JUAN 9: 1-41
Pinagaling ni Jesus ang Isang Bulag
1 Sa paglalakad ni Jesus, nakita niya ang isang lalaking ipinanganak na bulag. 2 Tinanong siya ng kanyang mga alagad, Guro, sino po ang nagkasala at ipinanganak na bulag ang lalaking ito, siya ba o ang kanyang mga magulang?
3 Sumagot si Jesus, Ipinanganak siyang bulag, hindi dahil sa nagkasala siya, o ang kanyang mga magulang, kundi upang mahayag ang kapangyarihan ng Diyos sa pamamagitan niya. 4 Kailangang gawin natin ang mga ipinapagawa ng nagsugo sa akin habang umaga pa; malapit na ang gabi, at wala nang makakagawa pagsapit niyon. 5 Habang ako'y nasa sanlibutan, ako ang ilaw ng sanlibutan.
6 Pagkasabi nito, dumura si Jesus sa lupa at gumawa ng putik. Pagkatapos, ipinahid niya ito sa mata ng bulag. 7 Sinabi ni Jesus sa bulag, Pumunta ka sa deposito ng tubig sa Siloe at maghilamos ka roon. Ang kahulugan ng salitang Siloe ay Sinugo. Ganoon nga ang ginawa ng bulag, at nang magbalik siya ay nakakakita na.
8 Nagsalita ang mga kapitbahay niya at ang mga nakakita sa kanya noong siya'y namamalimos pa, Hindi ba iyan ang pulubing bulag?
9 Sumagot ang ilan, Iyan nga! Sabi naman ng iba, Hindi! Kamukha lang. Kaya't nagsalita ang dating bulag, Ako nga po iyon.
10 Paano kang nakakita? tanong nila.
11 Sumagot siya, Ang lalaking tinatawag na Jesus ay gumawa ng putik at ipinahid iyon sa aking mata. Pagkatapos, sinabi niya sa akin, Pumunta ka sa Siloe at maghilamos. Pumunta nga ako doon at naghilamos, at nakakita na ako!
12 Nasaan siya? tanong nila sa kanya. Hindi ko alam, sagot niya.
Nagsiyasat ang mga Pariseo Tungkol sa Pagpapagaling
13 Dinala ng mga tao sa mga Pariseo ang dating bulag, 14 dahil Araw ng Pamamahinga nang gumawa si Jesus ng putik at nang pinagaling niya ang bulag. 15 Tinanong din siya ng mga Pariseo kung paano siya nakakita. Kaya't sinabi niya sa kanila, Pinahiran niya ng putik ang aking mga mata, ako'y pinaghilamos at ngayo'y nakakakita na ako.
16 Ang sabi ng ilang Pariseo, Hindi maaaring mula sa Diyos ang taong iyon, sapagkat hindi niya ipinapangilin ang Araw ng Pamamahinga. Ngunit sinabi naman ng iba, Paanong makakagawa ng ganitong mga himala ang isang makasalanan? At hindi sila magkaisa.
17 Kaya't tinanong nilang muli ang dating bulag, At ikaw, ano naman ang masasabi mo tungkol sa kanya, dahil pinagaling niya ang iyong mga mata?
Isa siyang propeta! sagot niya.
18 Ayaw maniwala ng mga Judio na siya'y talagang dating bulag kaya't ipinatawag nila ang kanyang mga magulang. 19 Anak nga ba ninyo ito? Talaga bang siya'y ipinanganak na bulag? Bakit nakakakita na siya ngayon? tanong nila.
20 Sumagot ang kanyang mga magulang, Anak nga namin siya at siya'y ipinanganak ngang bulag. 21 Ngunit hindi po namin alam kung bakit nakakakita na siya ngayon, o kung sino ang nagpagaling sa kanya. Siya na po ang tanungin ninyo. May sapat na gulang siya at makakapagsalita na para sa kanyang sarili!
22 Ganoon ang sabi ng kanyang mga magulang dahil takot sila sa mga Judio. Alam nilang pinagkaisahan ng mga Judio na itiwalag sa sinagoga ang sinumang magpahayag na si Jesus ang Cristo. 23 Ito ang dahilan kung bakit sinabi ng kanyang mga magulang, Siya'y nasa tamang gulang na, siya ang tanungin ninyo.
24 Muli nilang ipinatawag ang dating bulag at sinabi sa kanya, Sa pangalan ng Diyos, magsabi ka ng totoo. Alam naming ang taong iyon ay makasalanan.
25 Sumagot siya, Hindi ko po alam kung siya'y masamang tao, o hindi. Isang bagay po ang alam ko; ako'y dating bulag, subalit ngayo'y nakakakita na.
26 Ano ang ginawa niya sa iyo? Paano niyang pinagaling ang iyong mga mata? tanong nila.
27 Sumagot siya, Sinabi ko na po sa inyo, at ayaw naman ninyo akong paniwalaan. Bakit gusto ninyong marinig muli? Nais ba ninyong maging alagad din niya? 28 At siya'y kanilang minura, Ikaw ay alagad niya! Ngunit kami'y mga alagad ni Moises.
29 Nalalaman naming nagsalita ang Diyos kay Moises ngunit ang taong iyon, ni hindi namin alam kung saan siya nanggaling!
30 Sumagot ang lalaki, Iyan nga po ang nakapagtataka! Hindi ninyo alam kung saan siya nanggaling, gayunpaman, pinagaling niya ang aking mga mata. 31 Alam nating hindi pinapakinggan ng Diyos ang mga makasalanan, ngunit pinapakinggan niya ang mga tunay na sumasamba sa kanya at sumusunod sa kanyang kalooban. 32 Noon pa man ay walang nakapagpapagaling ng mata ng taong ipinanganak na bulag. 33 Wala pong magagawa ang taong iyon kung siya'y hindi mula sa Diyos!
34 Sumagot sila, Ipinanganak kang makasalanan at ngayo'y nais mo pa kaming turuan! At siya'y kanilang itiniwalag.
Mga Bulag sa Espiritu
35 Nabalitaan ni Jesus na ang lalaking pinagaling niya ay itiniwalag ng mga Pariseo. Kaya't nang matagpuan niya ito ay kanyang tinanong, Sumasampalataya ka ba sa Anak ng Tao?
36 Sumagot ang lalaki, Sino po ba siya, Ginoo? Sabihin ninyo sa akin upang ako'y manalig sa kanya.
37 Siya'y nakita mo na. Siya ang kausap mo ngayon, wika ni Jesus.
38 Sumasampalataya po ako, Panginoon! sabi ng lalaki. At sinamba niya si Jesus. 39 Sinabi pa ni Jesus, Naparito ako sa mundong ito upang humatol, at nang sa gayo'y makakita ang mga bulag at mabulag naman ang mga nakakakita.
40 Narinig ito ng ilang Pariseong naroon at siya'y kanilang tinanong, Ibig mo bang sabihi'y mga bulag kami?
41 Sumagot si Jesus, Kung kayo nga'y bulag, wala sana kayong kasalanan. Ngunit dahil sinasabi ninyong nakakakita kayo, ang kasalanan ay nananatili sa inyo.
MAGNILAY:
Sino nga ba ang tunay na bulag?
Nagpagaling si Hesus ng isang bulag. Magkaroon na tayo ng ibang kapansanan pangkatawan pero sana ay huwag sa mga mata - huwag ang maging isang bulag. Hindi natin maiisip kung paano ang karanasan ng isang bulag lalo na kung isinilang ka ng may ganitong kakulangan. Habang-buhay na kadiliman. Hindi mo makita ang kapaligiran. Hindi mo makita ang mga mahal mo sa buhay. Ni hindi mo alam kung ano ang ibig sabihin ng itsura. Hindi mo alam kung ano ang ibig sabihin ng kulay. Habang-buhay na pangangapa. Habang-buhay na pakikipagtunggali sa kawalan.
Kaya't mauunawaan natin ang kasiyahan ng bulag na pinagaling ni Hesus. Ipinanganak siya sa kadiliman ng pagkabulag. Pero ngayon nakakita siya ng liwanag. Hindi niya alam ang ibig sabihin ng anyo, kulay, liwanag pero ngayon nakikita na niya ang lahat ng ito. Noong siya ay nakakita nakalimutan niya ang lahat ng pighati ng pagiging nasa kadiliman. Iisa lang ang masasabi niya sa nagpagaling sa kanya - isa siyang taong maka-Diyos. Kung hindi, hindi siya makapagpapagaling ng isang bulag mula pagsilang. Siya ay propeta. Siya ang Panginoon!
Pero sa gitna ng mabuting balita na ito ng isang bulag na nakakita, ang pangit na balita pa rin ang nakikita ng mga Pariseo. Imbis na makita nila ang magandang ginawa ni Hesus sa bulag naito, mas tiningnan nila ang paglabag di-umano ni Hesus sa batas ng Sabbath. Hindi dapat magtrabaho sa araw na ito. At ang paggagamot ay isang trabaho na labag sa kabanalan ng Sabbath. Anong kitid na pananaw! Kalunus-lunos na kalagayan ng isip! Bulag sa gawaing pagliligtas ng Diyos!
Kaya't maitatanong natin - sino nga ba ang tunay na bulag. Siya na ang nakikita ay ang kapintasan at mali at pangit sa kilos at gawain ng iba imbis na makita ang ganda, kabutihan at kapakinabangan nito sa kapwa - siya ang bulag! Siya na ang nakikita lang ay ang sarili na mas magaling sa iba, mas nasa tama, at may karapatang husgahan ang iba - siya ang bulag! Siya na hindi nakikita ang Diyos sa kanyang kapwa at sa mga pangyayari sa kapiligiran - siya ang pinakahigit na bulag!
Ikaw ba siya?!
MANALANGIN:
Panginoon, imulat mo ang aking mga mata upang makita ang pagkilos mo sa mga pangyayari ng buhay. Tulkungan mo akong makawala sa pagkabulag ng pagmamagaling, pagyayabang at pagkamakasarili. Magningning nawa ang iyong liwanag sa aking isip, sa aking puso at sa aking buhay. Tulungan mo ako na makakita ng lubos!
No comments:
Post a Comment