MATEO 1: 18-25
Isinilang si Jesu-Cristo
18 Ito ang naganap nang ipanganak si Jesu-Cristo. Si Maria na kanyang ina at si Jose ay nakatakda nang magpakasal. Ngunit bago sila makasal, nalaman ni Maria na siya'y nagdadalang-tao sa pamamagitan ng kapangyarihan ng Espiritu Santo. 19 Subalit dahil isang taong matuwid si Jose na kanyang mapapangasawa, at ayaw nitong malagay sa lubos na kahihiyan si Maria, binalak niyang hiwalayan si Maria nang palihim.
20 Ngunit habang pinag-iisipan ito ni Jose, nagpakita sa kanya sa panaginip ang isang anghel ng Panginoon. Sinabi nito sa kanya, "Jose, anak ni David, huwag kang matakot na pakasalan si Maria, sapagkat ang sanggol na dinadala niya ay mula sa Espiritu Santo. 21 Magsisilang siya ng isang batang lalaki at Jesus ang ipapangalan mo sa sanggol sapagkat ililigtas niya ang kanyang bayan sa kanilang mga kasalanan."
22 Nangyari nga ang lahat ng ito upang matupad ang sinabi ng Panginoon sa pamamagitan ng propeta,
23 "Tingnan ninyo; 'Maglilihi ang isang birhen at magsisilang ng isang sanggol na lalaki, at tatawagin itong Emmanuel.' " (Ang kahulugan nito'y "Kasama natin ang Diyos").
24 Nang magising si Jose, sinunod nga niya ang utos ng anghel ng Panginoon at pinakasalan niya si Maria. 25 Ngunit hindi niya sinipingan si Maria hanggang magsilang ito ng isang anak na lalaki. At Jesus nga ang ipinangalan ni Jose sa sanggol.
MAGNILAY:
Nakaramdam ka na ba ng parang may gusto kang gawin na kakaiba sa buhay mo at hindi ka mapakali hangga't hindi ito nagiging malinaw kung ano ito para magawa mo? Hindi ka makatulog, lagi itong sumasagi sa isip mo, hindi ito maalis-alis kahit anong iwas mo, bubulung-bulong ito sa puso na parang nagpapansin? Gusto mo siyang komprontahin pero natatakot ka rin dahil nararamdaman mo na babaguhin nito ang direksyon ng buhay mo e baka hindi mo makaya o hindi ka pa handa. Natatakot ka man pero alam mo na ito ang magpapaligaya sa iyo kahit iwan mo pa ang lahat ng kung ano meron ka sa ngayon. Kapatid, kung nakakaramdam ka ng ganito baka nararanasan mo na ang talagang TAWAG mo!
Ang Ebanghelyo natin ngayon ay kuwento tungkol sa TAWAG. May sarili ng plano sina Jose at Maria para sa kanilang buhay. Nakatakda na silang ikasal. Naka-plantsa na siguro ang direksyon ng kanilang buhay. Hanggang dumating ang talagang TAWAG nila. Nang harapin nila ang TAWAG na tinakda ng Diyos sa kanila, nabagong lahat ang daloy ng kanilang buhay. Nalagay sa alanganin ang kanilang pagpapaksal. Nagdalan-tao si Maria. Makikipagkalas si Jose. Naguluhan ang dalawa lalo na si Jose. Ano ba talaga? Bakit ganito? Tatakasan ko ito. Pero hindi ko naman matakasan. Hindi natin maiisip marahil ang krisis na dinaanan ng dalawa. Sigurado naroon at nag-uumpugan ang dalawang magkasalungat na desisyon: iiwas ako sa nakakatakot na TAWAG na ito o isusuko ko ang lahat-lahat sa akin para sa TAWAG na ito. Sa kuwento nina Jose at Maria, nakuha nilang isuko ang kanilang buong sarili kasama ang mga naunang mga plano nila para sa TAWAG na maging mga magulang ng Manunubos.
Lahat tayo ay may nakatakdang TAWAG. May pinaka-TAWAG tayo kung saan ito ang magbibigay ng pangkalahatang direksyon sa buhay natin. Lahat ng gagawin at desisyon natin ay iikot dito. May mga maliliit na TAWAG din tayo na suporta sa pinaka-TAWAG natin. Hindi kailanman magiging lubos ang ligaya natin hangga't hindi natin natutugunan ang TAWAG na ito. Hahabulin at hahabulin tayo nito at hindi tayo tatantanan hangga't hindi tayo umuoo sa kanya. Bubuntu't-buntot siya kahit iwasan o hindian natin siya. Gayunpaman, alam natin na ito ang makakapag-bigay sa atin ng tunay na ligaya. Kaya nga, hinahabol din talaga natin siya kahit natatakot tayo sa magiging mga pagbabago kapag tinuluy-tuloy natin ito. Alam natin na galing ito sa Diyos na nagtatakda ng direksyon sa buhay natin. Alam natin na ang TAWAG na ito ay magpapakita sa atin ng kung ano ba talaga ang kontribusyon natin sa lipunan at sa buong mundo. Ano bang serbisyo ang maiiaambag ko para sa sangkatauhan?
Ito ang dapat nating tuklasin sa buhay natin. Napakababaw kung ang pangarap lang natin ay maging mayaman kahit hindi masaya. Minsan nananatili tayo sa isang trabaho dahil lang sa malaking suweldo pero alam mo na hinihila mo lang ang paa mo araw-araw para gawin ito. Hindi ito ang talagang gusto mo. Karaniwan, ang hanap natin ay ginhawa at madaling buhay gayong ang tunay na nagbibigay ng kahulugan at malalim na kaligayahan sa puso natin ay nakakamit sa sakripisyo at pagbibigay ng sarili para sa ikabubuti ng iba. Sa trabaho, kumikita lang tayo hindi nagseserbisyo.
Ang buhay ay patuloy na pagtuklas sa TAWAG na itinakda ng Diyos. Kaya't araw-araw nakikinig tayo sa bulong ng Diyos sa puso natin. Nagdarasal tayo araw-araw kasi doon bumubulong ang Diyos. Makinig tayo. Makinig tayo ng mabuti. Talasan natin ang pandinig ng puso natin. Harapin natin ang TAWAG natin.
MANALANGIN:
Panginoon, mabigyang inspirasyon nawa kami nina Jose at Maria na dahil sa pagtugon sa kanilang TAWAG ay nailuwal sa mundo ang Manunubos ng lahat. Naging mabuting magulang sila at ito ang naging sanhi ng matindi nilang kaligayahan. Piliin ko rin nawang maging maligaya sa pamamagitan ng pagtuklas sa sarili kong TAWAG at tugunin ito. Huwag sana akong matakot na isuko ang lahat matupad ko lang ang itinakda mo para sa akin.
No comments:
Post a Comment