MATEO 1: 1-25
Talaan ng mga Ninuno ni Jesu-Cristo
1 Ito ang talaan ng mga ninuno ni Jesu-Cristo na mula sa angkan ni David na mula naman sa lahi ni Abraham.
2-6 Mula kay Abraham hanggang kay Haring David, ang mga ninuno ni Jesus ay sina: Abraham, Isaac, Jacob na ama ni Juda at ng kanyang mga kapatid, Juda, Fares at Zara na mga anak ni Juda kay Tamar, Esrom na anak ni Fares, Aram, Aminadab, Naason, Salmon, Boaz na anak ni Salmon kay Rahab, Obed na anak ni Boaz kay Ruth, at Jesse na ama ni Haring David.
6-11 Mula naman kay Haring David hanggang sa naging bihag ang mga taga-Juda sa Babilonia, ang mga ninuno ni Jesus ay sina: David, Solomon na anak ni Haring David sa dating asawa ni Urias, Rehoboam, Abias, Asa, Jehoshafat, Joram, Ozias, Jotam, Acaz, Ezequias, Manases, Amos, Josias, Jeconias at ang mga kapatid nito.
12-16 At pagkatapos na sila'y maging bihag sa Babilonia hanggang sa ipanganak si Jesus, ang mga ninuno niya ay sina: Jeconias, Salatiel, Zerubabel, Abiud, Eliakim, Azor, Sadoc, Aquim, Eliud, Eleazar, Matan, Jacob, at si Jose na asawa ni Maria. Si Maria ang ina ni Jesus---ang tinatawag na Cristo.
17 Samakatuwid, may labing-apat na salinlahi mula kay Abraham hanggang kay David, labing-apat mula kay David hanggang sa pagkabihag ng mga Israelita sa Babilonia at labing-apat din mula sa pagkabihag sa Babilonia hanggang kay Cristo.
MAGNILAY:
Marami sa atin ang nakaranas nang maghanap ng ating pangalan sa mahabang listahan ng mga pangalan. Excited tayo makita ang pangalan natin. Nakapasa ba ako sa board exams? Pasado ba ang interview ko? Nakalusot ba ako sa entrance exams? Nakapasok ba ako sa audition? Certified ba akong botante? Malaki ang pag-asa natin na makakasama tayo. Naroon ang pananabik na mapapabilang na ako sa nakapasa, nakapasok, mga qualified. CPA na ako. Abogado na ako. Atenista o La Salista o UP student na ako. May trabaho na ako. Tuwang-tuwa tayo kapag napapabilang tayo sa mga tao o grupo na pinapangarap nating mapasama. Pride natin ang maging kaisa nila. Ipinagmamalaki natin na isa tayo sa kanila.
May isa ring pangarap ang Anak ng Diyos - na siya ay mapabilang sa mga anak ng tao. Sa sobrang pagmamahal niya sa sangkatauhan, minarapat niyang maging kaisa nila at mapabilang sa kanila. Nakilala si Hesus bilang kasama sa angkan ng tao. Kay Hesus, isa itong malaking kasiyahan. Nais niyang mapabilang sa angkan ng tao para hanguin niya ito at iangat para maging angkan ng Diyos.
Ang kaibahan ng pagbilang ni Hesus sa angkan ng tao ay nakikibilang siya sa isang angkang nawalan ng karangalan dahil sa kasalanan. Nakikiisa siya sa isang angkan na nasadlak sa kahihiyan. Oo, may mga taong na nagpakita ng kagitingan, kabayanihan at kabutihan. Pero lahat ay may kanya-kanyang kahinaan, kamalian, kasalanan. Kahit anong sikap ng tao, kulang pa rin para pumasa sa hinihingi ng Diyos. Ito ang nagbunsod para ang Anak ng Diyos ay naghangad maging kaisa ng angkan ng tao kahit pa ang pagkilos na ito ay pagbaba ng lebel. Bumaba nga ang Diyos Anak upang bigyan ang tao ng pag-asa. Bilang tao, pinakita ni Hesus na kaya ng tao magmahal ng ganap sa tulong ng Diyos. Si Hesus ang naging halimbawa ng tao na puwede siyang umabot sa Diyos. Sa krus, ipinakita ni Hesus na may isang tao na puwedeng magmahal ng perpekto at maging masunurin sa Diyos ng ganap. Kaya nga si Hesus ang nagbigay-daan para matubos at maligtas ang sangkatauhan sa kahihiyan ng kasalanan.
Ang mensahe ng pagninilay natin sa talaan ng mga ninuno ni Hesus ay pagpapakumbaba. Maraming problema sa mundo ang ugat ay kayabangan at pagmamataas. Ayaw nating yumukod. Ayaw nating magpakababa at makipag-usap. Gusto natin nasa tuktok. Tayo ang nagdidikta. Tayo ang tinitingala. Tayo ang kinatatakutan. Tayo ang pinagsisilbihan.
Nagpakababa ang Diyos para sa atin. Wala tayong karapatang magmalaki. Iwaksi natin ang pagmamataas. Maraming problema ang masosolusyunan kapag natuto tayong makipag-usap, makipagkasundo, makiramay at makiisa. Kaligtaan na natin ang panghuhusga ng kapwa, panglalait, at diskriminasyon. Higit kailanman ngayon ang may higit na pangangailangan ng makabuluhang pagtutulungan at pagdadamayan. Lahat ng ito ang ugat ay ang pagpapakumbaba.
MANALANGIN:
Panginoon, nakibilang ka sa makasalanang sangkatauhan. Nagpakababa ka para maiangat kami. Matuto nawa kami sa iyong halimbawa. Mabigyang solusyon nawa ang marami naming suliranin dahil marami ang nagdesisyong magpakumbaba.
No comments:
Post a Comment