LUKAS 1: 57-66
Isinilang si Juan na Tagapagbautismo
57 Dumating ang oras ng panganganak ni Elisabet at nagsilang siya ng isang sanggol na lalaki. 58 Tuwang-tuwa ang kanyang mga kapitbahay at mga kamag-anak nang mabalitaan nilang siya'y pinagpala ng Panginoon.
59 Makalipas ang isang linggo, dumalo sila sa pagtutuli ng sanggol. Zacarias sana ang itatawag nila sa bata, gaya ng pangalan ng kanyang ama, 60 ngunit sinabi ni Elisabet, "Hindi! Juan ang ipapangalan sa kanya."
61 "Subalit wala naman kayong kamag-anak na may ganyang pangalan," tugon nila. 62 Sinenyasan nila ang kanyang ama upang itanong kung ano ang ibig nitong itawag sa sanggol.
63 Humingi si Zacarias ng masusulatan at ganito ang kanyang isinulat, "Juan ang pangalan niya." Namangha ang lahat. 64 Noon din ay nakapagsalita si Zacarias, at nagsimulang magpuri sa Diyos. 65 Natakot ang lahat ng tagaroon, at naging usap-usapan sa buong bulubundukin ng Judea ang mga bagay na iyon. 66 Pinag-isipan ito ng mga nakabalita, anupa't naging tanong nilang lahat, "Magiging ano kaya ang batang ito?" Sapagkat maliwanag na nasa kanya ang Panginoon.
MAGNILAY:
Noon din ay nakapagsalita si Zacarias, at nagsimulang magpuri sa Diyos.
Kailan ba nagiging tikom ang ating bibig?
Una, kung hindi mo alam kung ano ang iyong sasabihin o hindi mo alam ang iyong sinasabi. Ano nga naman ba ang sasabihin mo kung wala ka namang masasabi. Hindi mo puwedeng ibigay ang wala ka. Anong katotohanan ang ipapahayag mo kung hindi mo ito taglay?
Ikalawa, kung hindi ka kumbinsido sa sasabihin mo. Paano mong mapapaniwala ang iba sa sasabihin mo kung ikaw mismo duda dito? Paano mo kukumbinsihin ang iba sa isang bagay na hindi mo ganap na pinaniniwalaan? Matalas ang ating pakiramdam. Alam natin kung napipilitan ka lang sa sinasabi mo. Alam natin kung nagkukunwari lang tayo na pinanghahawakan natin ang sinasabi natin.
Ikatlo, kung natatakot ka sa magiging reaksyon ng iba lalo na kung ito ay pagkontra sa sasabihin mo. Hindi tayo handang tanggihan. Hindi tayo handang i-depensa ang sasabihin natin. Mawawalan tayo ng kaibigan. Bababa ang popularidad natin. Baka mapahiya tayo na hindi natin kayang ipagtanggol ang sinasabi natin.
Alin man sa tatlong ito ang naroon kapag nagsasalita tayo ay dahilan para sabihing snungaling tayo.
Nakapagsalita na ngayon si Zacarias sa ating Ebanghelyo. Malinaw na sa kanya ang lahat. Nauunawaan na niya ang mga pangyayari mula ng magpakita sa kanya ang anghel. Naalis na ang kanyang pagdududa sa ipinasasabi ng Diyos. Sigurado na siya sa mabuting balitang inihatid sa kanya. Wala na siyang takot na ipahayag ang kanyang nararamdaman at pinaniniwalaan. Nagtitiwala na siya sa Diyos na may alam ng lahat. Ang Diyos bilang kakampi sinong puwedeng kumontra? Kaya't buong galak, buong tapang, buong kumpiyansa niya ngayong isinisigaw sa buong mundo ang kabutihan at kagalingan ng Diyos.
Lahat tayo bilang mga disipulo ng Panginoon ay kanyang tagapagsalita. Hindi natin maiiwasan na magsalita tungkol sa kanya at maging bibig niya sa harap ng lahat. Magsasalita at magsasalita tayo bilang kinatawan ng Diyos.
Bago tayo magpahayag, alamin muna natin ang kanyang salita. Magkusa tayong mag-aral. Buklatin natin ang Bibliya, ang Katesismo, at iba pang magpapalalim ng ating kaalaman. Dumalo tayo sa mga pag-aaral upang lumalim ang ating karunuingan tungkol sa Diyos at sa kanyang gawain. Maging eksperto tayo ng salita ng Diyos. Walang karapatan na maging kristiyano ang tamad mag-aral.
Bago tayo magpahayag, siguraduhin nating kumbinsido tayo. Ang paraan para maging kumbinsido tayo ay isabuhay natin ang salitang ating ipapahayag. Ang pagpapahayag ay pagpapatotoo. At walang ibang mabisang paraan ng pagpapatotoo maliban sa pagbabahagi ng sarili nating karanasan sa salita ng Diyos at kung paano nito binago ang ating buhay.
Bago tayo magpahayag, alalahanin natin na sa Diyos lang tayo mananagot. Wala tayong dapat baguhin sa salita ng Diyos para lang makatakas tayo sa pag-kontra at pagtanggi ng iba. Huwag nating labnawan ang salita ng Diyos para lang hindi mabawasan ang ating popularidad. Sabihin natrin ang dapat nating sabihin tungkol sa salita ng Diyos makasakit man ito o hindi, makapaso man ito o hindi, makasagasa man ito o hindi. Mas matakot tayo kapag hindi natin naipahayag ang salita ng Diyos ng buo at walang bawas o dagdag. Tandaan, sa Diyos tayo mananagot.
Ipahayag natin ang mabuting balita ng husto. Huwag tayong maging mga sinungaling na nag-aanyong tagapamahayag ng kanyang salita.
MANALANGIN:
Panginoon, buksan mo ang aking mga bibig upang mamutawi dito ang tamis, at ang pait, at ang anghang ng iyong salita. Gawin mo akong iyong tagapagsalita upang bigyang-inspirasyon ang marami, konsiyensiyahin ang marami, hamunin ang marami, at hilumin ang marami. Huwag sana akong maging alagad mo na tikom ang bibig sa pagpapahayag ng iyong salita.
No comments:
Post a Comment