MATEO 16: 13-19
Ang Pahayag ni Pedro Tungkol kay Jesus
13 Nang dumating si Jesus sa bayan ng Cesarea ng Filipos, tinanong niya ang kanyang mga alagad, "Ano ang sinasabi ng mga tao patungkol sa Anak ng Tao?" 14 At sumagot sila, "Ang sabi po ng ilan kayo si Juan na Tagapagbautismo. Sabi po naman ng iba, kayo si Elias. At may nagsasabi pong kayo si Jeremias, o isa sa mga propeta." 15 Tinanong ulit sila ni Jesus, "Ngunit para sa inyo, sino ako?" 16 Sumagot si Simon Pedro, "Kayo po ang Cristo, ang Anak ng Diyos na buhay." 17 Sinabi sa kanya ni Jesus, "Mapalad ka, Simon na anak ni Jonas! Sapagkat ang katotohanang ito'y hindi inihayag sa iyo ng sinumang tao kundi ng aking Ama na nasa langit. 18 At sinasabi ko sa iyo, ikaw ay Pedro, at sa ibabaw ng batong ito ay itatayo ko ang aking iglesya at ang pintuan ng daigdig ng mga patay ay hindi magtatagumpay laban sa kanya. 19 Ibibigay ko sa iyo ang mga susi ng kaharian ng langit. Ang ipagbawal mo sa lupa ay ipagbabawal sa langit, at ang ipahintulot mo sa lupa ay ipahihintulot din sa langit."
MAGNILAY:
Ang sinumang maluklok sa kapangyarihan ay dapat maging kasangkapan ng pagkakaisa ng lahat ng ipinagkatiwala sa kanyang pamamahala. Ang pagkakaisa ang sukatan ng tagumpay ng isang nasa kapangyarihan.
Ipinagdiriwang natin ngayon ang Kapistahan ng Luklukan ni Apostol San Pedro. Ang luklukan o upuan ay matagal nang simbolo ng kapangyarihan. Ang umupo at mangaral ay kilos na nagpapahiwatig ng awtoridad. Ang luklukan ni Apostol San Pedro ay sumisimbolo sa natatanging tungkulin na iniatas sa kanya upang pangalagaan, pamahalaan at gabayan ang Simbahan na Kawan ng Panginoon. Sa kasaysayan ng Simbahan noon pa man ay kinikilala rin ang papel ni San Pedro bilang ministro ng pagkakaisa at pagkakabuklod. Ang tungkuling ito ay ipinapasa sa kasalukuyang panahon sa Obispo ng Roma, ang Santo Papa, na siyang tumatayong ministro ng pagkakabuklod ng lahat ng Simbahan sa buong mundo. Laganap ang Simbahan. Pinasok nito ang iba't-ibang lahi, bansa at kultura. Iba't-ibang mga komunidad nguni't may pagkakaisa sa pananampalataya at pag-ibig. Ang Santo Papa na nagmana ng tungkulin ni San Pedro ay tagapangalaga at tagapagtanggol ng pagkakaisang ito ng Simbahan. Bilang tagapagturo, tagapamahala at tagapangalaga siya ay instrumento ng pagkakisa at pagkakabuklod.
Nguni't sadyang ganito ang bawa't kapangyarihan o awtoridad sa ipinagkakatiwala sa sinuman. Ang silbi ang kapangyarihan ay hindi para maghahari-harian ang pinagkatiwalaan nito at pagsilbihan ang kaniyang kapritso at bisyo sa buhay. Hindi siya binigyan ng awtoridad para pagwatak-watakin ang kawan. Dapat niyang maging misyon ang tipunin ang lahat pati na ang mga taong kontra sa kanila, hindi naniniwala sa kanila at walang tiwala sa kanila. Hindi trabaho ng nasa kapangyarihan ang magtaboy lalo na ng mga ayaw sa kanya. Ang tunay na awtoridad ay gumagawa ng paraan para papaniwalain ang lahat sa magandang prinsipyong kanyang isinusulong. Huhulihin niya ang tiwala ng mga taong hindi nagtitiwala sa kanya sa pamamagitan ng pagpapatunay ng kanyang wagas na intensyong maglingkod. Sa ganito niya tinitipon ang lahat at binibigyang motibasyon na magtulungan.
Minsan, may mga taong nasa kapanyarihan na insecure. Yung mga kontra sa kanya ay basta na lang itataboy. Didikit lag siya sa mga alipores niya o sipsip sa kanya o yung hindi kontra sa kanya. Ang tunay na awtoridad ay nagtitipon hindi nagkakalat. Habang may nakikita siyang pagkakabaha-bahagi sa kawan ay lalo siyang nag-iisip kung papaano pagtitipunin ang mga nagkakahiwa-hiwalay.
Ang lakas ng Simbahan ay nasa kanyang pagkakaisa. Habang may bahid ng pagkakabaha-bahagi ang Simbahan ay mas lalo itong humihina sa kanyang kapangyarihang maging instrumento ng kaligtasan. Misyon ng bawa't Kristiyano ang maghasik ng binhi ng pagkakaisa at pagtutulungan katulong ang mga nasa awtoridad ng Simbahan na pinagkatiwalaan ng Diyos na pastulan ang kanyang kawan.
MANALANGIN:
Panginoon, tulkungan mo akong huwag maghing sanhi ng pagkakahati-hati sa aking komunidad na kinabibilangan. Maging kasangkapan nawa ako upang magkaisa ang lahat at magtulungan. Gabayan mo ang mga nasa awtoridad lalo na ang Santo Papa upang sila ay maging epektibong tagahasik ng binhi ng pagkakaisa.
No comments:
Post a Comment