LUKAS 11: 27-28
Ang Tunay na Mapalad
27 Habang nagsasalita si Jesus, may isang babaing sumigaw mula sa karamihan, "Mapalad ang babaing nagbuntis at nag-alaga sa iyo."
28 Ngunit sumagot siya, "Higit na mapalad ang mga nakikinig sa salita ng Diyos at tumutupad nito!"
MAGNILAY:
Sa mentalidad ng mga Hudyo, napakamahalaga ang pagbubuntis. Ang isang sinapupunan na mabunga ay itinuturing na pagpapala. Sagisag ng pagpapala ng Diyos ay ang pagkakaroon ng mga anak. Ito ang pangarap ng bawa't babaeng Hudyo. Samantala, ang hindi pagdadalantao ay itinuturing na sumpa. Ang sinapupuinang hindi namumunga ay itinuturing na kawawa, kabag-habag, itinakwil. Talagang aba ang kalagayan ng mga babaeng hindi magkaanak. Mababa ang tingin sa kanila. Makasalanan ang turing sa kanila dahil nga pinarusahan sila ng Diyos.
Sa ating Ebanghelyo, isang babaeng nasa karamihan ang nagparangal sa ina ni Hesus. Una, kinikilala niya ang pagiging pinagpala ng ina ng Panginoon dahil sa pagsisilang sa kanya. Ikalawa, mas higit ang pagpapala niya dahil nga magaling at kilalang tagapagturo si Hesus. Itinuturing pa siyang propeta. Doble ang pagpapala ng ina kung ang anak ay lumaking mabuti, magaling at tanyag.
Gayunapaman, ang bwelta ni Hesus ay meron pang mas higit na pinagpala sa mata ng Diyos kaysa relasyon sa kanya sa dugo at laman. Ito ay ang pakikinig sa kanyang salita at pagtupad nito. Bagama't isang pagpapala ang magdalan-tao, at dobleng pagpapala ang lumaki ang anak na magaling, at lalong pagpapala kung ang anak na ito ay si Hesus na Guro at Propeta, pero sa lahat ng ito, pinakapinagpala ang nakikinig at tumutupad ng kanyang salita.
Ang tugon ni Hesus ay hindi man pagtatwa ng karangalan ng kanyang ina na si Maria. Hindi niya sinasabi na hindi siya pinagpala talaga kahit ba nanay niya ito dahuil nga ang talagang pinagpala ay yaong nakikinig sa kanyang salita. Hindi niya sinasabing hindi nakikinig sa salita ng Diyos ang kanyang ina. Kung tutuusin nga, modelo ng pakikinig sa salita ng Diyos ang kanyang ina. Ang sinasabi niya, ang pagpapala ni Maria ay hindi dahil nanay niya ito o naging karelasyon sa dugo at laman. Si Maria, bagama't pagpapala ang maging ina sa laman, siya ay mas pinagpala dahil nakinig siya at tumupad sa salita ng Diyos na ipinahayag sa kanya.
Ang pagpapala ay nararamdaman sa puso. Ang pagpapala ay nararanasan sa isip at kalooban na dumadaloy sa kilos at gawa. Ito ang nangyayari kapag regular tayo sa pakikinig, pagninilay at pagtupad ng kanyang salita. Sana, bitbit natin ang ating Bibliya araw-araw at nagbubuklat nito para magnilay ng salita ng Diyos. Sana, pumuopunta rin tayo sa kung saan pinapahayag at pinapaliwanag ang salita ng Diyos - sa Misa, seminar, Bible study and sharing. Sana nakikinig din tayo sa salita ng Diyos kapag nagdadasal tayo ng tahimik at mahaba. Nababasa rin natin ang salita ng Diyos sa mga nangyayari sa buhay natin. Kapag dinala natin ang ating mga karanasan sa panalangin at pinagnilayan ito, maririnig natin ang gusto ng Diyops sa atin.
Gawin natin gawi o 'habit' ang pakikinig sa kanyang salita. Mababago ang buhay natin, sigurado yun!
MANALANGIN:
Panginoon, gawin maging laging bukas ang aking isip at puso sa pakikinig ng iyong salita. Bigyan mo rin ako ng kakayahang tuparan ang mga ito sa aking araw-araw na buhay.
No comments:
Post a Comment