JUAN 12:24-26
24 Pakatandaan ninyo: hangga't hindi nahuhulog sa lupa ang butil ng trigo at mamatay, mananatili itong nag-iisa. Ngunit kung ito'y mamatay, mamumunga ito nang sagana. 25 Ang taong nagpapahalaga sa kanyang sarili lamang ay siyang mawawalan nito, ngunit ang taong hindi nagpapahalaga sa kanyang buhay sa daigdig na ito ay siyang magkakaroon ng buhay na walang hanggan. 26 Ang naghahangad na maglingkod sa akin ay dapat sumunod sa akin, at saanman ako naroroon ay pumaparoon din siya. Pararangalan ng Ama ang sinumang naglilingkod sa akin.
MAGNILAY:
"Kung may tiyaga, may nilaga."
Ito ang unang mensahe ng Salita ng Diyos sa atin ngayon. Walang magandang bagay sa buhay ang nakakamit ng walang hirap. Makatapos ng pag-aaral, magtagumpay sa trabaho, maayos na pagsasama, matiwasay sa buhay-pamilya, kaunlaran at kapayapaan sa lipunan - lahat ng ito ay hindi makakamit ng walang hirap ng pagsisikap, pagtitiyaga at pagdidisiplina sa sarili. Ito ang importanteng karunungan na noong una pa sana natin naitanim sa ating puso't isipan. Ito rin sana yung natutunan natin sa pagpapalaki sa atin ng mga magulang.
Sa kabilang banda, kung ang laging hanap natin ay yung madali, kaunting hirap, kuing makakalusot sa hirap, at iba pang tulad nito, huwag tayong umasa ng mga magaganda at malalalim na bagay sa buhay. Kaunti ang nakakamit ng mga kaunti rin magsakrispisyo sa buhay. Ang kalidad ng buhay ng mga walang tiyaga ay siguradong sobrang baba kumpara sa mga talagang may tiyaga.
"Habang nagbibigay ka, lalo ka naman nagkakaroon."
Ito rin ang isang mensahe ng Salita ng Diyos ngayon. Ito ang kabalintunaan o kabaligtaran ng buhay. Takot tayong magbigay kasi baka mawalan tayo. Pero habang tayo ay hindi nagbibigay, saka naman tayo nawawalan. Sa pag-angkin tayo madalas maakit pero ito ang siguradong daan sa kawalan. Walang madamot ang sumaya dahil sa pagiging madamot. Ang hindi pagbibigay ng sarili kailanman ay hindi naging paraan para masabi mong makabuluhan ang iyong buhay. Walang kaibigang maituturing ang isang taong makasarili. Gutom at uhaw ang kaluluwa ng isang taong hindi natututong magbigay.
Sa kabilang banda, ang taong nagbibigay ng sarili para sa iba ay nagkakamit ng malalim na kaligayahan na nagbibigay-buhay sa sarili. Iba ang saya ng puso ng isang taong nakapag-alay ng sarili para sa kapwa. Oo, nawalan ka ng oras, pera, o ng anumang bagay na maaaring ibahagi pero may kapalit itong hgit pa sa iyong naibigay. Ang mamatay sa sarili ang daan para ikaw ay mabuhay. Minsan, mahirap arukin ng isip pero ito ang totoo. Nakakatakot sumugal sa ganitong prinsipyo pero hangga't hindi ka namamatay sa sarili, hindi ka mabubuhay. Kabalintunaan nga - matagal ng patay ang mga hindi kayang mamamatay sa sarili para sa iba.
MANALANGIN:
Panginoong Hesus, turuan mo kaming matutunan ang doktrina ng krus. Ito ang nagpapaalala sa amin ng paraan upang magkaroon ng buhay. Ikaw ay namatay para sa amin kung kaya nagkaroon kami ng buhay. Masundan nawa namin ang iyong yapak. Si San Lorenzo na diakono at martir, halimbawa ng pagpapakasakit at pagsasakripisyo, ay magbigay nawa sa amin ng inspirasyon.
No comments:
Post a Comment