UKAS 13: 18-21
Ang Talinhaga ng Buto ng Mustasa
18 Sinabi ni Jesus, "Ano ang katulad ng kaharian ng Diyos? Saan ko ito maihahambing? 19 Ang katulad nito'y isang buto ng mustasa na itinanim ng isang tao sa kanyang halamanan. Ito'y lumaki hanggang sa maging isang punongkahoy, at ang mga ibon ay nagpupugad sa mga sanga nito."
Ang Talinhaga ng Pampaalsa
20 Sinabi pa ni Jesus, "Saan ko ihahambing ang paghahari ng Diyos? 21 Ito ay katulad ng pampaalsa na inihalo ng isang babae sa tatlong bakol na harina, kaya't umaalsa ang buong masa."
MAGNILAY:
Mas madali tayong maakit sa mga diskarteng malakihan, biglaan, isang bagsakan, at madalian. Siyempre, nakikita agad ang resulta. Bonggang-bongga ang dating. Walang kahirap-hirap. Hindi na kailangang maghintay ng kay tagal-tagal. Wala tayong pasensya para maghintay.
Pero hindi ito nag diskarte ng Diyos. Sa kanya nagsisimula ang lahat sa maliit hanggang sa lumaki, unti-unti hanggang maabot ang target, paulit-ulit hanggang maperpekto mo ang paraan at dahan-dahan pero sigurado. Tiyaga ang puhunan para sa kanya. Pasensiya at sipag. Paghihirapan mo talaga dahil kung hindi baka himndi mo ito pahalagahan. Maghihintay ka dahil sa paghihintay naaalis ang mga maling intensyon at akala. Matututo ka sa kasusubok at pagkakamali. Sa ganitong diskarte naniniwala ang Diyos na mas matibay ang magiging pundasyon nito dahil may paghubog na nagaganap sa sarili. Mas malalim ang pinaghuhugutan ng motibasyon sa gawa dahil paniniwala, kombiksyon at pananampalataya ang pinanggagalingan nito.
Sa pananampalataya mahalaga sa Diyos ang consistency. Mahaba at matagal na proseso pero walang paraan para mabuo at sukatin ang consistency kundi sa ganitong paraan. Mahalaga sa kanya ang hindi pabago-bago. Anuman ang maging sitwasyon pareho pa rin ang paniniwala at kombiksyon. Hindi interesado ang Diyos sa mga biglaan at bongga pero mababaw at malabnaw, mga madaliang swerte na hindi pinaghirapan kaya hindi rin pinapahalagahan. At dahil hindi dumaan sa ganitong proseso mas madali rin mawala at iwanan. Ang katapatan sa isang bagay ay nabubuo sa hirap at tiyaga at tagal ng panahon. Kaya nga hindi tumataya ng lotto ang Panginoon para makuha tayo. Pinagtitiyagaan tayo niya tayo. Pinagpapasensiyahang turuan at hubugin.
Buto ng mustasa at pampaalsa sa harina. Ito ay mga larawang nagpapaalala sa atin ng tiyaga, hirap, pasensiya kahit unti at maliit para makamit ang Kaharian ng Diyos. Pag dumating naman ang kanyang Kaharian, sobrang laki, lagpas sa ating inaasahan!
MANALANGIN:
Panginoon, turuan mo ako ng tiyaga at pasensiya. Tulungan mo akong pahalagahan ang paghubog kaysa mga biglaang pagkakamit ng mga bagay na ninanais ko. Maunawaan ko rin nawa ang importansiya ng mga maliliit pero consistent na mga ginagawa ko para matamo ang iyong Kaharian. Sa ganitong paraan ko makakamit ang tunay mong paghahari.
No comments:
Post a Comment