LUKAS 2: 16-21
16 Nagmamadali silang pumaroon at natagpuan nila sina Maria at Jose, at ang sanggol na nakahiga sa sabsaban. 17 Isinalaysay ng mga pastol ang sinabi ng anghel tungkol sa sanggol. 18 Namangha ang lahat ng nakarinig sa sinabi ng mga pastol. 19 Tinandaan ni Maria ang mga bagay na ito, at ito'y kanyang pinagbulay-bulayan.
20 Umalis ang mga pastol na nagpupuri sa Diyos at nagpapahayag ng kanyang kadakilaan dahil sa lahat ng narinig nila at nakita, ayon sa sinabi sa kanila ng anghel.
Pinangalanan si Jesus
21 Pagsapit ng ikawalong araw, tinuli ang bata at pinangalanang Jesus. Ito ang pangalang sinabi ng anghel bago pa siya ipaglihi.
MAGNILAY:
Mawala na raw ang tatay sa pamilya huwag lang ang nanay! Sang-ayon ka man o hindi pero ito ay galing sa katotohanan at karanasan na hindi maisasang-tabi at hindi matatawaran ang papel ng ina sa loob ng pamilya. Kapag nawala ang ina, kailangang-kailangang punuan ito at hindi puwedeng hindi lalo na ng ama. Hindi dapat mawala ang ina sa tahanan. Kailangan nating lagi ang ina at ang mga katangian ng isang ina.
Si Maria ang napiling ina ng Panginoon. Sa pagkakatawang-tao ng anak ng Diyos kailangan niya ng isang ina. kaya gayon na lamang ang paghahanda sa ina ng Panginoon kung kaya't biniyayaan pa siya na ipaglihing walang kasalanan. Hindi maitatanggi ang papel ni Maria sa paghubog ng magiging Manunubos ng sandaigdigan. Si Maria ay importanteng kasangkapan sa kaligtasan ng mundo at ng sangkatauhan.
May tatlong katangian ang isang ina. Una, ito'y tagapagbigay-buhay. Ang ina ang masasabing talagang nagbigay-buhay dahil siya ang nagdadala sa anak sa kanyang sinapupiunan at mula sa kanya ang sanggol ay isinisilang. Pewro hindi lang pisikal ang pagbibigay-buhay. Maaaring ikaw ang ina pero hindi ka tagapagbigay-buhay. Meron naman hindi mo tunay na ina pero nagsisilbing tunay na ina dahil nagbibighay-buhay siya. Ang pagbibigay-buhay ay hindi basta ikaw ang nanganak kundi ikaw yung nag-aruga, humubog sa anak ng magandang asal, naging suporta sa lahat ng oras, gumagabay sa tuwi-tuwina, nagpapalakas ng loob ng anak, at maraming pang paraan na jhindi lang basta ikaw ang nanganak. Kaya, kahit tatay o sinuman, dapat maging tagapagbigay-buhay sa isa't-isa. Si Maria ay hindi lang ina sa laman. Ina rin siya lalo na sa larangan ng paghubog kay Hesus. Soiya ang bumuhay sa kalooban ni Hesus bilang anak na naghahanda at tumutpad sa kanyang misyon.
Ikalawa, ang ina ay mapagtanggap. Magaling siyang sumalo ng problema. Nakakapagtiis siya at matiyaga. Siya yung makikinig sa iyo kapag may dinaramdam ka. Hinngahan siya ng sama ng loob, ng hinaing, at anumang dinadala sa kalooban. Si Maria ay natutong tanggapin ang kapalaran ng kanyang anak. Sa kalooban niya itinago ang saya at galak, pati na rin ang kirot na maging na ng Manunubos. Naging lakas ng loob siya ni Hesus lalo na sa krus.
Panghuli, ang ina ay magaling sa presensya. Kapag may sakit tayo ang hanap natin ay ang kalinga ng ina, ang kanyang presensya, yung siya ay nasa tabi mo. Naroon siya sa tagumpay man o kabiguan. Nakakaunawa siya kahit siya mismo ay nasasaktan. Si Maria ay sinamahan si Hesus hanggang sa krus ng kalbaryo. Doon ay sinalo niya ang lahat ng sakit ng anak. Kahit sa buhay ng Simbahan, laging narooon ang maka-inang presensya ni Maria.
Ngayon, pinararangalan natin si Maria bilang ina. At higit pa rito, ina ng Diyos. Tinatawag siyang ina ng Diyos dahil Diyos ang kanyang dinala sa kanyang sinapupunan. Hindi nahiwalay ang pag-Diyos ni Hesus noong siya'y magkatawang-tao. Napakalaking karangalan sa isang tao lang tulad ni Maria na dalhin sa kanyang katawan ang Diyos. Karangalan din ito ng buong sangkatauhan.
MANALANGIN:
Panginoong Hesus, lagi nawa kaming lumapit sa iyong ina. Siya ang perpektong kristiyano. Ang kanyang mga katangian bilang ina ay matularan naming lahat. Ang mga kaangiang iyong ang nagpapatingkad sa pagmamahal na dulot mo sa lahat.
No comments:
Post a Comment