MATEO 1: 18-24
Isinilang si Jesu-Cristo
18 Ito ang naganap nang ipanganak si Jesu-Cristo. Si Maria na kanyang ina at si Jose ay nakatakda nang magpakasal. Ngunit bago sila makasal, nalaman ni Maria na siya'y nagdadalang-tao sa pamamagitan ng kapangyarihan ng Espiritu Santo. 19 Subalit dahil isang taong matuwid si Jose na kanyang mapapangasawa, at ayaw nitong malagay sa lubos na kahihiyan si Maria, binalak niyang hiwalayan si Maria nang palihim.
20 Ngunit habang pinag-iisipan ito ni Jose, nagpakita sa kanya sa panaginip ang isang anghel ng Panginoon. Sinabi nito sa kanya, "Jose, anak ni David, huwag kang matakot na pakasalan si Maria, sapagkat ang sanggol na dinadala niya ay mula sa Espiritu Santo. 21 Magsisilang siya ng isang batang lalaki at Jesus ang ipapangalan mo sa sanggol sapagkat ililigtas niya ang kanyang bayan sa kanilang mga kasalanan."
22 Nangyari nga ang lahat ng ito upang matupad ang sinabi ng Panginoon sa pamamagitan ng propeta,
23 "Tingnan ninyo; 'Maglilihi ang isang birhen at magsisilang ng isang sanggol na lalaki, at tatawagin itong Emmanuel.' " (Ang kahulugan nito'y "Kasama natin ang Diyos").
24 Nang magising si Jose, sinunod nga niya ang utos ng anghel ng Panginoon at pinakasalan niya si Maria.
MAGNILAY:
Masaya ang mga may pangalan ng Emmanuel o Manuel ngayon. Bida sila ngayon. Sikat sila ngayon. Nabanggit sa ating Ebanghelyo ang kanilang pangalan. At sa buong kapaskuhan laging binabanggit at laging babanggitin ang pangalang Emmanuel dahil ito ang pangalan na inihula ni Isaias na itatawag sa darating na Tagapaligtas. Sa Ebanghelyo ni Mateo, kinilala ito bilang si Hesus. Dahil sa ang pangalang Emmanuel ay nangangahulugang 'Kasama natin ang Diyos' o 'Sumasaatin ang Diyos' akma itong iugnay kay Hesus dahil siya nga ang Anak ng Diyos at Diyos na nagkatawang-tao at nakipamayan sa atin. Kay Hesus kasama natin ang Diyos.
Napakalalim at napakamayaman ang kahulugan ng pangalang Emmanuel pero sa totoo lang meron kaya na papayag na palitan ang kanilang pangalan at gawin itong Emmanuel? O sa mga pangangalanan pa lang na mga sanggol na bagong panganak, ilan kaya ang pipili sa pangalang ito? Marami ang magsasabi na ang bantot naman. Kasi nga Pinoy na Pinoy ang tunog at karaniwan na. Gusto ng marami yung tunog imported kahit walang kahulugan. Okey, patatawarin siguro tayo ng Diyos kapag hindi natin pinili ang Emmanuel bilang pangalan pero hinding-hindi puwede na ang misyon natin ay hindi maging Emmanuel!
Sa Bibliya ang pangalan at misyon ay magkakabit. Kung ano ang pangalan mo yun ang iyong misyon. Kaya nga nakakabit kay Hesus ang pangalang ito dahil misyon niyang ipadama sa mundo na ang Diyos ay nasa kanyang piling. Sa pagmamahal at pagmamalasakit na pinakita ni Hesus lalo na ng ialay niya nag kanyang buhay sa krus, ito ay tunay na karanasan ng Diyos sa piling natin. Ang Diyos ay pag-ibig at si Hesus ay Pag-ibig na nagkatawang-tao - ang Emmanuel. Bilang mga disipulo ni Hesus, ang kanyang misyon ay misyon din natin. Sa buhay natin dapat nasalamin ang pag-ibig ng Diyos. Sa bawa't ginagawa natin madama nawa ng lahat ang Pag-ibig ng Diyos na nagkatawang-tao sa atin. Maranasan nawa ng lahat sa atin ang Emmanuel.
Sa mundo't lipunan ngayon, galit tayo sa mga manggagamit, mandaraya, manloloko, makasarili at anu-ano pang mga katangiang taliwas sa kabutihan. Maging sa Simbahan ay nararanasan natin ang taliwas na pamumuhay. Nasasaktan tayo dahil dapat tayong sumalamin sa pag-ibig ng Diyos. Minsan, kaya hindi naniniwala ang marami sa mga miyembro ng Simbahan lalo na ang mga tagapagturo nito ay dahil nagtuturo lang sila tungol sa aral ni Kristo pero hindi sila buhay na saksi o patotoo. Ang pinakamabisang paraan para ihayag ang Mabuting Balita sa pamamagitan ng pagsaksi at pagpapatotoo. Dapat magkatawang-tao sa atin ang pag-ibig ng Diyos na pinapangaral natin.
Oo, hindi Emmanuel ang pangalan mo pero misyon mo ito at iyan ay huwag mong kalilimutan. Si Hesus ay Emmanuel at gayon din naman tayo. Ngayong Pasko, hayaan natin magkatawang-tao sa atin ang Pag-ibig ng Diyos. Sa pamamagitan ng ating pagsaksi, mararanasan ng lahat na ang Diys nga ay kasama at kapiling natin.
MANALANGIN:
Panginoong Hesus, ikaw ay Emmanuel. Patawad kung hindi ang pag-ibig mo ang minsang nagkakatawang-tao sa amin kundi ang espiritu ng pagkamakasarili at kasamaan. Tulungan mo ako na ngayong Pasko maging pagako ko sa sarili at sa iyo na ako ay magiging isang Emmanuel para sa iba.
No comments:
Post a Comment