MAGANDANG BALITA NGAYON - IKASIYAM NA ARAW NG SIMBANG GABI (Dis. 24)
by Fr. Rey Anthony Yatco on Thursday, December 23, 2010 at 4:06pm
LUKAS 1: 67-79
Ang Awit ni Zacarias
67 Si Zacarias na ama ng bata ay napuspos ng Espiritu Santo,
at nagpahayag ng mensahe mula sa Diyos:
68 "Purihin ang Panginoong Diyos ng Israel!
Tinulungan niya at pinalaya ang kanyang bayan.
69 Nagsugo siya sa atin ng isang makapangyarihang Tagapagligtas,
mula sa angkan ni David na kanyang lingkod.
70 Ito'y ayon sa ipinangako niya noong una sa pamamagitan ng kanyang mga banal na propeta,
71 na ililigtas niya tayo mula sa ating mga kaaway,
mula sa kamay ng lahat ng napopoot sa atin.
72 Ipinangako niyang kahahabagan ang ating mga ninuno,
at aalalahanin ang kanyang banal na tipan.
73 Ipinangako niya sa ating ninunong si Abraham,
74 na ililigtas niya tayo sa ating mga kaaway,
upang tayo'y makapaglingkod sa kanya nang walang takot,
75 at maging banal at matuwid sa kanyang paningin habang tayo'y nabubuhay.
76 Ikaw, anak ko, ay tatawaging propeta ng Kataas-taasang Diyos;
sapagkat mauuna ka sa Panginoon upang ihanda ang kanyang daraanan,
77 at upang ipaalam sa kanyang bayan ang kanilang kaligtasan,
ang kapatawaran ng kanilang mga kasalanan.
78 Mapagmahal at mahabagin ang ating Diyos.
Magbubukang-liwayway na sa atin ang araw ng kaligtasan.
79 Tatanglawan niya ang mga nasa kadiliman at nasa lilim ng kamatayan,
at papatnubayan tayo sa daan ng kapayapaan."
80 Lumaki ang bata at naging malakas ang kanyang espiritu. Siya'y nanirahan sa ilang, hanggang sa araw na magpakilala siya sa bansang Israel.
MAGNILAY:
Na-congratulate mo na ba ang sarili mo? Na-congratulate hindi dahil nagbubuhat ka ng sarili mong bangko o dahil sa ang galing-galing ng pakiramdam mo sa sarili mo kaya gusto mong magyabang o dahil sa gusto mong ipamukha sa sarili mo na talagang mas magaling ka sa iba. Na-congratulate dahil gusto mo lang talagang kilalanin ang magandang nagawa mo at ang mga biyayang pinagkaloob sa iyo bilang pribilehiyo na ginamit mo sa maganda.
Tulad ni Maria, si Zacarias ay may awit din ng papuri sa Diyos dahil sa magagandang bagay na ipinamalas sa kanya at sa bayang Israel. Nang mamulat siya sa kagandang-loob ng Diyos na kumikilos sa buhay niya, kapagdaka'y nakapagsalita siya at namutawi sa kanyang mga labi ang pagpupuri sa Diyos.
Benedictus ang titulo ng awit ni Zacarias. Ito kasi ang unang salita sa Latin ng awit na ito. Sa Ingles ay Blessed (be the Lord). Ang benedictus ay galing sa dalawang salitang Latin: bene (mabuti) at dicere (magsalita). Kung gayon, magsalita ng maganda sa Diyos ang layunin n gawit na ito. Purihin siya sa mga magagandang ginawa niya. Pasalamatan siya sa kanyang kagandahang-loob.
Nagkakapalit din ng kahulugan ang mga salitang blessing at thanksgiving sa Bibliya. Ang to bless ay nangangahulagan din ng to give thanks. Kaya't kapag tayo ay nagpupuri sa Diyos, nagpapasalamat din talaga tayo sa kanya. Ang salita blessed ay banal din ang kahulugan. Kung gayon ang buhay pagpapakabanal ay buhay ng pagkilala at pagpapasalamat sa blessings ng Diyos. Kung bulag ka sa mga blessings mo, malayo ka pa sa talagang kabanalan.
Punuin natin ng pag-bless ang kapaskuhang ito. Magsalita tayo ng mabuti at maganda. Una, i-congratulate natin ang sarili natin sa mga magagandang nagawa natin dahil sa inspirasyon ng Panginoon. Tapikin natin ang balikat natin sa mga accomplishments natin. I-recognize natin ang mga pagkakataon na naging mabuti at mabait tayong tao. Ang papuri at ppasasalamat ay ibinabalik natin sa kanya. Ikalawa, i-congratulate din natin ang iba - ang asawa mo, mga anak, mga kaibigan, mga katrabaho, at iba pang nakitaan mo ng kabutihan. Panahon ngayon para magsalita ng mabuti sa kanila. Makapangyarihan ang salita. Nakakabuo ito ng pagkatao. Nakakasira rin kapag ginamit natin ito para saktan ang iba.
Sa huli, i-congratulate natin ang Diyos. I-bless natin siya. Tulad ni Zacarias, papurihan at pasalamatan natin siya. Siya lang ang talagang nagtitiyaga sa atin. Hindi siya tumitigil para mahubog tayo at maging mga mabubutng tao. Siya ang nararapat sa lahat ng papuri at pasasalamat.
MANALANGIN:
Panginoon, congratulations sa inyo sa lahat ng iyong pang-unawa at pagmamahal. Purihin ang iyong pangalan. Pasalamatan ang iyong kabutihan. Maghari ka nawa sa mga puso namin ngayong Pasko at sa araw-araw ng buong buhay namin.
P.S.
Congratulations sa lahat ng nakabuo ng siyam na araw ng Simbang Gabi!
No comments:
Post a Comment