J
UAN 20: 1-31
Ang Muling Pagkabuhay ni Jesus
1 Madilim-dilim pa nang unang araw ng sanlinggo, pumunta si Maria Magdalena sa libingan. Naratnan niyang naalis na ang batong nakatakip sa pinto ng libingan. 2 Dahil dito, patakbo siyang pumunta kay Simon Pedro at sa alagad na mahal ni Jesus, at sinabi sa kanila, May kumuha sa Panginoon mula sa libingan, at hindi namin alam kung saan siya dinala!
3-4 Sina Pedro at ang nasabing alagad ay nagpunta sa libingan. Kapwa sila tumakbo ngunit si Pedro'y naunahan noong isa. 5 Yumuko ito at sumilip sa loob ng libingan ngunit hindi pumasok. Nakita niyang nakalagay doon ang mga mamahaling tela. 6 Nang dumating si Simon Pedro, tuluy-tuloy itong pumasok sa libingan at nakita nito ang mga telang lino, 7 at ang panyong ibinalot sa ulo ni Jesus. Ang panyo ay hindi kasama ng mga mamahaling tela, kundi hiwalay na nakatiklop sa isang tabi. 8 Pumasok din ang alagad na naunang dumating at nakita niya ito, at siya'y naniwala.
MAGNILAY:
Hindi kinikimkim ang magandang balita. Hindi ito sinasarili. Sinasambulat ito. Pinagkakalat sa marami. Ipinamamalita ito sa kung sinu-sino. Hindi mapipigilan ang damdamin ng nakasaksi sa Panginoon na ipahayag ito sa lahat.
Ganito mailalarawan ang karanasan ng isang Kristiyano. Hindi ka pa Kristiyano kung wala kang narinig o nakita sa Panginoon. Ang isang Kristiyano ay nakatagpo sa Panginoon. At dahil sa galak mula sa magandang balitang ito, sumasambulat siya, nangangati ang dila, at ipinamamalita ang kabutihan ng Panginoon. Walang Kristiyano ang hindi nagpapahayag. Walang Kristiyano na hindi bukang-bibig ang Panginoon. Palatandaan ng isang tunay na Kristiyano ay madaldal siya tungkol sa Panginoong nakatagpo niya. Madaldal siya hindi lang sa salita nguni't lalo sa gawa at kilos.
Ganito ka ba? Nangangati ba ang iyong dila na ipamalita ang Panginoon? Kung hindi, baka wala ka naman talagang ibabalita? Kung meron, bakit ka nahihiya o natatakot kaya? Ang hirap kayang kimkimin ang galak ng mabuting balita. Palayain mo ang iyong damdamin at umalingawngaw ka sa pagpapahayag ng kabutihan ng Diyos.
MANALANGIN:
Panginoon, buksan mo ang aking mata at tainga upang makita at marinig ka sa buhay ko. Alisin mo ang mga hadlang upang makatagpo kita. Buksan mo rin ang aking mga labi upang ipangalat ang iyong pagmamahal at pagliligtas. Ikaw ang mabuting balita sa gitna ng maraming masamang balita sa aming kapaligiran. Ang pagpapatotoo namin sa iyo ay magsilbing ilaw nawa sa mundong balot ng dilim ng pagkamakasarili.
No comments:
Post a Comment