MATEO 16: 13-23
Ang Pahayag ni Pedro Tungkol kay Jesus
13 Nang dumating si Jesus sa bayan ng Cesarea ng Filipos, tinanong niya ang kanyang mga alagad, "Ano ang sinasabi ng mga tao patungkol sa Anak ng Tao?" 14 At sumagot sila, "Ang sabi po ng ilan kayo si Juan na Tagapagbautismo. Sabi po naman ng iba, kayo si Elias. At may nagsasabi pong kayo si Jeremias, o isa sa mga propeta." 15 Tinanong ulit sila ni Jesus, "Ngunit para sa inyo, sino ako?" 16 Sumagot si Simon Pedro, "Kayo po ang Cristo, ang Anak ng Diyos na buhay." 17 Sinabi sa kanya ni Jesus, "Mapalad ka, Simon na anak ni Jonas! Sapagkat ang katotohanang ito'y hindi inihayag sa iyo ng sinumang tao kundi ng aking Ama na nasa langit. 18 At sinasabi ko sa iyo, ikaw ay Pedro, at sa ibabaw ng batong ito ay itatayo ko ang aking iglesya at ang pintuan ng daigdig ng mga patay ay hindi magtatagumpay laban sa kanya. 19 Ibibigay ko sa iyo ang mga susi ng kaharian ng langit. Ang ipagbawal mo sa lupa ay ipagbabawal sa langit, at ang ipahintulot mo sa lupa ay ipahihintulot din sa langit." 20 At mahigpit niyang iniutos sa kanyang mga alagad na huwag sabihin kaninuman na siya nga ang Cristo.
Unang Pagpapahayag ni Jesus Tungkol sa Kanyang Kamatayan at Muling Pagkabuhay
21 Mula noon ay ipinaalam na ni Jesus sa kanyang mga alagad ang mangyayari sa kanya. Sinabi niya, "Dapat akong magtungo sa Jerusalem at magdanas ng maraming hirap sa kamay ng mga pinuno ng bayan, mga punong pari at mga tagapagturo ng Kautusan. Ako'y papatayin, ngunit sa ikatlong araw ako'y muling mabubuhay."
22 Dinala siya ni Pedro sa isang tabi at sinimulang pagalitan, "Panginoon, huwag nawang itulot ng Diyos! Kailanma'y hindi iyan mangyayari sa inyo."
23 Ngunit hinarap siya ni Jesus at sinabihan, "Umalis ka sa harapan ko, Satanas! Hadlang ka sa aking landas. Ang iniisip mo'y hindi sa Diyos kundi sa tao."
MAGNILAY:
Ang madali ay pamantayan ng demonyo. Ang masarap ay istratehiya ng diyablo. Ang walang hirap ay lohika ni Satanas. Kaya ang tumatahak sa landas ng madali, masarap, at walang hirap ay kampon ni Satanas.
Ito ang ipinamulkha ni Hesus kay Pedro. Matapos siyang parangalan dahil sa pagpapahayag niya ng kung sino ang Panginoong Hesus - ang Kristo, ang Mesiyas, ang Anak ng Diyos na buhay - ay bigla siyang binaligtad dahil nagtangka siyang pigilan si Hesus na tahakin ang landas ng pagsasakripisyo alang-alang sa mapangligtas niyang pag-ibig sa sangkatauhan. Tinawag siyang "Pedro" noong una dahil siya ang magiging batong saligan ng Simbahang itatatag ng Panginoon, pero hindi naglaon tinawag siyang "Satanas" dahil nagmumungkahi siya ng pamamaraang makademonyo - ang umiwas sa hirap at sakripisyo at piliin ang daang madali.
Ang krus ang patunay na mahal nga tayo ni Hesus. Ang pagiging handa niyang maghirap para sa atin ay katibayan ng tunay at tapat na pag-ibig. Kakambal na ng pag-ibig ang sakripisyo dahil ang pag-ibig ay pagbibigay ng sarili na hindi magaganap kung wala ang pagsasakripisyo. Nguni't sa sakripisyong ito bubukal ang buhay at lakas.
Lahat gustong mabago ang lahat-lahat sa lipunan natin. Pero alam kaya ng lahat ang dapat nilang isakripisyo para makamit ito? Madalas, gusto lang natin ng pagbabago pero hindi naman tayo payag na magsakripisyo. Magsasakripisyo tayo para makamit ang pagbabago.
Gusto nating maabot ang mga pangarap. Pero madalas wala naman tayong ginagawa. Gusto lang natin ang sarap ng walang ginagawa. Puro panandaliang diskarte ang gusto natin. Walang mangyayari sa mga panandaliang paraan.
May halaga sa krus. Hindi ito dapat iwasan kundi paghandaan para pasanin. Ang krus ay pinto ng maraming oportunidad na lumago, lumalim at lumawak. Sa pagyakap natin sa krus, nauunawaan natin kung ano nga ba ang tunay na pag-ibig. Kaya pala nagpakasakit si Hesus, namatay sa krus pero pagkatapos ay muling nabuhay!
MANALANGIN:
Panginoon Hesus, ituro mo sa amin ang karunungan ng krus upang malugod namin ito tanggapin, akapin at pasanin sapagka't sa krus lamang napapatunayan ang tunay at wagas na pag-ibig.
No comments:
Post a Comment