MATEO 3: 13-17
Binautismuhan si Jesus
13 Dumating si Jesus sa Ilog Jordan mula sa Galilea upang magpabautismo kay Juan. 14 Ngunit tumututol si Juan at patuloy na sinabi, "Ako po ang dapat magpabautismo sa inyo! Bakit kayo nagpapabautismo sa akin?" 15 Subalit sumagot si Jesus, "Hayaan mo ito ang mangyari ngayon; sapagkat ito ang nararapat nating gawin upang matupad ang kalooban ng Diyos." Kaya't pumayag din si Juan. 16 Nang siya'y mabautismuhan, umahon si Jesus sa tubig. Biglang nabuksan ang langit at nakita ni Jesus ang Espiritu ng Diyos na bumababang parang isang kalapati at dumapo sa kanya. 17 At isang tinig mula sa langit ang nagsabi, "Ito ang minamahal kong Anak na lubos kong kinalulugdan!"
MAGNILAY:
May isang speaker sa isang seminar ang naglabas ng malutong na isang-libong-pisong papel. Tinanong niya ang mga tao, "Sinong gustong makatanggap ng isang-libong-pisong papel na ito?" Siyempre, nagtaasan ang maraming kamay mula sa mga tao. Pagkatapos, nilukot niya ang perang papel sa kanyang kamay. At tinanong niya uli, "Sinong may gustong makatanggap ng lukot na perang ito?" Siyempre, taasan pa rin ang parehong mga kamay at baka may nadagdag pa. Pagkatapos, ibinato niya sa sahig ang lukot na pera at tinapak-tapakan pa. Pagkatapos, tinanong niya uli, "Sinong may gustong makatanggap ng lukot at maruming perang ito?" At siyempre, nagtaasan pa rin ng kamay ang marami. At tinanong niya, "Bakit sa kabila ng lukot na ang pera at nadumihan pa, gusto niyo pa ring matanggap ito?" Siyempre ang sagot, kahit anong lukot pa nito at dumi, ang halaga nito ang hindi nagbago. Ang isang libong pisong iyon ay isang libong piso pa rin noong siya'y malutong pa at kahit nalukot at nadumihan pa siya pagkapatos. At sabay sabi, "Ang perang ito ay tulad natin. Sa mata ng Diyos, hindi nagbabago ang halaga natin bilang kanyang mga anak kahit nagkamali tayo sa buhay, kahit nadungisan tayo dahil sa mga palpak nating desisyon sa buhay, kahit naging sugatan tayo dahil sa maraming hindi kanais-nais na pangyayari sa ating buhay. Tayo pa rin ang anak na lubos na kinalulugdan ng Diyos."
Sa pagbibinyag ni Hesus, napahayag ang kanyang pagiging kinalulugdang Anak ng Ama. Kahit naging hamak na tao ang Panginoon at nakibilang sa mga makasalanan kaya nga siya pumila para magpabinyag, hindi maitatago na siya ang kinalulugdan Anak ng Diyos. Isa nanamang epifania ito ng Panginoon, pagpapakita kung sino siya. Sa pagbibinyag ng Panginoon, tayong lahat ay nabinyagan din bilang mga anak ng Diyos. Sa pagkakatawang-tao ng Anak ng Diyos, tayo ay inampon ng Diyos bilang kanyang mga anak. Naging mga anak tayo sa kanya na ang karangalan ay kailanman hindi mababago kahit masadlak tayo sa maraming mga pagkakamali sa buhay. Hindi nagbabago ang tingin ng Diyos sa atin tulad ng isang magulang sa kanyang anak. Laging nakabukas ang kanyang mga kamay sa pagbabalik natin sa kanya. Laging handa siya sa pagpapatawad sa mga naging suwail na anak. At kahit lumayo tayo sa kanya, hindi nagbago ang pagmamahal niya sa atin.
Sa araw na ito, inaanyayahan tayong ipagdiwang ang ating pagiging mga anak ng Diyos. Nguni't hindi lang basta magdiwang kundi ipangako muli na magpapaka-anak tayo ng Diyos sa isip, sa salita at sa gawa. Ngayon ay araw ng pagpapanibago ng ating pangako sa binyag na magiging mga saksi tayo ng Diyos na ating Ama at susundan ang mga yapak ng kanyang anak at ating Kapatid na si Hesus. Samantalang tinatapos natin ang kapanahunan ng Pasko sa araw na ito, pinapangako naman natin na ang mensahe ng Pasko at lahat ng biyayang paglago na tinamo natin sa buong kapanahunang ito, ay ipagpapatuloy natin sa buong taon at lagpas pa.
Maganda ring ipangako natin sa araw na ito na tutuklasin ko kung kailan ako bininyagan. At simula ngayon, ipagdiriwang ko ito sa isang banal na paraan tuwing sasapit ang araw na ito. Kung pinagdiriwang natin ang ating kaarawan ng pagsilang o anumang anibersaryo ng mga kaganapan sa ating buhay, ang araw ng ating binyag ay hindi dapat mahuli sa pag-alaala at pagdiriwang na ito. Ito ang pinakamahalagang araw sa buhay natin. Dito tayo pormal na naging mga anak ng Diyos. Makalimutan mo na ang birthday mo huwag lang ang iyong binyag. Yun ang birthday mo bilang anak ng Diyos.
MANALANGIN:
Panginoon, turuan mo akong pangalagaan ang aking dangal bilang anak ng Diyos. Marami na akong palpak na ginawa sa buhay. Dinungisan ko ang karangalang ito. Tulungan mo akong magpanibago at simula ngayon, isabuhay kong muli ang aking pagiging anak mo. Huwag nawa kitang ipahiya dahil lang sa katigasan ng aking ulo. Masaksihan nawa ng lahat na ako ay nagsisikap maging karapat-dapat na tawaging iyong anak.
No comments:
Post a Comment