LUKAS 11: 29-32
Si Jesus ang Palatandaang Mula sa Langit
29 Nang dumagsa ang mga tao, sinabi ni Jesus, "Napakasama ng mga tao sa panahong ito. Naghahanap sila ng palatandaang mula sa langit, subalit walang palatandaang ipapakita sa kanila maliban sa nangyari kay Jonas. 30 Kung paanong si Jonas ay naging isang palatandaan sa mga taga-Nineve, gayundin naman, ang Anak ng Tao ay magiging isang palatandaan sa lahing ito. 31 Sa Araw ng Paghuhukom, sasaksi ang Reyna ng Sheba laban sa lahing ito, sapagkat naglakbay siya mula pa sa dulo ng daigdig upang mapakinggan ang karunungan ni Solomon, ngunit ang naririto ngayon ay higit na dakila kaysa kay Solomon. 32 Sa Araw ng Paghuhukom, sasaksi ang mga taga-Nineve laban sa lahing ito, sapagkat nagsisi sila dahil sa pangangaral ni Jonas. Pakinggan ninyo, lalong dakila kay Jonas ang naririto ngayon."
MAGNILAY:
Hindi palatandaan ang problema. Ang problema ay tiwala. Walang tiwala ang maraming tao sa mga palatandaang iniwan ni Hesus. Ano pa bang palatandaan ang hahanapin pa sa ipinakita ni Hesus? Makapangyarihan ang kanyang mga salita. Kapag mangaral siya ay may awtoridad dahil nakikita rin sa kanyang kilos at gawa ang kanyang pinangangaral. Tumatagos sa puso ang kanyang mga aral. Binubulabog nito ang kanilang konsiyensya. A, baka yun ang dahilan kaya marami silang hinahanap. Gusto nilang iwasan ang totoo. Natarget sila ng kanyang mga salita. Kitang-kita na na dapat silang magbago sa isang radikal na paraan. Pero takot at ayaw nila nito. Malaki ang kanilang iiwan. Malaki ang kanilang isusuko. Kaya, magbingi-bingihan na lang. Magbulag-bulagan na lang. Kunwari, naghahanap pa sila ng mga palatandaan pang iba. Pero ang totoo, sapat na kundi man sobra-sobra na ang palatandaan. Pagtugon na sana ang kasunod pero mas minarapat nilang maing sarado.
Hindi naman mangmang si Hesus. Alam niyang kahit anong palatandaan ang ipakita niya hindi siya paniniwalaan. Kung sa marami niyang kababalaghang ginawa ay hindi sila naniwala, ano pang kababalaghan ang puwedeng magkumbinsi sa kanila? Nakita ang mga bulag, nakarinig ang mga bingi, nakalakad ang mga pilay, gumaling ang mga maysakit, nabuhay ang mga patay. At higit sa lahat, nagbagong buhay ang mga makasalanan, naglingkod sa Diyos ng buong buhay ang maraming alagad, binago ng kanyang salita ang takbo ng buhay ng marami. Hindi pa ba sapat ang mga palatandaang ito? Kaya magagalit ang Reyna ng Seba sa lahing iyon dahil sinuong niya ang karagatan upang maglakbay marinig lang ang karunungan ni Solomon pero mas higit pa kay Solomon ang Panginoon. Magagalit ang mga taga-Nineve dahil nakinig sila ang Jonas at naloigtas sila pero mas higit pa kay Jonas ang Panginoon.
Tiwala. Ito ang problema. Wala silang tiwala. Tayo rin. Ang hamon sa atin ay magtiwala ng buo sa aral. Yan ang tanging iniwang palatandaan ng Panginoon. Marami na ang ginawa ng Panginoon sa atin pero tuwing magkakaproblema tayo bumabalik na naman ang pagdududa natin sa kanya. Madali tayong makalimot. Nagsasarili na naman tayo. Nagrerebelde na naman tayo. Oo, mahirap magtiwala. May elemento ito ng sugal. Isusugal natin ang kombiksyon natin. Pero ito ang ibig sabihin ng manampalataya. Magtiwala. Kahit lumalaki ang mga pagsubok huwag nating kalimutan na kailan man hindi tayo iniwan ng Panginoon. Ang totoo, araw0araw ay palatandaan ng Panginoon ng kanyang pagmamahal. Yun lang, madalas hindi natin ito pansin.
MANALANGIN:
Panginoon, dagdagan mo ang tiwala ko sa iyo laolo na sa panahon ng pagsubok. Huwag ko sanang malimutan agad-agad ang maraming magagandang bagay na ginawa mo sa akin. At higit sa lahat, magtiwala ako sa iyong salita at sa iyong aral. Ito ang liwanag na tumatanglaw sa bawa't hakbang na aking tinatahak sa buhay na ito. Turuan mo akong makinig lagi ng may pagtitiwala at paniniwala.
No comments:
Post a Comment