MATEO 2: 13-18
Ang Pagtakas Papunta sa Egipto
13 Pagkaalis ng mga matatalinong tao, nagpakita kay Jose sa panaginip ang isang anghel ng Panginoon. Sinabi nito sa kanya, "Bumangon ka't dalhin mo agad sa Egipto ang iyong mag-ina. At huwag kayong aalis doon hangga't hindi ko sinasabi sapagkat hahanapin ni Herodes ang bata upang patayin." 14 Bumangon nga si Jose at nang gabi ring iyon, dinala niya sa Egipto ang kanyang mag- ina. 15 Doon sila nanirahan hanggang sa mamatay si Herodes. Sa gayon, natupad ang sinabi ng Panginoon sa pamamagitan ng propeta: "Tinawag ko ang aking anak mula sa Egipto."
Ipinapatay ang Maliliit na Batang Lalaki
16 Galit na galit si Herodes nang malaman niyang nilinlang siya ng mga matatalinong tao. Kaya't ipinapatay niya ang lahat ng batang lalaki sa Bethlehem at sa palibot nito mula sa gulang na dalawang taon pababa, batay sa panahong sinabi sa kanya ng mga matatalinong tao.
17 Sa gayon, natupad ang sinabi ni Propeta Jeremias:
18 "Narinig sa Rama ang isang tinig,
tinig ng pananangis at ng malakas na panaghoy.
Tinatangisan ni Raquel ang kanyang mga anak.
Ayaw niyang paaliw sapagkat patay na sila."
MAGNILAY:
Maganda ba ang alaala mo ng iyong pagkabata? Kung oo, salamat sa iyong mga magulang at mga mahal mo sa buhay lalo na ang pamilya sa pagkakaloob ng ganoong pagkakataon. Salamat at nagampanan nila ang kanilang tungkulin na bigyan ka ng isang maganda, masaya at maayos na pagkabata na baon mo sa iyong pagtanda. Hindi lahat may magandang alaala ng pagkabata. May mga ayaw mabalikan ang kanilang pagkabata. Puno ng sugat, mapait na alaala, at trauma ang pagkabata ng iba. Napagkaitan sila ng isang pagkabata na baon nila sa pagtanda at nanaising balik-balikan.
Sa pagsilang ni Hesus, maraming bata ang naging biktma ng kalupitan ni Herodes. Larawan ito ng pagsasamantala ng malalakas sa mahihina. Ang mga walang kamalay-malay at walang kalaban-laban ay naisakripisyo dahil sa inseguridad ng isang tao. Kailnagan pang dumanak ang kanilang dugo para lamang masagip ang Manunubos. Ngayon, alam nating hindi sila pinabayaan ng Diyos. Sinagip sila ang Manunubos upang magtamasa ng kasiyahang higit sa naipagkait sa kanila.
Gayunpaman, hindi kailangang magdusa ng ganoong katindi ang mga walang malay na sanggol. Kayrami ng mga biktimang bata magpahanggang ngayon mula sa mga taha-tahanan natin kung paano pinagmamalupitan at pinagkakaitan natin ang mga bata ng wastong pagpapalaki at paghubog hanggang sa lipunan kung saan ang mga bata ay sistematikong pinagsasamantalahan at pinahihirapan.
Ang araw na ito ay pagdusta sa mga nagmamalupit sa mga bata mua sa maliliit na paraan hanggang sa malalaki. Ikaw, anong sugat ang idinulot mo sa bata dahil sa hindi ayos ang iyong katandaan? Huwag ibaling sa bata ang kabiguan mo sa buhay. Harapin mo ito bilang isang matanda na himndi na kailangang pagdusahin ang mga walang malay na mga bata.
MANALANGIN:
Panginoon, sagipin mo ang mga batang poinagmamalupitan ng mag matatanda. Lumaki nawa silang may kabataang babalikan dahil naging makulay, makahulugan, at masaya ito.
No comments:
Post a Comment