MATEO 21: 28-32
Ang Talinhaga Tungkol sa Dalawang Anak
28 "Ano ang palagay ninyo rito? May isang taong may dalawang anak na lalaki. Lumapit siya sa nakatatanda at sinabi, 'Anak, pumunta ka ngayon sa ubasan at magtrabaho ka roon.' 29-30 'Ayoko po,' tugon nito, ngunit nagbago ito ng pasya at nagtrabaho sa ubasan. Lumapit din ang ama sa ikalawa at ganoon din ang kanyang sinabi. At tumugon ito, 'Opo,' ngunit hindi naman pumunta sa ubasan. 31 Sino sa dalawa ang sumunod sa kalooban ng kanyang ama?"
"Ang nakatatanda po," sagot nila.
Sinabi sa kanila ni Jesus, "Tandaan ninyo: ang mga maniningil ng buwis at ang mga bayarang babae ay nauuna pa sa inyong pasakop sa paghahari ng Diyos. 32 Sapagkat naparito sa inyo si Juan at itinuro ang pagsunod sa kalooban ng Diyos, at hindi ninyo siya pinaniwalaan, ngunit naniwala sa kanya ang mga maniningil ng buwis at ang mga bayarang babae. Nakita ninyo ito subalit hindi pa rin kayo nagsisi't tumalikod sa inyong mga kasalanan, at hindi rin kayo naniwala sa kanya."
MAGNILAY:
Kung hindi ka nagiging mas mabuti ay nagiging mas masama ka. Kung hindi ka nagiging mas mabuti ay hindi ka na nagiging mabuti.
May dalawang uri ng pagtugon ang pinapakita ng Ebanghelyo ngayon. Ang unang anak ay unang tumangging tumulong sa kanyang ama sa ubasan. Kaya lang, napagtanto siguro na mali ang kanyang ginawa kaya't kahit tumanggi noong una ay nagpunta rin kinalaunan. Ang ikalawang anak naman ay positibong tumugon noong una. Tutulong siya sa ama kaya lang nagbago ng isip. Tinamad ba? Naaya sa kung saan? Sa huli, hindi siya nagpunta sa ubasan.
Sa dalawang pagtugon na ipinakita ng magkapatid, masasabi nating ang unang anak ay umangat ng antas. Mula sa pagsuway ay nauwi sa pagsunod. Mali noong una nguni't nakuhang itama ang kanyang naging mali. Sa kabilang banda naman, ang ikalawang anak na mabuti sa simula ay bumaba ang antas. Mula sa pagsunod ay nauwi naman sa pagsuway. Hindi siya naging mas mabuti kaya't naging mas masama siya. At dahil hindi siya naging mas mabuti ay hindi na siya nagiging mabuti. Samantala, ang nagsimula ng masama ay ngayon naging mabuti.
Ang aral ng ating Ebanghelyo ngayon ay puntiryahin lagi ang maging mas mabuti. Kung ano tayo ngayon ay lagpasan natin upang maging mas angat. Hindi tayo dapat tumigil sa direksyon ng pagiging mas mabuti. Hindi tayo dapat makontento na lang sa kung ano na ang ginagawa natin ngayon. Lagi nating higitan kung ano na ang nagawa natin. Ito ang tunay na pagpapakabuti. Muli, kapag hindi tayo nagiging mas mabuti ay nagiging mas masama na tayo. At kapag hindi na tayo nagiging mas mabuti ay hindi na tayo nagiging mabuti at tumitigil na tayo sa pagiging mabuti.
MANALANGIN:
Panginoon, tulungan mo akong laging higitan ang pagmamahal na naipakita ko na sa iyo. Ipakita mo na may mas maaabot pa ako sa larangan ng pagpapakabuti hanggang matamo ko ang kaganapan ng kabutihan sa iyong kaharian.
No comments:
Post a Comment