Huwag lang sana ito maging isang sentimental na proseso. Nawa maging simula ito ng paghilom sa mga sugat na naidulot ng aking kasalanan. Maging karanasan nawa ito ng pagsasauli sa mga nasira at nawala dahil sa aking pagkakasala. Maging daan nawa ito ng isang pagbabagong-buhay na pangmatagalan.