MATEO 21: 23-27
Pag-uusisa Tungkol sa Karapatan ni Jesus
23 Pumasok si Jesus sa Templo. Habang siya'y nagtuturo doon, lumapit sa kanya ang mga punong pari at ang mga pinuno ng bayan, at siya'y tinanong, "Ano ang karapatan mong gumawa ng mga bagay na ito? Sino ang nagbigay sa iyo ng karapatang gumawa nito?"
24 Sumagot si Jesus, "Tatanungin ko rin kayo. Kapag sinagot ninyo ang tanong ko, saka ko sasabihin sa inyo kung ano ang karapatan kong gumawa ng mga bagay na ito. 25 Kanino nagmula ang karapatan ni Juan upang magbautismo, sa Diyos ba o sa tao?"
Kaya't sila'y nag-usap-usap, "Kung sasabihin nating mula sa Diyos, sasabihin naman niya sa atin, 'Bakit hindi ninyo siya pinaniwalaan?' 26 Ngunit kung sasabihin nating mula sa tao, baka naman kung ano ang gawin sa atin ng mga taong-bayan, sapagkat kinikilala ng lahat na si Juan ay isang propeta." 27 Kaya't sumagot sila kay Jesus, "Hindi namin alam!"
MAGNILAY:
Hindi namin alam! Hindi ko alam! Ewan ko!
Ito na ang pinakamahinang argumento na puwedeng idahilan sa isang usapin. Hindi ko alam! Hindi puwedeng idahilan ang ka-ignorantihan. Tungkulin nating alamin ang totoo at saliksikin ito. Kapag natuklasan ang totoo ay dapat itong paninidigan. Hindi rin puwedeng irason ang ka-ignoratihan dahil minsan palusot lang ito. Lalo't alam mong hindi popular ang iyong posisyon, mabuti na lang na sabihing hindi mo alam para lusot sa pananagutan. Duwag ang may ganitong argumento. Hindi ko alam!
Ang mga punong pari at pinuno ng bayan na kausap ni Hesus ay nakakalungkot na hindi napanindigan ang kanilang posisyon tungkol kay Juan Bautista. Kung siya'y galing sa Diyos o hindi ay hindi nila sinagot. Oo man o hindi ay merong ibabato sa kanila dahil sa kawalan nila ng paninindigan. At dahil dito natakot at naduwag silang manindigan. Nagpalusot na lang. Hindi namin alam!
Walang kuwentang kausap ang mga ganoong tao. Kaya si Hesus ay hindi na rin sila pinatulan. Walang sinseridad ang anumang pakikipag-usap sa kanila. Hindi sila tapat sa totoo. Ang mahalaga sa kanila ay reputasyon, popularidad, at pagtanggap ng tao kahit isakripisyo ang totoo. Sayang lang ang makitungo sa kanila.
Bilang mga Kristiyano, hamon sa atin ang marunong manindigan para sa totoo. Hindi ito kinahihiya. Hindi ito tinatakasan. Pinananagutan ito. Ang isang Kristiyano ay patuloy ang pagsaliksik sa katotohanan. Responsibilidad niya ito. Kung may isang katangian ang isang alagad ng Panginoon, ito ay sinseridad para sa katotohahan.
MANALANGIN:
Panginoon, turuan mo akong magiging matatag sa paninindigan. Huwag ko nawang isakripisyo ang totoo para lang sa popularidad. Gawin mo akong lingkod ng katotohanan.
No comments:
Post a Comment