HUWEBES NG IKALAWANG LINGGO NG ADBIYENTO
MATEO 11: 11-15
11 Tandaan ninyo: higit na dakila si Juan na Tagapagbautismo kaysa sinumang isinilang sa daigdig, ngunit ang pinakahamak sa kaharian ng langit ay mas dakila kaysa kanya. 12 Mula nang mangaral si Juan na Tagapagbautismo hanggang ngayon, ang kaharian ng langit ay sapilitang pinapasok ng mga taong mararahas. 13 Sapagkat hanggang sa dumating si Juan, ang mga propeta at ang Kautusan ang siyang nagpahayag tungkol sa paghahari ng Diyos. 14 Kung naniniwala kayo sa pahayag na ito, si Juan na nga ang Elias na ipinangakong darating. 15 Makinig ang may pandinig!
MAGNILAY:
Ang mikoprono ay puwedeng gawin ang isang mahinang tinig na mas malakas pa sa pinakamalakas na boses sa buong mundo. Ang bisikleta ay puwedeng gawin ang isang mabagal na tao na mas mabilis pa sa pinakamabilis tumakbo sa buong mundo. Gayundin naman, ang paghahari at pamamayani ng Diyos ay puwedeng gawin ang isang hamak na tao na mas dakila kaysa pinakadakilang tao sa buong mundo.
Kapag Diyos ang pinaghari at pinamayani natin sa ating puso napapawalan ang angking kapangyarihan mayroon tayo sa ating sarili na Diyos din ang nagkaloob. Kapag pinapasok natin ang Panginoon sa buhay natin nakakayanan nating hubarin ang pagkamakasarili na sa totoo ay siyang nagiging hadlang para malayang magmahal ang ating puso nang higit. Kapag Diyos ang naging sentro ng buhay natin natutuklasan natin an gating kakayanan na baguhin ang mundo nang walang alinlangan, pag-aatubili at takot. Puwede tayong maging pinakadakila. At ang pinakadakilang tao ay siya na may kakayanang magmahal, magbigay at maglingkod sa lahat nang mas higit.
BIYERNES NG IKALAWANG LINGGO NG ADBIYENTO
MATEO 11: 16-19
16 "Saan ko ihahambing ang mga tao sa panahong ito? Ang katulad nila'y mga batang nakaupo sa plasa at sumisigaw sa kanilang mga kalaro: 17 'Tinugtugan namin kayo ng plauta ngunit ayaw ninyong sumayaw! Umawit kami ng awit ng pagluluksa, ngunit ayaw ninyong tumangis!' 18 Sapagkat nakita nila si Juan na nag-aayuno at di umiinom ng alak, at ang sabi nila, 'Sinasaniban ng demonyo ang taong iyan.' 19 Nakita naman nila ang Anak ng Tao na kumakain at umiinom, at ang sabi naman nila, 'Tingnan ninyo ang taong ito! Matakaw, lasenggero at kaibigan ng mga maniningil ng buwis at makasalanan.' Gayunman, ang karunungan ng Diyos ay napatutunayang tama sa pamamagitan ng mga gawa nito."
MAGNILAY:
Bilang isang bata mahirap makalaro ang mga matigas ang ulo at mga spoiled brat. Lagi na lang sila ang nasusunod. Hindi mo ma-spelling ang gusto. Minsan bigla na lang aayaw o hindi sasali. Kahit anong gawin mo hindi magustuhan. Sarado ang isip sa suhestiyon ang iba. Minsan wala namang mai-suggest. Susumpungin na lang at magmamaktol sa isang sulok.
Sa katulad nila kinumpara ni Hesus ang mga tao noong kanyang kapanahunan. Hindi malaman kung ano ang kanilang gusto. Sarado ang isip nila sa pagdating ng kaharian ng Diyos. Palagi silang may reklamo at puna. Noong dumating si Juan Bautista na nag-aayuno at hindi umiinom ng alak, ang sabi nila ay nababaliw ito. Nang si Hesus ang dumating na nakikihalubilo sa lahat, lasenggo naman daw at matakaw. Napakapako na ang kanilang isip at paniniwala. Mahirap nang baguhin ang mga tao. Walang lugar ang progreso at pagbabago.
Mapanganib ang ganitong disposisyon. Nakasalalay sa pagiging bukas ng isip ang pag-unlad. Maraming bagong bagay ang dapat matutunan. Hindi natatapos ang pagtuklas. Totoo rin ito sa buhay-pananampalataya. Buhay ang pananampalataya. Hindi ito nakapako lang sa iisang pananaw. Nagbabago rin ang sitwasyon ng buhay. Kailangang bukas ang ating isip at puso sa kung papaano maisasabuhay ang pananampalataya sa Diyos sa pinakaakmang paraan. Importanteng natutugunan natin ang mga tunay na pangangailangan ng ating panahon. Dapat lang na umuusad tayo at hindi manatiling bata o paslit.
SABADO NG IKALAWANG LINGGO NG ADBIYENTO
MATEO 17: 9-13
9 Habang sila'y bumababa sa bundok, iniutos sa kanila ni Jesus, "Huwag ninyong sasabihin kaninuman ang inyong nasaksihan hangga't hindi muling nabubuhay ang Anak ng Tao." 10 Tinanong siya ng mga alagad, "Bakit po sinasabi ng mga tagapagturo ng Kautusan na dapat munang dumating si Elias?" 11 Sumagot siya, "Paparito nga si Elias upang ihanda ang lahat ng bagay. 12 At sinasabi ko sa inyo, pumarito na si Elias ngunit hindi siya kinilala ng mga tao, at ginawa nila kay Elias ang gusto nila. Kaya't tulad ng ginawa sa kanya, pahihirapan din nila ang Anak ng Tao." 13 Naunawaan ng mga alagad na si Juan na Tagapagbautismo ang tinutukoy niya.
MAGNILAY:
Isang importanteng propeta si Elias sa ksaysayan ng Israel. Bawa’t propeta ay nag-iwan ng mahalagang marka sa kanilang kasaysayan. Kinikilala ang mga propeta dahil sila ay tinig ng Diyos sa kanilang piling. Sila ay konsensiya ng bayan. Sa pamamagitan nila naririnig ng lahat ang karunungan ng Diyos. Napapahayag sa pamamagitan nila ang panukala ng Diyos. Yun nga lang madalas, masakit ang salita ng Diyos. Hinahamon nito na iwan ang kasalkuyang buhay na mali. Tinutuligsa nito ang mga taliwas na pamamaraan. Nilalantad nito ang mga sikretong plano ng kasalanan. Kaya naman, halos lahat ng tunay na mga propeta ay naging martir. Ibinuwis ang kanilang buhay para sa katotohanan.
May kakaibang kuwento si Elias dahil ayon sa kanyang kuwento sa dsulo ng kanyang buhay kinuha siya ang nag-aapoy na karwahe upang dalhin sa kalangitan. At dahil dito nagbuo ng paniniwala nab ago dumatinmg ang Misiyas ay muling siyang babalik para ipaghanda ang dadaanan ng Manunubos. Sabi ni Hesus, dumating na siya pero hijndi lang nila kinilala o nakilala. Si Juan Bautista ay higit pa sa pagiging propeta ang nagging papel. Buong tapang siyang naging tinig ng Diyos sa gitna ng lahat. Nagsilbi siyang konsensya ng bayan. At tulad ng ibang propeta, siya rin ang nagbuwis ng buhay.
Bawa’t tagasunod ng Panginoon ay propeta. Ikaw at ako ang mga bagong Elias, o Juan Bautista, o isa sa mga propeta sa ating panahon ngayon. Dala-dala natin sa ating puso ang katotohanan mula sa Panginoong Hesus. Ang katotohanang ito ay hindi laging tugma sa kinasanayan ng mundo. Tungkulin nating ipahayag ang totoo. Tinig tayo ng Diyos sa ating panahon. Konsensya tayo n gating komunidad at lipunang kinabibilangan. Kung hindi ka propeta ngayon, hindi ka kailanman tagasunod o disipulo ng Panginoon.
MANALANGIN:
Panginoon, tulungan mo akong hayaan kang mamayani sa aking kalooban. Maging bukas nawa ako sa pagpapahayag mo ng iyong karunungan at katotohanan. Gawin mo akong iyong tinig sa gitna ng lahat. Ako ang iyong magiging bibig. Ako ang iyong magiging mga kamay at paa para abutin ang lahat at ipabatid sa kanila ang iyong paghahari.
No comments:
Post a Comment