MATEO 2: 13-23
Ang Pagtakas Papunta sa Egipto
13 Pagkaalis ng mga matatalinong tao, nagpakita kay Jose sa panaginip ang isang anghel ng Panginoon. Sinabi nito sa kanya, "Bumangon ka't dalhin mo agad sa Egipto ang iyong mag-ina. At huwag kayong aalis doon hangga't hindi ko sinasabi sapagkat hahanapin ni Herodes ang bata upang patayin." 14 Bumangon nga si Jose at nang gabi ring iyon, dinala niya sa Egipto ang kanyang mag- ina. 15 Doon sila nanirahan hanggang sa mamatay si Herodes. Sa gayon, natupad ang sinabi ng Panginoon sa pamamagitan ng propeta: "Tinawag ko ang aking anak mula sa Egipto."
Ipinapatay ang Maliliit na Batang Lalaki
16 Galit na galit si Herodes nang malaman niyang nilinlang siya ng mga matatalinong tao. Kaya't ipinapatay niya ang lahat ng batang lalaki sa Bethlehem at sa palibot nito mula sa gulang na dalawang taon pababa, batay sa panahong sinabi sa kanya ng mga matatalinong tao.
17 Sa gayon, natupad ang sinabi ni Propeta Jeremias:
18 "Narinig sa Rama ang isang tinig,
tinig ng pananangis at ng malakas na panaghoy.
Tinatangisan ni Raquel ang kanyang mga anak.
Ayaw niyang paaliw sapagkat patay na sila."
Ang Pagbalik Mula sa Egipto
19 Pagkamatay ni Herodes, nagpakita kay Jose sa panaginip ang isang anghel ng Panginoon habang siya'y nasa Egipto. 20 Sinabi sa kanya ng anghel, "Bumangon ka. Iuwi mo na sa Israel ang iyong mag-ina sapagkat patay na ang mga nagtatangka sa buhay ng bata." 21 Kaya't bumangon nga si Jose at iniuwi sa Israel ang kanyang mag-ina.
22 Ngunit nang mabalitaan niyang naghahari sa Judea si Arquelao na anak ni Herodes, natakot siyang pumunta roon. At dahil binigyan siya ng babala sa kanyang panaginip, sila ay tumuloy sa Galilea, 23 at doon nanirahan sa bayan ng Nazaret. Sa gayon, natupad ang sinabi ng mga propeta: "Siya'y tatawaging Nazareno."
MAGNILAY:
Sadyang gaano nga ba kahalaga at hindi dapat ipagwalang-bahala ang buhay pamilya? Si Hesus, ang Anak ng Diyos, nang magkatawang-tao ay kinailangang maging bahagi ng pamilya nina Maria at Jose. Ganoon kahalaga ang buhay pamilya. Mismong ang Anak ng Diyos ay kinailangang hubugin sa loob ng pamilya.
Ang Nazaret ang kumakatawan sa buhay-pamilya ng Panginoon. Dito niya ginugol ang mas marami taon ng kanyang buhay. Dito hinubog ang kanyang personalidad. Dito niya natutunan ang pakikipagkapwa-tao. Dito nabuo ang kanyang mga pananaw at paniniwala. Dito pinagtibay ang kanyang relasyon sa Ama. Ang Nazaret ang naging pundasyon ng kanyang misyon na maging Mesiyas, Tagapagligtas at Manunubos ng sanlibutan.
Tayo man ay may kanya-kanyang Nazaret. Ito ay ang ating buhay-pamilya. Ang Nazaret ay eskwelahan. Ang pamilya ay paaralan ng mga importanteng leksyon ng buhay.
Una, ang pamilya ay eskwelahan ng paghubog ng ating karakter. Sa tahanan natututunan natin ang ating ugali at asal. Dito nagsisimula ang ating pagpapahalaga sa sarili. Dito rin nabubuo ang kompiyansa natin sa sarili. Ito rin ang pundasyon ng ating pananaw at paniniwala sa buhay. Kung paano nabubuo sa tahanan ang karakter natin, potensyal din ang tahanan para sirain ito. Maraming hinding magandang kaganapan sa lipunan tulad ng korupsyon ang ugat ang pamilya. Maaaring dito namana, o hinfi naituro, o naituro pero kulang sa pagiging epektibo. Maraming sugat sa pagkatao natin na dulot ng pamilya. Ito ang pumipigil upang magampanan natin ang ating misyon sa lipunan. Maraming dapat hilumin sa sarili natin bago bumalangkas sa ating magandang bukas.
Ikalawa, ang pamilya ay eskwelahan kung paano magmahal sa tunay nitong kahulugan. Sa tahanan dapat maranasan kung paano tanggapin at mahalin kung sino at ano tayo. Sa pamilya natututunan nating ang pag-ibig ay hindi makasarili kundi pagkakaloob ng sarili para sa iba tulad ng ating mga magulang. Kapag hindi tayo natuto ng pag-ibig sa loob ng tahanan, matuto man tayo sa iba tungkol sa pagmamahal, ay may kulang sa leksyon natin sa pag-ibig. Walang puwedeng pumalit sa papel ng pamilya sa pagtuturo ng pag-ibig.
Panghuli, ang tahanan ay ekwelahan ng pananampalataya. Sa pamilya dapat matuklasan ang pagmamahal ng Diyos at kung paano siya paglingkuran. Ang mapagmahal na pamilya ay malaking susi para makapasok tayo sa mundo ng pananampalataya. Ang mga magulang ang unang guro ng pananampalataya. Sa kanilang halimbawa dapat mabanaagan ang buhay Kristiyano. Mahirap unawain ang Diyos bilang mapagmahal na magulang kung sa tahanan kabaligtaran ang nararanasan.
Sa kapistahan ng Banal na Pamilya, mabasbasan nawa ang lahat ng pamilya lalo na ang mga kristiyanong pamilya. Maging mas seryoso nawa tayo sa ating responsibilidad sa ating mga kanya-kanyang pamilya.
MANALANGIN:
Panginoong Hesus, manahan ka sa aming mga tahanan. Nawa ang aming pamilya ang iyong maghing bagong Nazaret kung saan kami ay matututo kung paano maging matapat mong mga alagad.
No comments:
Post a Comment