Sunday, July 18, 2010

Daily Gospel Reflection by Fr. Rey An Yatco (07-18-10)

LUKAS 10: 38-42
Dumalaw si Jesus kina Marta at Maria
38 Si Jesus at ang kanyang mga alagad ay nagpatuloy sa kanilang paglalakbay, at pumasok sa isang nayon. Malugod silang tinanggap sa tahanan nina Marta 39 at ng kapatid niyang si Maria. Naupo ito sa may paanan ng Panginoon upang makinig sa kanyang itinuturo. 40 Si Marta naman ay abalang-abala sa paghahanda, kaya't lumapit siya kay Jesus at dumaing, "Panginoon, bale-wala po ba sa inyo na pinababayaan ako ng kapatid kong maghanda nang nagiisa? Sabihan nga po ninyo siyang tulungan naman ako."

41 Ngunit sinabi ng Panginoon sa kanya, "Marta, Marta, nababalisa ka at abalang-abala sa maraming bagay, 42 ngunit iisa lamang ang talagang kailangan. Mas mabuti ang pinili ni Maria at ito'y hindi aalisin sa kanya."

MAGNILAY:
Ang mahalaga kapag may dumadalaw na kaibigan ay yung makapag-usap. Yung pagkain, pag-aayos at pag-aasikaso ay pangalawa lamang. Kahit isang platitong mani lang o biskit at softdrink, okey na. Basta't nagkakumustahan, nagkabahaginan at nakapag-ugnayan ng puso sa puso, hindi na mahalaga ang mga materyal na preparasyon.

Ito rin yung punto ni Hesus kay Marta na naging abala sa ibang bagay pero nakaligtaan ang totoong mahalaga. Habang siya'y gawa ng gawa, nalimutan niyang ang makinig kay Hesus, na siyang piniling gawin ng kapatid nitong si Maria, ay ang lalong mas mahalaga. Hindi naman sinasabi ni Hesus na walang saysay ang pagiging abala ni Marta. Siguradong nagpapasalamat din si Hesus sa asikaso na binibigay niya. Kaya lang, kailangan niyang sabihin ito dahil sa maling pagtingin nito kay Maria na siya naman talagang gumawa ng mas lalong mabuti - ang makinig sa kanya. Yun ang pinakalayunin ng kanyang pagdalaw.

Ang pangyayaring ito kina Hesus, Marta at Maria ay sumasalamin din sa mas malawak nating buhay. Marami tayong mga proyekto sa buhay. Ang dami nating plano. Kulang ang oras para matapos ang lahat. Totoong minsan, abalang-abala tayo. Pero, kahit abala, parang walang kahulugan at saysay. Para sa ano nga ba ang lahat? Bakit kahit naaabot mo ang mga pangarap mo pero hindi ka pa rin masaya? Wala kasing saysay kung hindi rin lang sa Diyos nag-ugat at sa Diyos nakadireksyon. Ang relasyon natin sa kanya ang nagbibigay saysay sa lahat.

Ang panalangin ay dapat maging ugat din ng lahat ng gawain natin. Dito bumubukal ang presensya ng Diyos. May saysay lang ang mga gawain pag alam nating nandoon din ang Diyos. Ang gawa ay nagiging panalangin kapag napapamayanihan ng kanyang presensya. Ang sarap gumawa kapag alam mong naroon ang kanyang presensya. Nagdadasal ka na rin kahit sa gitna ng isang malaking proyekto.

Mahalaga din naman ang gawa. Hindi naman sinabi ni Hesus na huwag na tayong gumawa. Sa totoo nga, ang kabaligtaran ay kung dasal tayo ng dasal wala namang ginagawa. Yun yung kabilang dulo. Ginagawang dahilan ang dasal para hindi makagawa. Kasalanang malaki ang walang ginagawa. Ang katamaran at pagiging batugan ang ilan sa kakambal nitong kasalanan.

Ang isang buong Kristiyanong pamumuhay ay paggawa na ang ugat ay ang mapagmahal na ugnayan sa Diyos!

MANALANGIN:
Panginoong Hesus, sa lahat ng aking ginagawa ikaw nawa ang mamayani. At ang buhay panalangin ko nawa ay masalin sa mabubuyting gawang labis mong kinalulugdan.

Thursday, July 15, 2010

Beautiful Prayer

HEAVENLY FATHER,
I call on you right now in a special way. it is through your power that I was created. Every breath I take, every morning I wake, and every moment of every hour, I live under your power.
Father, I ask you now to touch me with that same power. For if you created me from nothing, you can certainly recreate me. Fill me with the haling power of your spirit. Cast out anything that should not be in me. Mend what is broken. Root out any unproductive cells. Open any blocked arteries or veins and rebuild any damaged areas. Remove all inflammation and cleanse any infection.
Let the warmth of your healing love pass through my body to make new any unhealthy areas so that my body will function the way you created it to function.
And Father, restore me to full heath in mind and body so that I may serve you the rest of my life.
With the prayer of Mary, Mediatrix of All Grace, I raise up these petitions, through Jesus, her Son and Our Lord, forever and ever. Amen.

For Married Couples!!!

it isn't DESTINY that deternines LOVE, it is CHOICE. Our so called destiny is a lie... relationships last long not because they're destined to last long... relationships last long because two brave people made a CHOICE
- TO KEEP IT
- TO FIGHT FOR IT
- AND TO WORK FOR IT.

Monday, July 12, 2010

Daily Gospel Reflection by Fr. Rey An Yatco (07-13-10)

MATEO 11: 20-24
Babala sa mga Bayang Ayaw Magsisi
20 Pagkatapos, sinumbatan ni Jesus ang mga bayang nakasaksi sa maraming himalang ginawa niya roon sapagkat hindi sila nagsisi't tumalikod sa kanilang mga kasalanan. Sinabi niya, 21 "Kawawa kayo, mga taga-Corazin! Kawawa kayo, mga taga-Bethsaida! Sapagkat kung sa Tiro at Sidon ginawa ang mga himalang ginawa sa inyo, matagal na sanang nagdamit ng sako at naupo sa abo ang mga tagaroon bilang tanda ng kanilang pagsisisi. 22 Ngunit sinasabi ko sa inyo, sa Araw ng Paghuhukom ay mas mabigat na parusa ang sasapitin ninyo kaysa sa mga taga-Tiro at taga-Sidon. 23 At kayong mga taga-Capernaum, maaaring itaas ninyo ang inyong sarili hanggang langit ngunit ibabagsak kayo hanggang sa daigdig ng mga patay! Sapagkat kung sa Sodoma ginawa ang mga himalang ginawa sa inyo, sana'y nananatili pa ang bayang iyon magpahanggang ngayon. 24 Ngunit sinasabi ko sa inyo, sa Araw ng Paghuhukom ay higit na mabigat ang parusang daranasin ninyo kaysa sa mga taga-Sodoma."

MAGNILAY:
Minsan, ang mga kamalasan natin ay tayo ang may gawa o tayo ang pumili. Madalas, kapag dumating ang malas, ang Diyos ang sinisisi natin. Pero, sabi nga, hindi nagkukulang ang Diyos ng mga paalala. Kapag inisip nga natin ang Diyos, ang mabuti at tama agad ang sumasagi sa kamalayan natin. Kapag inisip natin ang Diyos, hindi puwedeng hindi tayo hatakin at hamunin na piliin ang mabuti at tama at talikuran ang masama at mali. Ang kaso, umiiwas tayo sa mga malaking pagbabago sa mga pinipili natin. Sanay na tayo sa masama at mali. Kaya, todo iwas tayo sa Diyos para walang istorbo. Hindi na lang natin siya iisipin. Kunwari wala siya. Kunwari hindi siya totoo. Sige na lang tayo sa daloy ng mundo hanggang mauntog at matauhan tayo. Mali pala. Nakinig sana ako. Huli na. Sayang!

MANALANGIN:
Panginoong Hesus, hindi pa huli ang lahat. Makinig na sana ako ... ngayon na!

Daily Gospel Reflection by Fr. Rey An Yatco (07-11-10)

LUKAS 10: 25-37
25 Isang dalubhasa sa kautusang Judio ang lumapit kay Jesus upang siya'y subukin. "Guro, ano ang dapat kong gawin upang magkaroon ako ng buhay na walang hanggan?" tanong niya.

26 Sumagot si Jesus, "Ano ba ang nakasulat sa Kautusan? Ano ba ang nababasa mo roon?"

27 Sumagot ang lalaki, "'Ibigin mo ang Panginoon mong Diyos nang buong puso, buong kaluluwa, buong lakas, at buong pag-iisip;' at 'Ibigin mo ang iyong kapwa gaya ng pag-ibig mo sa iyong sarili.'"

28 Sabi ni Jesus, "Tama ang sagot mo. Gawin mo iyan at magkakamit ka ng buhay na walang hanggan."

29 Upang huwag siyang lumabas na kahiya-hiya, nagtanong pa ang lalaki, "Sino naman ang aking kapwa?"

30 Sumagot si Jesus, "May isang taong naglalakbay mula sa Jerusalem papuntang Jerico. Hinarang siya ng mga tulisan, kinuha pati ang damit sa kanyang katawan, binugbog, at iniwang halos patay na. 31 Nagkataong dumaan doon ang isang paring Judio. Nang makita ang taong nakahandusay, lumihis siya at nagpatuloy sa kanyang paglakad. 32 Dumaan din ang isang Levita, ngunit nang makita niya ang taong binugbog, lumihis din ito at nagpatuloy sa kanyang paglakad. 33 Ngunit may isang Samaritanong naglalakbay na napadaan doon. Nakita niya ang biktima at siya'y naawa. 34 Nilapitan niya ito, binuhusan ng langis at alak ang mga sugat at binendahan. Pagkatapos, ang lalaki ay isinakay ng Samaritano sa kanyang asno at dinala ito sa bahay-panuluyan upang maalagaan doon. 35 Kinabukasan, binigyan niya ng dalawang salaping pilak ang may-ari ng bahay-panuluyan, at sinabi, 'Heto, alagaan mo siya, at kung higit pa riyan ang iyong magagastos, babayaran ko sa aking pagbalik.'"

36 At nagtanong si Jesus, "Sa palagay mo, sino kaya sa tatlo ang naging tunay na kapwa ng taong hinarang ng mga tulisan?"

37 "Ang taong tumulong sa kanya," tugon ng abogado. Kaya't sinabi sa kanya ni Jesus, "Sige ganoon din ang iyong gawin."

MAGNILAY:
Sa gitna ng kagipitan, lahat ay nagiging kapwa mo. Ikaw ay kapwa sa sinumang nangangailangan ng iyong tulong at pagkalinga. Walang sinisino sa pagmamalasakit. Kaibigan man o kaaway, kakampi o katunggali, tagasuporta o kritiko, tagataguyod o taga-usig, kapag nangailangan, ang lahat ay nagiging iyong kapwa.

Madaling tumulong sa kaibigan, sa kakampi, sa tagasuporta at sa tagataguyod. Madaling maging kapwa sa isang nagmamahal at nagmamalasakit din sa iyo. Pero ang hamon ng kuwento ng Mabuting Samaritano, matuto kang maging kapwa sa mga taong hindi ka itinuring na isa. Dito nasusukat ang kadakilaan at kadalisayan ng ating pagmamahal.

Ang tunay na pag-ibig na nakikita sa malasakit ay lagpas sa mga kahon, husga, paratang, limitasyon na nilikha natin sa pagitan natin dahil sa mga masasakit at hindi magaganda na nagawa natin sa isa't-isa. Sa pag-ibig at malasakit, nabubuwag ang lahat ng pader at harang na itinayo natin.

Walang tagasunod ng Panginoon ang magkakait ng malasakit sa isang kaaway kapag ito ay nangailangan. Ito ay halimbawang pinamalas ni Hesus. Kung seryoso tayong tagasunod niya, tatahakin natin ang landas ng pagpapakasakit.

Ang pag-ibig at malasakit lalo sa isang kaaway ay desisyon. Hindi ito nakabase sa pakiramdam. Ang bigat ng kalooban ay maaaring hindi agad maibsan lalo at malaki ang atraso. Gayunpaman, ang gawa ay dapat pamayanihan ng katwiran, hindi lang ng pakiramdam. Ang maging kapwa sa iba, ang maging isang mabuting Samaritano, ay isang desisyon!

Saturday, July 10, 2010

Daily Gospel Reflection by Fr. Rey An Yatco (07-10-10)

MATEO10: 24-33
24 "Walang alagad na nakakahigit sa kanyang guro at walang aliping nakakahigit sa kanyang panginoon. 25 Sapat nang matulad ang alagad sa kanyang guro, at ang alipin sa kanyang panginoon. Kung ang ama ng sambahayan ay tinawag nilang Beelzebul, lalo nang lalaitin nila ang kanyang mga kasambahay."

26 "Kaya huwag kayong matakot sa kanila. Walang natatago na di malalantad at walang nalilihim na di mabubunyag. 27 Ang sinasabi ko sa inyo sa dilim ay ulitin ninyo sa liwanag; at ang ibinubulong sa inyo ay inyong ipagsigawan sa lansangan. 28 Huwag ninyong katakutan ang pumapatay ng katawan ngunit hindi naman nakakapatay ng kaluluwa. Sa halip, ang katakutan ninyo ay ang Diyos na may kakayahang pumuksa ng katawan at kaluluwa sa impiyerno. 29 Hindi ba't ipinagbibili sa halaga ng isang salaping tanso ang dalawang maya? Gayunman, kahit isa sa kanila'y hindi nahuhulog sa lupa kung hindi kalooban ng inyong Ama. 30 At kayo, maging ang buhok ninyo'y bilang niyang lahat. 31 Kaya, huwag kayong matakot; higit kayong mahalaga kaysa maraming maya."

32 "Ang sinumang kumilala sa akin sa harapan ng mga tao ay kikilalanin ko rin naman sa harapan ng aking Amang nasa langit. 33 Ngunit ang sinumang ikahiya ako sa harap ng mga tao ay ipapahiya ko rin sa harap ng aking Ama na nasa langit."

MAGNILAY:
Kung nakatakda man tayong dumanas ng pagsubok ay dahil ang sinusundan natin ang unang dumanas nito. Ang Panginoong Hesus ang unang ehemplo ng pagiging matatag sa gitna ng hirap. Hindi siya bumitiw kahit kalaban na siya ng mundo. Walang hirap ang nagpasuko sa kanya. Pinatunayan niya ang kanyang katapatan lalo na sa Ama sa pamamagitan ng pagiging handang magdusa. Sobrang laki ang kanyang pagmamahal sa Ama at sa ating lahat kung kaya't nakuha niyang magdusa ng sobra. Kinaya niya ito alang-alang sa pag-ibig. Walang makakahigit sa kanyang ginawa para sa atin.

Kaya naman, matuwa tayo na nakikibahagi tayo sa kanyang sakripisyo. May saysay ang pagdurusang ito. Tanda ito ng pagmamahal. Walang nagmahal at nagmalasakit ang hindi naging handang magdusa para sa minamahal. Si Hesus nga ang ating ehemplo.

Huwag matakot sa dusa. Daan ito ng pagiging perpekto sa pagmamahal. Huwag katakutan ang sakripisyo. Pampatibay ito ng kombiksyon at katapatan. Kapag nalampasan natin ang mga pagsubok, isisilang sa kalooban natin ang isang bagong tayo na naging matatag at tapat.

MANALANGIN:
Panginoong Hesus, walang-wala ang pagdurusa namin kumpara sa mga hirap na dinaanan mo. Maging ehemplo ka namin ng katatagan. Maging inspirasyon ka namin sa gitna ng mga pagsubok. Maging lakas ka namin sa panahong pinanghihinaan kami ng loob.

Friday, July 9, 2010

Daily Gospel Reflection by Fr. Rey An Yatco(07-09-10)

MATEO10: 16-23
16 "Tingnan ninyo; isinusugo ko kayo na parang mga tupa sa gitna ng mga asong-gubat. Kaya't maging matalino kayong gaya ng ahas at maamo na gaya ng kalapati. 17-18 Mga alagad ko, mag-ingat kayo sapagkat kayo'y darakpin at isasakdal sa mga Sanedrin, hahagupitin kayo sa kanilang mga sinagoga, at dadalhin kayo sa mga gobernador at mga hari nang dahil sa pagsunod ninyo sa akin, upang magpatotoo sa kanila at sa mga Hentil. 19 Sa pagkakataong iyon, huwag kayong mabahala kung ano ang inyong sasabihin, o kung paano kayo magpapatotoo sapagkat ito'y kusang ipagkakaloob sa inyo. 20 Hindi kayo ang magsasalita, kundi ang Espiritu ng inyong Ama ang magsasalita sa pamamagitan ninyo.

21 "Ipagkakanulo ng kapatid ang kanyang sariling kapatid upang ipapatay, gayundin ang gagawin ng ama sa kanyang anak; at lalabanan ng mga anak ang kanilang mga magulang at ipapapatay ang mga ito. 22 Kapopootan kayo ng lahat dahil sa pagsunod sa akin, ngunit ang mananatiling tapat hanggang wakas ang siyang maliligtas. 23 Kapag inusig kayo sa isang bayan, tumakas kayo sa kasunod. Tandaan ninyo: bago ninyo mapuntahan ang lahat ng bayan ng Israel, darating na ang Anak ng Tao.

MAGNILAY:
Hindi laging madali ang maging mabait. Minsan nga, baligtad ang nangyayari. Habang mas mabait ka, mas lalo ang hirap. Kapag mabait ka, iniiwasan ka. Itinataboy ka. Kinaiinisan ka. Sinisiraan ka. Pinagduduhan ka. E paano nga, hindi nila magawa ang maling gusto nilang gawin. Nahahadlangan ang maiitim nilang balak. Natatakot sila na may kokontra sa kanila. Mas nababahala sila na pananagutin sila sa masamang ginagawa nila. Mabubulilyaso ang raket nila. Pera na baka maging bato pa!

Pero hindi dapat mabahala ang mabait. Oo may ganitong pagsubok. Pero hindi kailanman maitutumba ang isang mabuting tao. Sa huli, ang mabuti ang siya pa ring wagi. Ang masama hindi puwedeng hindi magbago sa harap ng isang tapat at handang magdusa na mabuting tao. Walang matigas na puso ang hindi napalambot ng isang mabuting tao. Diyos ang kakampi ng isang mabuti. May kapangyarihan mula sa Diyos ang isang nagsisikap na manatiling mabuti. At ito ay nararamdaman ng lahat ng nakakasalamuha sa kanya. Minsan may sakripisyo. Pero walang makakapantay na kaligayahan ang maging daan para magbago ang mga dating nasa ligaw na landas.

Thursday, July 8, 2010

Qoutes for Today!!!

Give glory to the Lord, and call upon his name: declare his deeds among the Gentiles.

-- Psalm civ. 1

Wednesday, July 7, 2010

Qoutes for Today!!!

May God have mercy on us, and bless us: may he cause the light of his countenance to shine upon us, and may he have mercy on us.

-- Psalm lxvi. 2

Tuesday, July 6, 2010

Daily Gospel Reflection by Fr. Rey An Yatco

MATEO10: 1-7
1 Tinipon ni Jesus ang labindalawang alagad at binigyan sila ng kapangyarihang magpalayas ng masasamang espiritu at magpagaling ng mga may karamdaman. 2 Ito ang mga pangalan ng labindalawang apostol: si Simon na tinatawag ding Pedro, at si Andres na kanyang kapatid, sina Santiago at Juan na mga anak ni Zebedeo; 3 si Felipe, si Bartolome, si Tomas, si Mateo na maniningil ng buwis, si Santiago na anak ni Alfeo, at si Tadeo, 4 si Simon na Makabayan, at si Judas Iscariote na nagkanulo kay Jesus.

5 Ang labindalawang ito'y isinugo ni Jesus at kanyang pinagbilinan, "Huwag kayong pupunta sa lugar ng mga Hentil, o sa alinmang bayan ng mga Samaritano. 6 Sa halip, hanapin ninyo ang mga nawawalang tupa ng sambahayan ng Israel. 7 Humayo kayo't ipangaral na malapit nang dumating ang kaharian ng langit.

MAGNILAY:
Ang apostol ay isang tagasunod ni Kristo na matapos mag-aral sa Panginoon ay ngayo'y isinusugo upang maging kinatawan niya sa harap ng mga tao. Sa pagsusugo sa kanya, siya'y binibigyan ng kapangyarihan na gawin ang ginagawa ng Panginoon. Magpapahayag siya. Magiging tagahilom siya. Dadalhin niya ang presensya ng Panginoon sa mga taong pinagkaitan ng pagmamahal at pag-asa sa buhay.

Bawa't tagasunod ni Kristo ay nagiging apostol hindi lang pari, madre, misyonera at relihiyoso. Bawa't isang nagtataglay ng pangalang Kristiyano, nagtataglay ng pangalan ni Kristo, ay apostol saanman siya naroon, anuman ang kanyang gawain, sinuman ang kanyang nakakasalamuha. Ang bawa't tagasunod ni Kristo sa lahat ng sulok ng daigdig, sa lahat ng sektor ng lipunan, ay kinatawan niya. Tinawag niya tayo upang isugo. Hinubog niya tayo upang maging kinatawan niya sa lahat.

MANALANGIN:
Panginoong Hesus, pangalagaan ko nawa ang pangalang Kristiyano na taglay ko dahil, sabi ko, magiging tagasunod mo ako. Lagi ko nawang maisip na habang taglay ko ang pangalang iyan, ako ay kinatawan mo saanman ako naroon. Mahiya nawa ako sa sarili ko kapag kumikilos ako ng taliwas sa pangalang iyan. Makonsensiya nawa ako kapag nadudungisan ko ang pangalang iyan. Ako ay apostol mo, isinugo mo. Nawa'y maghing larawan ako sa iba ng iyong pagmamahal at presensiya.