LUKAS 1: 26-38
Ipinahayag ang Pagsilang ni Jesus
26 Nang ikaanim na buwan ng pagdadalang-tao ni Elisabet, ang anghel na si Gabriel ay isinugo ng Diyos sa Nazaret na isang lunsod sa Galilea, upang kausapin ang 27 isang dalaga na ang pangala'y Maria. Siya ay nakatakda nang ikasal kay Jose, isang lalaking buhat sa angkan ni Haring David. 28 Lumapit ang anghel sa dalaga at binati ito, "Magalak ka! Ikaw ay lubos na kinalulugdan ng Diyos. Sumasaiyo ang Panginoon!"
29 Naguluhan si Maria at inisip niyang mabuti kung ano ang kahulugan ng ganoong pangungusap. 30 Sinabi sa kanya ng anghel, "Huwag kang matakot, Maria, sapagkat naging kalugud-lugod ka sa Diyos. 31 Makinig ka! Ikaw ay maglilihi at manganganak ng isang sanggol na lalaki, at siya'y papangalanan mong Jesus. 32 Siya'y magiging dakila at tatawaging Anak ng Kataas-taasang Diyos. Ibibigay sa kanya ng Panginoong Diyos ang trono ng kanyang amang si David upang 33 maghari sa angkan ni Jacob magpakailanman. Ang kanyang paghahari ay pangwalang hanggan."
34 "Paano pong mangyayari ito gayong ako'y isang birhen?" tanong ni Maria.
35 Sumagot ang anghel, "Sasaiyo ang Espiritu Santo at mapapasailalim ka sa kapangyarihan ng Kataas-taasang Diyos. Dahil dito, ang isisilang mo'y banal at tatawaging Anak ng Diyos. 36 Hindi ba't alam ng lahat na ang kamag-anak mong si Elisabet ay baog? Gayunma'y naglihi siya at ngayo'y ikaanim na buwan na ng kanyang pagdadalang-tao kahit na siya'y matanda na, 37 sapagkat walang anumang bagay na hindi kayang gawin ng Diyos."
38 Sumagot si Maria, "Ako'y alipin ng Panginoon. Mangyari nawa sa akin ang iyong sinabi." Pagkatapos, umalis na ang anghel.
MAGNILAY:
Ang Sto. Rosario ay isang panalangin kung saan pinagninilayan natin kung paano tinupad ng Diyos ang kanyang pangakong pagliligtas sa pagdating ng ating Panginoong Hesukristo. Sa pagninilay natin ng mga misteryo ng buhay ni Hesus, sinasariwa natin kung paano noon pa man ang Diyos ay pumasok sa kasaysayan ng tao upang magpakilala at ipaalam ang kanyang planong pagliligtas. Lahat ng pangako ng Lumang Tipan ay tinupad sa pagsusugo niya sa kanyang Anak na si Hesus. Sa pagninilay natin ng kasaysayan ng kaligtasan, nakikita rin natin kung paano ang Diyos patuloy na kumikilos sa ating personal na kasaysayan at kasaysayan ng mundo ngayon. Ang Diyos ay nangungusap sa atin sa pamamagitan ng mga pangyayari sa araw-araw nating buhay. Ang isang nananampalataya ay nagninilay at binabasa ang pangungusap ng Diyos sa nangyayari sa kanyang buhay at sa buong mundo. Kaya nga, ang Rosaryo ay nagtuturo sa atin magnilay ng mga pangyayari. Ito ang paraan ng pagpapakilala ng Diyos ng kaniyang sarili at ng kanyang plano. Habang binabalikan natin ang aklat ng nakaraan, binubuksan naman natin ang aklata ng kasalukuyan. Sa gayong paraan, naliliwanagan tayo sa kilos ng Diyos ngayon.
Ang Sto. Rosario ay panalanging pagpaparangal din sa Ina ng Panginoon, ang Mahal na Birheng Maria, na sa buhay niya nagningning ang grasya ng Diyos. Napupuno siya ng grasya ng Panginoon. Siya ay larawan ng nilalang na lubos na kinalugdan ng Diyos. Sa kanya, nagkatawang-tao ang Anak ng Diyos. Ang pagpaparangal kay Maria ay pagpaparangal sa Diyos na nagbigay-dangal sa kanya. Siya'y inspirasyon natin sa pagtahak sa landas ng kasaysayan ng pagliligtas ng Diyos. Sa mga misteryo man ng tuwa o hapis, ng liwanag at luwalhati, ang Diyos ay naroon upang maging kaagapay natin.
MANALANGIN:
Panginoon, turuan mo kaming pahalagahan ang mga pagpapakilala mo sa amin sa kasaysayan ng aming buhay. Tulungan mo kaming mabasa ang iyong salita sa mga nangyayari sa aming buhay upang lubos kaming makatugon sa banal mong pagtawag.
Mahal na Birhen ng Sto. Rosario, ipanalangin mo kami.
No comments:
Post a Comment