MAGANDANG BALITA NGAYON - IKA-3 LINGGO NG ADBIYENTO / LINGGO NG GAUDETE ( Dis. 12)
by Fr. Rey Anthony Yatco on Sunday, December 12, 2010 at 9:32am
MATEO 11: 2-11
2 Nakabilanggo na noon si Juan na Tagapagbautismo. Nabalitaan niya ang mga ginagawa ni Cristo kaya't nagsugo siya ng ilang mga alagad 3 upang itanong, "Kayo po ba ang ipinangakong darating, o maghihintay pa kami ng iba?" 4 Sumagot si Jesus, "Bumalik kayo kay Juan at sabihin ninyo sa kanya ang inyong naririnig at nakikita. 5 Nakakakita ang mga bulag, nakakalakad ang mga pilay, gumagaling at lumilinis ang mga ketongin, nakakarinig ang mga bingi, muling nabubuhay ang mga patay, at ipinapangaral sa mga mahihirap ang Magandang Balita. 6 Mapalad ang taong hindi nag-aalinlangan sa akin!"
7 Nang paalis na ang mga alagad ni Juan, nagsalita si Jesus sa mga tao tungkol kay Juan, "Bakit kayo nagpunta sa ilang? Ano ang nais ninyong makita? Isa bang tambo na hinihipan ng hangin? 8 Bakit kayo pumunta sa ilang? Para makita ang isang taong may mamahaling kasuotan? Ang mga nagdaramit ng ganyan ay nasa palasyo ng mga hari! 9 Ano nga ba ang nais ninyong makita? Isang propeta? Oo, siya'y propeta. At sinasabi ko sa inyo, siya'y higit pa sa isang propeta. 10 Sapagkat si Juan ang tinutukoy ng kasulatan, 'Ipadadala ko ang aking sugo na mauuna sa iyo; ihahanda niya ang iyong daraanan.' 11 Tandaan ninyo: higit na dakila si Juan na Tagapagbautismo kaysa sinumang isinilang sa daigdig, ngunit ang pinakahamak sa kaharian ng langit ay mas dakila kaysa kanya.
MAGNILAY:
Ang ikatlong Linggo ng Adbiyento ay tianatwag na Linggo ng Gaudete. Ang ibig sabihin ng salitang Gaudete ay Magalak Kayo! Sa pagpasok ng Linggong ito mas tumitindi na ang pananababik natin sa araw ng Pasko. Nararamdaman na natin ang galak ng pagdating ng Panginoon. Malapit na ang araw ng kaligtasan. Punung-puno na tayo ng pag-asa at saya. Kay naman simboliko itong pinapakita sa kulay rosas ng araw na ito. Ang Adbiyento ay pagbabalik-loob at pagtitika kaya kulay ube ang namamayaning kulay sa buong panahon pero sa araw na ito ay may kahalong ang galak at pag-asa na ang pagtitikang ito kaya kulay rosas.
Kagalakan ang mensahe ng araw na ito. Pero alam natin na maraming dahilan para hindi maging masaya ngayon. Maraming tao ang nangungulila. Maraming tao ang nahihirapan. Maraming tao ang nawawalan ng pag-asa. Maraming suliraning materyal at emosyonal. Salat ang espiritu natin para magsaya.
Gayunpaman, hindi kailangang magmukmok. Hindi dahil maraming dahilan para hindi maligaya ay hindi na tayo kikilos. Ang hamon ng Linggo na Gaudete ay gumawa ng paraan para bigyang-daan ang kagalakan sa buhay natin. Sa Ebanghelyo ipinatanong ni Juan Bautista sa kanyang mga alagad kung si Hesus na nga ang kanilang hinihintay. Hindi ito sinagot ni Hesus kundi ipinasabi niya na ibalita kay Juan ang narinig at nakita nila na ang mga lugmok sa buhay ay naipanumbalik na ang galak. Sapagka't gumawa si Hesus ng paraan para maalis ang kanilang kalumbayan. Iniabot niya ang kanyang kamay upang damayan sila. At ito ang naging dahilan ng kanilang kagalakan.
Magpunla tayo ng binhi ng kagalakan sa pamamagitan ng pagmamalasakitan, pagdadamayan at pagmamahalan. Kahit anong bigat ng dalahin sa buhay ay gumagaang kapag ikaw ay may kaagapay. At ang mismong nagsisikap mapaligaya ang kapwa ay mas lalong nagkakaroon ng kaligayahan sa kanyang puso na hindi matutumbusan ng kung anumang kayamana sa mundong ito.
MANALANGIN:
Panginoon, galak ang unang kaloob mo sa mga nakakatuklas sa iyong pagmamahal. Gawin mong maging instrumento kami ng galak at pag-asa sa mundo. Sa gitna ng kapighatian matuto nawa kaming magtanim ng binhi ng kagalakan at pag-asa sa puso ng bawa't-isa sa pamamagityan ng aming pagmalasakit at pagdamay sa mga nangangailangan.
No comments:
Post a Comment