JUAN 5:33 - 36
33May sinugo kayong mga Judio kay Juan at siya ay nagpatotoo sa katotohanan. 34Hindi ako tumatanggap ng patotoo mula sa tao datapuwat sinasabi ko ang mga bagay na ito upang kayo ay maligtas. 35Siya ang nagniningas at nagliliwanag na ilawan. Kayo ay pumayag na magalak ng maikling panahon sa kaniyang liwanag.
36Ako ay may patotoong mas higit kaysa sa patotoo ni Juan. Ang mga gawain na ipinagkaloob sa akin ng Ama upang tapusin ay nagpapatotoo patungkol sa akin. Ang mga gawaing ginagawa ko ay nagpapatotoong ang Ama ang nagsugo sa akin.
MAGNILAY:
Kinagigiliwan natin ang mga gabi ngayon. Dahil nga panahon ng kapaskuhan kaya't nagniningning ang mga ilaw sa kapaligiran. Mas kinagigiliwan din natin ang ilaw bilang dekorasyon dahil lutang na lutang ang kanyang kariktan sa gitna ng dilim. Kaya nga pinakakinagigiliwan ang mga ilaw kapag kapaskuhan. Ano ang kapaskuhan kapag walang mga ilaw. Ito ang nagbibigay ng buhay sa panahong ito.
Madalas gamitin sa Bibliya ang liwanag para ilarawan ang karanasan sa Diyos. Kapag narinig natin ang kanyang salita ay tila liwanag itong pumapawi sa dilim ng kamang-mangan sa mga bagay na maka-Diyos. Si Juan Bautista ay inilarawan ni Hesus na ilawan dahil ang patotoo niya ay salita ng Diyos na nagbigay liwanag sa mga taong nangungulila sa pagmamahal ng Diyos at sa pagdating ng Mesiyas. Nguni't sinasabi ni Hesus na ang patotoo niya bilang Anak ng Diyos at Mesiyas ay mas lalong malaking ilawan na magbibigay ng higit na liwanag tungkol sa mga pangako ng Diyos. At ito ang imbitasyon niya sa lahat, na lumapit sa kanya tulad ng paglapit natin sa ilawan kapag madilim. Siya ang magbibigay ng liwanag sa puso't isipan natin.
Nagsisimula tayo ng Simbang Gabi. Ito ang pinakanatatanging paghahanda ng mga Pilipino para sa araw ng Pasko. Ang Simbang Gabi ay walang iba kundi ang kagustuhan nating manalangin. At ang panalangin ay walang iba kundi paglapit sa tunay na Ilaw na inaasahan nating gagabay sa ating mga araw-araw na iniisip. Maraming malabo ngayon sa buhay natin. Maraming kaganapan sa lipunan na nalalabuan tayo ano ba talaga ang tama at ano ba ang totoo. Ang daming isyu sa diyaryo araw-araw na umaapekto sa mga sari-sarili nating buhay. Ang daming opinyon ang naririnig natin. Halos magkakatimbang ang mga ito kaya't minsan lito tayo sa kung ano nga ba talaga.
Para tuklasin ang talagang totoo, mahaba-habang proseso ang dadaanan natin. Nguni't ang mahabang proseso na ito ay nagsisimula sa panalangin. Sa panalangin, nakokondisyon ang isip at puso natin na maging bukas at tuklasin ang totoo. Sana, ang panata nating magsimbang gabi ng siyam na araw ay magbigay sa atin ng ganitong bunga. Makondisyon nawa tayo para makinig sa totoo. Kailangan natin lumapit sa talagang Ilaw - si Hesus - para maliwanangan tayo. Kailangan nating lumapit sa Kaototohanan - si Hesus - para matanggap natin ang totoo.
Bawa't-isa sa atin ay liwanag din sa mundo. Ang liwanag na mula kay Hesus ay ibinabahagi natin sa lahat. Layunin din natin maging mga patotoo sa mundo tungol sa salita ng Diyos. Ang salita ng Diyos ang tunay na magbibigay pag-asa sa mga nasa kadiliman. Maging ilaw nawa lahat tayo lalo't balot ng dilim ang mundo natin ngayon.
MANALANGIN:
Panginoon, ngayong nalalapit na ang Pasko gawin mo kaming mas matapang na lumapit sa iyo, ang tunay na Ilaw. Kapag kami ay nasa liwanag, mas nakikita namin ang totoo. Turuan mo kaming mahalin ang totoo kahit minsan masakit ito. Tulungan mo kaming itaguyod ang totoo dahil ang kaototohanan ang magpapalaya sa amin.
No comments:
Post a Comment