JUAN 4:43-54
Pinagaling ni Jesus ang Anak ng Isang Pinuno ng Pamahalaan
43 Pagkaraan ng dalawang araw, bumalik si Jesus sa Galilea. 44 (Si Jesus na rin ang nagsabi na ang isang propeta'y hindi iginagalang sa sarili nitong bayan.) 45 Pagdating niya sa Galilea ay mabuti ang pagtanggap sa kanya ng mga tagaroon, sapagkat nasa Jerusalem din sila noong Pista ng Paskwa at nakita nila ang lahat ng kanyang ginawa roon.
46 Nagpunta muli si Jesus sa Cana, Galilea. Dito niya ginawang alak ang tubig. Sa bayan naman ng Capernaum ay may isang pinuno ng pamahalaan. Ang anak niyang lalaki ay may sakit 47 at naghihingalo na. Nang mabalitaan niyang bumalik si Jesus sa Galilea mula sa Judea, pinuntahan niya ito at pinakiusapang pumunta sa Capernaum upang pagalingin ang kanyang anak. 48 Sinabi sa kanya ni Jesus, Hangga't hindi kayo nakakakita ng mga himala at mga kababalaghan, kailanman ay hindi kayo sasampalataya.
49 Ngunit sinabi ng pinuno, Tayo na po, Panginoon, bago mamatay ang aking anak.
50 Sumagot si Jesus, Umuwi na kayo, gagaling ang inyong anak. Naniwala ang lalaki sa sinabi ni Jesus, at umuwi na nga siya. 51 Sa daan pa lamang ay sinalubong na siya ng kanyang mga alipin at sinabing gumaling na ang kanyang anak.
52 Tinanong niya ang mga iyon, Anong oras nang bumuti ang kalagayan niya?
Ala-una po kahapon nang siya'y mawalan ng lagnat, tugon nila.
53 Naalala ng ama na noong oras na iyon sinabi sa kanya ni Jesus, Gagaling ang inyong anak. Kaya't siya at ang kanyang buong sambahayan ay sumampalataya kay Jesus.
54 Ito ang pangalawang himalang ginawa ni Jesus sa Galilea pagkagaling mula sa Judea.
MAGNILAY:
Namumuhay ka ba sa pagdududa? Naisip mo na ba yung buhay na wala kang pinagtitiwalaan? Lahat pinagsususpetsahan mo. Tingin mo sa lahat gugulangan ka lang. Trato sa lahat hindi ito gagawa ng matino. Lahat akala mo lolokohin ka. Kailanman hindi ka aasa sa salita ng iba. Walang gagawa ng mabuti ng walang kapalit. Ang ganitong buhay at disposisyon ay lagi na lang may takot. Walang kasiguruhan. Walang katahimikan. Walang kapanatagan. Walang istabilidad.
Kung ganito kasaklap ang buhay ng walang tiwala sa kapwa mas lalo kapag wala tayong tiwala sa salita at mga pangako ng Pangionoon. Mas lalong mahirap isipin ang buhay na hindi nakasalig sa pagmamahal ng Diyos. Mahirap isipin ang buhay na hindi karunungan ng Diyos ang gumagabay. Mas higit ang pag-alala, takot at kawalan ng istabilidad ng taong hindi ang salita ng Diyos ang pundasyon. Sa hirap man o ginhawa, sa kasawian man o tagumpay, tanging ang salita ng Diyos ang maaasahan. Ito ang tunay na magbibigay sa atin ng kakayanan na bumangon kapag nadapa, mangarap kapag nabigo, mabuhay muli kapag namatayan tayo ng pag-asa.
Nagtiwala ang pinuno sa salita ni Hesus sa gitna ng kanyang kagipitan. Magtitiwala ka rin ba?
MANALANGIN:
Panginoon, hindi lahat laging malinaw. Hindi lahat kaya agad ipaliwanag. Hindi lahat kaagad may solusyon. Pero nagtitiwala ako sa iyo at laging magtitiwala kahit ano pa ang mangyari sapagka't higit kang nakaaalam.
No comments:
Post a Comment