MATEO 6: 1-18
Katuruan Tungkol sa Paglilimos
1 "Pag-ingatan ninyong hindi pakitang-tao lamang ang paggawa ninyo ng mabuti. Kapag ganyan ang ginawa ninyo, wala kayong matatamong gantimpala buhat sa inyong Ama na nasa langit.
2 "Kaya nga, kapag naglilimos ka, huwag mo nang ipag-ingay pa gaya ng ginagawa ng mga mapagkunwari. Naglilimos sila sa mga sinagoga at sa mga lansangan upang sila'y mapuri ng mga tao. Tandaan ninyo: tinanggap na nila ang kanilang gantimpala. 3 Sa halip, kapag naglilimos ka, huwag mo nang ipaalam ito sa pinakamatalik mong kaibigan. 4 Gawin mong lihim ang iyong paglilimos at ang iyong Ama na nakakakita ng kabutihang ginagawa mo nang lihim ang siyang magbibigay ng gantimpala sa iyo."
Katuruan Tungkol sa Pananalangin
5 "Kapag nananalangin kayo, huwag kayong tumulad sa mga mapagkunwari. Mahilig silang manalanging nakatayo sa mga sinagoga at sa mga kanto upang makita ng mga tao. Tandaan ninyo: tinanggap na nila ang kanilang gantimpala. 6 Ngunit kapag mananalangin ka, pumasok ka sa iyong silid at isara mo ang pinto. Saka ka manalangin sa iyong Ama na hindi mo nakikita, at ang iyong Ama na nakakakita ng ginagawa mo sa lihim ang siyang magbibigay sa iyo ng gantimpala.
7 "Sa pananalangin ninyo'y huwag kayong gagamit ng maraming salitang walang kabuluhan, gaya ng ginagawa ng mga Hentil. Ang akala nila'y papakinggan sila ng Diyos dahil sa haba ng kanilang sinasabi. 8 Huwag ninyo silang tutularan. Alam na ng inyong Ama na nasa langit ang inyong kailangan bago pa ninyo ito hingin sa kanya. 9 Ganito kayo mananalangin,
'Ama naming nasa langit,
sambahin nawa ang iyong pangalan.
10 Nawa'y maghari ka sa amin.
Sundin nawa ang iyong kalooban dito sa lupa tulad ng sa langit.
11 Bigyan mo kami ngayon ng aming pagkain sa araw-araw;
12 at patawarin mo kami sa aming mga kasalanan,
tulad ng pagpapatawad namin sa mga nagkakasala sa amin.
13 At huwag mo kaming hayaang matukso,
kundi iligtas mo kami sa Masama!'
14 "Sapagkat kung pinapatawad ninyo ang mga nagkakasala sa inyo, patatawarin din kayo ng inyong Ama na nasa langit. 15 Ngunit kung hindi ninyo pinapatawad ang iba, hindi rin naman patatawarin ng inyong Ama ang inyong mga kasalanan."
Katuruan Tungkol sa Pag-aayuno
16 "Kapag kayo'y nag-aayuno, huwag kayong magmukhang malungkot tulad ng mga mapagkunwari. Hindi sila nag-aayos ng sarili upang mapansin ng mga tao na sila'y nag- aayuno. Tandaan ninyo: tinanggap na nila ang kanilang gantimpala. 17 Sa halip, kapag nag-aayuno ka, maghilamos ka, lagyan mo ng langis at ayusin mo ang iyong buhok 18 upang huwag mapansin ng mga tao na ikaw ay nag-aayuno. Ang iyong Ama na hindi mo nakikita ang tanging makakaalam nito. Siya, na nakakakita ng ginagawa mo nang lihim, ang siyang magbibigay ng gantimpala sa iyo."
MAGNILAY:
Dungisan mo na ang lahat ng bahagi ng katawan huwag lang ang mukha. Ito ang bahagi ng katawan na pinakanaglalarawan at nagpapahayag sa kung sino tayo. Ang mukha ang inihaharap natin sa iba bilang kinatawan ng kung sino tayo. Kaya't pinananatili natin itong walang dungis. At kapag ito ay dinungisan ng iba malaking sampal ito sa ating dangal. Ang madungis na mukha ay kumakatawan ng kababaan at dangal na nayurakan.
Pero ngayong Miyekules ng Abo kusa nating pinadudungisan ang ating mukha. Sa noo, pinalalagyan natin ito ng dumi - ang abo. Ang araw na ito ay kusang pagyakap sa kababaang-loob. Ginagawa natin ito sa harap ng Diyos na sinaktan natin dahil sa ating mga pagkukulang at pagkakamali. Ngayong nagbabalik-loob tayo sa kanya, nagpapakababa tayo dahil wala tayong mukhang ihaharap sa kanya dahil sa mga kataksilan natin sa kanya. Ang mukhang nadungisan ang siya nating ihaharap sa kanya para sa kanyang pagpapatawad. Ito ay araw ng pagsisisi at pag-amin ng ating karumihan.
Ang dungis sa ating mukha ay tanda rin ng desisyon nating kalimutan at talikuran ang ating ssarili alang-alang sa kapakanan ng iba. Isang tanda ito ng paglisan sa pagkamakasarili at patuon ng atensyon sa iba. Yung para sa akin ay hahayaan ko na lang iba ang makinabang para maiahon lang sila sa pagdurusa. Naglalarawan ito ng ganap na pag-ibig na walang iba kundi pagtalikod sa sarili para mahalin ang iba. Ang iba ang mas naging prioridad kaysa sarili. Masaktan ka na huwag lang ang iba. Magdusa ka na huwag lang ang iba. Mamatay ka na huwag lang ang iba. Hindi ba't ito'y halimbawa ng pag-ibig ni Hesus sa atin?
Nagsimula na tayo ngayon ng panahon ng kuwaresma. Panahon muli upang pagnilayan at yakapin ang pagdurusa ni Hesus hanggang pagkabuhay. Tumingala nawa tayo sa krus na pinakamakapangyarihang larawan at simbolo ng tunay na paglimot sa sarili alang-alang sa kaligtasan ng iba.
MANALANGIN:
Panginoon, turuan mo akong magmahal tulad ng pagmamahal mo. Matutunan ko nawa ang lumimot sa sarili para sa iba. Matamisin ko nawang madungisan huwag lang ang iba.
No comments:
Post a Comment